Oze 2

Kʋntʋ ŋwaanɩ, á wʋ́ bəŋi á cʋrrʋ Yisɩrayɛlɩ tiinə bam nɩ: ‹A nɔɔna›, dɩ ‹A bu-sonnu›.

Yisɩrayɛlɩ tiinə na kɩ ba cɔgɩ te tɩn

2 A biə bam, bwɛ-na á nu wʋm! Taanɩ wʋra dɩbam laŋa nɩ. O daa daɩ amʋ kaanɩ wʋm cɩga cɩga. Amʋ dɩ daa daɩ o barʋ wʋm. Koor-o-na sɩ o yagɩ o kabwəŋə kənə yam, sɩ o daa yɩ taa kaagɩ o cɔgɩ o tɩtɩ dɩ baara. 3 O na wʋ sɛ sɩ o kɩ kʋntʋ, a wʋ́ cʋʋrɩ o yɩra zɩla a daarɩ‑o, nɩ o nu dɩ o ko na lʋg-o te tɩn. A ta wʋ́ pa o ŋwɩa taa yɩ kafɛ, nɩ tɩ-kʋra na tigi yɩ na tǝrǝ te tɩn mʋ. Kʋntʋ baŋa nɩ mʋ na-nyɔm wʋ́ gʋ-o. 4 Amʋ bá taa jɩgɩ o biə bam ŋwaŋa, o na tʋlɩ o lʋ-ba tɩn ŋwaanɩ. 5 Ba nu wʋm ywəri o barʋ wʋm kwaga nɩ. O ma lʋ o biə bam dɩ cavɩɩra. O maa wɩ: «A wʋ́ nuŋi a vu a bɔɔla bam te. Kʋ na yɩ wʋdiu, dɩ na, dɩ gwaarʋ, dɩ nugə, dɩ sana dɩ, bantʋ wʋ́ kɩ ba pa-nɩ.» 6 Kʋntʋ ŋwaanɩ, a lagɩ a zagɩ sabarɩ mʋ a kwe a maa cɩ o cwǝŋǝ. A ta wʋ́ lɔ kəbrə a maa pɩ-o, sɩ o daa yɩ wanɩ o nuŋi pooni. 7 Kaanɩ wʋm wʋ́ kwaanɩ sɩ o zəli o bɔɔla bam, yɩ o nan bá yi-ba. Oó beeri ba je, yɩ o yi bá na-ba. O laan maa wʋ́ ta o tɩtɩ nɩ o wɩ: «Yagɩ sɩ a joori a vu a barʋ wʋm te, nɩ kʋ dɛɛn na yɩ te tɩn. Bɛŋwaanɩ amʋ dɛɛn yaa na wʋ wʋntʋ tee nɩ tɩn, a jɩgɩ wʋpolo a dwe lele kʋntʋ.» 8 O nan wʋ kɩ o wʋbʋŋa nɩ nɩ kʋ yɩ amʋ mʋ pɛ‑o mɩna yam, dɩ dɩvɛn bam, dɩ nugə kam. A ta ma pa‑o səbu-poŋo dɩ səbu-sɩŋa zanzan, yɩ o kwe-tɩ o ma zuli Baalɩ jwǝnǝ yam.

