Baŋa-Wɛ bwɛ Yisɩrayɛlɩ tiinə bam
4
Yisɩrayɛlɩ dwi tiinə bam, cəgi-na Baŋa-Wɛ kwǝrǝ kam! DƖ jɩgɩ taanɩ dɩ abam balʋ na zʋʋrɩ tɩga kantʋ wʋnɩ tɩn. Tɩga kam maama wʋnɩ, nɔɔna ba tɔgɩ cɩga naa sono kənə, yɩ ba ba kwarɩ Wɛ dɩ. 2 Á soe kampwəl-balwarɩ, dɩ vwan fɔm, dɩ nɔn-gʋra, dɩ ŋʋnnɩ, dɩdaanɩ tʋlʋ tɩtʋŋa zanzan. Nɔɔna bam kɩ nakɔɔrɩ tɩtʋŋa mʋ maŋa maama, yɩ ba gʋɩ ba donnǝ sɩ kʋ ja kɛ jɩŋa. 3 Kʋntʋ mʋ te tɩga kam kʋgaa ka pɩɩrɩ pa balʋ maama na zʋʋrɩ ka wʋnɩ tɩn bugi. Ga-vara, dɩ zunə, dɩ nɩnɩʋ wʋ kale yam maama dɩ lagɩ tɩ tɩ.4 Yɩ taá jɩgɩ-na daanɩ á bwɛa, sɩ á pa kʋ yɩ nɔɔnʋ wʋdoŋ yigə. Kʋ nan yɩ abam kaanɩm tiinə bam mʋ amʋ lagɩ a bwɛ. 5 Wɩa dɩ tɩtɩɩ maama á yǝni á tri á tʋ tɩga nɩ mʋ. Nijoŋnǝ bam dɩ ma da ba tʋ tɩga nɩ. Amʋ nan lagɩ a cɔgɩ á dwi dɩmb mʋ. 6 A nɔɔna bam lagɩ ba na cɔgɩm, ba na ba jɩgɩ yǝno tɩn ŋwaanɩ. Abam yɔɔrɩ á vɩn mʋ sɩ á mɩ dɩ amʋ. Kʋntʋ ŋwaanɩ amʋ dɩ wʋ́ vɩn abam sɩ á yɩ taá yɩ kaanɩm tiinə á pa-nɩ. Amʋ ta wʋ́ nuŋi á biə bam kwaga nɩ. Kʋ nan yɩ á na vɩn á Tu Wɛ zaasɩm dɩm tɩn ŋwaanɩ mʋ.
7 Kaanɩm tiinə bam kɔgɔ kʋm na daga tɩte tɩn, ba lwarɩm tɩtʋŋa yam dɩ daga kʋntʋ doŋ mʋ pa ba tusi ba cɔgɩ amʋ yigə zanzan. Ba ma pa zulə yalʋ ya na maŋɩ dɩ ba tɩn ləni ya ji cavɩɩra ba yuu nɩ. 8 Lwarɩm yalʋ a nɔɔna bam na kɩ tɩn mʋ yɩ kaanɩm tiinə bam ni-wʋdiu. Bantʋ fra zʋ nɔɔna bam lwarɩm kikiǝ yam mʋ. 9 Kʋ nan lagɩ kʋ kɩ nɔɔna bam dɩ kaanɩm tiinə bam bɩdwɩ mʋ. Amʋ wʋ́ waarɩ ba maama cwe sɩlʋ ba na tɔgɩ tɩn ŋwaanɩ. A ta wʋ́ joori a ŋwɩ ba kikiə yam jɩnɩ ba yuu nɩ. 10 Ba na wʋ́ joŋi wʋdiu kʋlʋ ba di tɩn bá zuri ba kana. Ba na maŋɩ ba tɔgɩ boorim kikiə ba jwǝnǝ kaanɩm je sɩm nɩ mʋ dɩ, ba dwi dɩm bá puli. Bɛŋwaanɩ, ba lɔgɩ Baŋa-Wɛ kwaga nɩ mʋ yɩ ba daarɩ ba tɔgɩ wa-yɔɔrʋ.
