Lɛɛrʋ wʋ́ yi Yisɩrayɛlɩ tiinə dɩ Zuda tiinə
5
Wɛ kaanɩm tiinə bam, cəgi-na taanɩ dɩntʋ!Abam Yisɩrayɛlɩ dwi tiinə bam dɩ pʋrɩ á zwa sɩ á cəgi-dɩ.
Pa-digə tiinə bam, á dɩ cəgi-na!
Abam wʋ taanɩ wʋnɩ mʋ,
dɩ á na kwɩɩlɩ cɩga á yagɩ tɩga nɩ je maama nɩ tɩn ŋwaanɩ.
Kʋ nyɩ dɩ á kwe cɩkʋ mʋ á cɩ Mitspa tɩʋ wʋnɩ te,
yɩ á daarɩ á dʋlɩ cɩgɩrʋ á loori Tabɔɔrɩ piu kʋm yuu maama.
2 Zwabani-nyɩna bam tiini ba soe nɔɔna gʋm.a
Amʋ nan wʋ́ waarɩ ba maama.
3 Amʋ maŋɩ a ye Efrayim dwi tiinə bam
dɩ Yisɩrayɛlɩ tiinə bam maama na yɩ te tɩn.
Kʋlʋkʋlʋ tǝrǝ ba na wʋ́ səgi amʋ yigə nɩ.
Yisɩrayɛlɩ dwi tiinə bam laan tu ba tɔgɩ boorim kikiə mʋ,
pa ba digimi ba tɩtɩ.
4 Ba kikiə yam kʋntʋ cɔgɩ-ba mʋ,
yɩ ba daa warɩ sɩ ba joori Wɛ te.
Ba wʋbʋŋa yǝni ya zʋ jwǝnǝ kaanɩmb wʋnɩ.
Ba daa maa ba kwarɩ Baŋa-Wɛ dɩ fɩnfɩɩn tɩtɩ dɩ.
5 Yisɩrayɛlɩ tiinə bam na brɩ ba tɩtɩ kamunni te tɩn
brɩ nɩ ba ba jɩgɩ bʋra.
Ba maa yǝni ba tri ba tʋ tɩga nɩ
ba lwarɩm dɩm ŋwaanɩ,
kʋ na maŋɩ kʋ yɩ Efrayim dwi tiinə bam dɩ.
Zuda tiinə bam dɩ ma da ba kwaga ba tʋ.
6 Ba ma kwe ba vara ba ja ba vu
ba ma kɩ kaanɩm sɩ ba zuli Baŋa-Wɛ.
Ba nan bá na‑DƖ,
DƖ na nuŋi ba tee nɩ tɩn ŋwaanɩ.c
7 Ba baarɩ Baŋa-Wɛ kwaga nɩ mʋ.
Biə balʋ ba na lʋgɩ tɩn daɩ DƖ nyɩm.
Can-dʋŋa candiə dim na yiǝ,
ba dɩ ba tɩga kam wʋ́ na cɔgɩm lɩla.
Najara cugə Zuda tɩʋ dɩ Yisɩrayɛlɩ tɩʋ wʋnɩ
8 Wu-na jara-kǝm nabwaanʋ Gibea tɩʋ wʋnɩ!
Kaanɩ-na Rama nɔn-biə bam!
Magɩ-na tiguri-kaasa Bɛt-Avɛn nɩ!
Bɛnzamɛn dwi tiinə bam, cʋ-na á tɩtɩ!
9 Efrayim tiinə bam waarɩm dɛ dɩm lagɩ dɩ yi,
sɩ ba tiini ba na cɔgɩm.
Amʋ na jɩgɩ wǝǝnu tɩlʋ a ta a brɩ Yisɩrayɛlɩ dwi tiinə bam tɩn sɩɩnɩ tɩ yɩ cɩga mʋ.
Tɩ wʋ́ yɔɔrɩ tɩ ba tɩ kɩ.
10 Zuda tiinə nakwa bam jigi nɩnɛɛnɩ
balʋ na di ba zʋ ba donnǝ sisəm wʋnɩ te tɩn mʋ.
A ban-lʋm dɩm wʋ́ zaŋɩ ba baŋa nɩ,
nɩ na-fara na cuuri kʋ cɔgɩ wǝǝnu te tɩn.
11 Lɛɛrʋ lagɩ tɩ yi Efrayim tiinə bam.
Amʋ wʋ́ waarɩ-ba pa ba na cɔgɩm,
ba wʋbʋŋa na jaanɩ sɩ ba zuli jwǝnǝ tɩn ŋwaanɩ.
12 Amʋ lagɩ a cɔgɩ Efrayim tiinə bam,
nɩ kɩnkaa na cɔgɩ gwaarʋ te tɩn mʋ.
A ta wʋ́ pa Zuda tiinə bam ji wʋ-ŋwam.
13 Efrayim tiinə bam na maanɩ yawɩʋ kʋlʋ na jɩgɩ-ba tɩn,
yɩ Zuda tiinə bam dɩ lwarɩ kʋ na zʋ ba yɩra te tɩn,
mʋ Efrayim tiinə bam loori zǝnǝ Asiiri tɩʋ kʋm tee nɩ.
Ba ma bʋŋɩ nɩ Asiiri pa-farʋ wʋm wʋ́ zǝni-ba.
Wʋntʋ nan bá wanɩ abam o sooni.
O bá pa á yɩra zuri.
14 Amʋ wʋ́ zʋ Efrayim tiinə bam dɩ Zuda tiinə bam wʋ
nɩnɛɛnɩ nyoŋo na zʋ vara wʋnɩ te tɩn mʋ.
Amʋ tɩtɩ wʋ́ tʋrɩ ba yɩra yam yɩra-yɩra,
yɩ a daarɩ a ja-ba a viiri.
Nɔɔn-nɔɔnʋ tǝrǝ o na wʋ́ wanɩ o joŋi-ba a jɩŋa nɩ o yagɩ.
15 Amʋ laan wʋ́ joori a tɩtɩ jǝgǝ kam a daarɩ-ba
pa ba na ba waarɩm dɩm ba ti.
Kʋ na zʋ ba yɩra kʋntʋ doŋ,
ba laan wʋ́ sɩɩnɩ ba yiǝ ba beeri amʋ jǝgǝ.