Baŋa-Wɛ culi jwǝnǝ kaanɩm
Baŋa-Wɛ ma ta DƖ wɩ:
11 Sa-dɛɛra dɩ sa-bwənə mʋ pɛ
a nɔɔna bam wʋbʋŋa maama je.
12 Ba maa bʋŋɩ sɩ ba joŋi swan
ba nuŋi da-kʋra na yɩ jwəm tɩn tee nɩ mʋ.
Ba daa ba jɩgɩ ba tɩtɩ bʋbʋŋɩ.
Vʋrʋ biə laan mʋ brɩ-ba kʋlʋ na maŋɩ sɩ ba kɩ tɩn.
Kabwəŋə wʋbʋŋa mʋ paɩ ba cɔgɩ kʋntʋ doŋ.
Ba ma yagɩ ba Tu Wɛ dɩm
ba daarɩ ba kwe ba tɩtɩ ba pa wa yadonnə.
13 Pweeru tɩm yuparɩ baŋa nɩ mʋ
ba yǝni ba kɩ ba kaanɩm.
Ba maa zwɛ ba pɛɛra pu-kum sɩm yuu nɩ,
mɛ tweeru dwi dwic na wʋra yɩ dɩ woro kʋm yɩ timtim tɩn.
Kʋntʋ mʋ te á bukwa bam zʋ tʋlʋ wʋnɩ,
yɩ á bu-kaana dɩ tɔgɩ tʋlʋ tɩtʋŋa.
14 Amʋ nan bá waarɩ á bukwa bam ba tʋlʋ kənə yam ŋwaanɩ.
A ta bá waarɩ á bu-kaana bam ba boorim kikiə dɩ ŋwaanɩ.
Bɛŋwaanɩ, á baara bam tɩtɩ dɩ pəni dɩ ka-tʋlɩ mʋ.
Ba maa tɔgɩ dɩ ba ba kɩ kaanɩm ba pa jwǝnǝ.
Cɩga tɩn, «Dwi dɩlʋ bʋbʋŋa na tɩgɩ tɩn maa soe dɩ ve dɩ cɔgɩm jəgə mʋ.»
15 Yisɩrayɛlɩ tiinə bam, á yǝni á zʋ tʋlʋ wʋnɩ.
Nan yɩ pa-na sɩ Zuda dwi tiinə bam dɩ tɔgɩ á na-bɔŋa kam,
sɩ bantʋ dɩ lwarɩm taa wʋ ba yuu nɩ.
Yɩ zaŋɩ-na á vu Giligalɩ naa Bɛt-Avɛnd sɩ á zuli-nɩ.
Yɩ ma-na Ŋwɩa Tu Baŋa-Wɛ yɩrɩ dɩm á du durə.
16 Yisɩrayɛlɩ tiinə bam yɩ zwabani-nyɩna mʋ,
nɩ nacwan na yɩ te tɩn.
Baŋa-Wɛ laan wʋ́ wanɩ DƖ nii ba baŋa nɩ
nɩ pəlbiə doŋ te na?
17 Efrayime dwi tiinə bam mɩ dɩ jwǝnǝ kaanɩm.
Lɩ-na á tɩtɩ ba wʋnɩ á daarɩ-ba.
18 Ba na nyɔgɩ sana ba su,
ba laan yɔɔrɩ ba tɔgɩ boorim kikiə mʋ.
Ba soe cavɩɩra ba dwe zulə.
19 Vu-dɩʋ lagɩ kʋ ba kʋ kalɩ-ba mʋ kʋ pu
kʋ ja kʋ jagɩ.
Ba na kɩ kaanɩm ba paɩ jwǝnǝ te tɩn
wʋ́ guri-ba cavɩɩra wʋnɩ mʋ.