9 Kʋntʋ ŋwaanɩ, mɩna yam na tu ya bɩ, yɩ dɩvɛn bam dɩ na bɩga, a lagɩ a yiri a pɛɛra yam kʋntʋ mʋ. Kʋ ta na yɩ gwaarʋ tɩlʋ a na pɛ‑o sɩ o ma kwǝli o cavɩɩra tɩn, a wʋ́ joori a joŋi-tɩ o tee nɩ. 10 A ta wʋ́ cʋʋrɩ o təŋə zɩla a daarɩ‑o, pa o di o cavɩɩra o bɔɔla bam yigə nɩ. Nɔɔn-nɔɔnʋ bá wanɩ o joŋ-o amʋ jɩŋa nɩ o yagɩ. 11 A wʋ́ cɩ kwɛɛra yalʋ o na di ywəəni ya baŋa nɩ tɩn, kʋ na maŋɩ kʋ yɩ candiə kalʋ maama o na yǝni o guli o di tɩn. Bɩnɩ bɩnɩ candi, dɩ can-dʋŋa candi, dɩ siun dɛ maama candi mʋ kʋntʋ. 12 Kʋ na yɩ vinyə tweeru tɩm, dɩdaanɩ kapʋrrʋ tɩm o bɔɔla bam na pɛ‑o tɩn, a lagɩ a cɔgɩ-tɩ mʋ. O tagɩ o wɩ: tɩ yɩ ŋwɩɩrʋ tɩlʋ o na joŋi o baara bam tee nɩ kabwəŋə ŋwaanɩ tɩn mʋ. Amʋ nan wʋ́ pa o karɩ sɩm kʋntʋ ji gaa. Ga-vara wʋ́ taa tui ba di tweeru tɩm. 13 A wʋ́ waar‑o dɩ o na zwɛ wǝǝnu tɩlʋ lwǝm na ywǝmmǝ tɩn o kɩ kaanɩm o pa Baalɩ jwǝnǝ yam ya zulə da yam nɩ tɩn ŋwaanɩ. O maa yǝni o kwɛ o tɩtɩ dɩ zambilə, dɩ jafʋla sɩ o ma tɔgɩ o bɔɔla bam kwaga. O na kɩ te maama tɩn, o yɔɔrɩ o swe amʋ swiə mʋ.

Baŋa-Wɛ na tagɩ te tɩn mʋ kʋntʋ.

14 Kʋntʋ ŋwaanɩ, a laan lagɩ a koor‑o mʋ sɩ a ja-o a zʋ kagʋa kam wʋnɩ, sɩ a daarɩ a ma sono taanɩ a ŋɔɔnɩ dɩd-o. 15 Dáanɩ mʋ a wʋ́ joori a kwe o vinyə tweeru karɩ sɩm a kɩ o jɩŋa nɩ. A ta wʋ́ pa Akɔɔrɩ bolo kʋm pipiri kʋ ji tɩɩna jǝgǝ kʋ pa‑o. Kaanɩ wʋm laan wʋ́ leeni le nɩ o dɛɛn na kɩ te yɩ o nuŋi Ezipi tɩʋ kʋm nɩ o biini maŋa nɩ tɩn.

16 Baŋa-Wɛ kwǝrǝ mʋ tɩntʋ: Dɛ dɩm kʋntʋ nɩ, nmʋ wʋ́ joori n bǝŋi-nɩ nɩ n barʋ. N daa bá fɔgɩ n bǝŋi-nɩ nɩ n Baalɩ jwəm dɩm. 17 Amʋ ta wʋ́ cɩ Baalɩ yɩrɩ dɩm n ni nɩ, sɩ n yɩ loori zǝnǝ Baalɩ jwǝnǝ yam tee nɩ. 18 Dɛ dɩm kʋntʋ nɩ a wʋ́ kɩ ni-mɔrɔ dɩdaanɩ ga-vara bam, dɩ zunə bam, dɩ tɩga wo-vəəlu bam sɩ kʋ cɩ a nɔɔna bam sɩ ba yɩ na cɔgɩm. A ta wʋ́ cɔgɩ najara zɩla maama, kʋ na yɩ tɛ dɩ sʋ-lwaanʋ, sɩ tigurə daa yɩ zaŋɩ tɩga kam baŋa nɩ. Kʋntʋ laan wʋ́ pa nɔɔna maama sin dɩ yazurə. 19 Amʋ wʋ́ pa n ji a kaanɩ yɩ n ta n wʋ a tee nɩ maŋa maama. Amʋ wʋ́ tɔgɩ cɩga, dɩ sono, dɩ ŋwaŋa baŋa nɩ mʋ a kɩ kʋntʋ. 20 Dɩ́ wʋ́ taa jɩgɩ cɩga dɩ́ pa daanɩ, yɩ dɩ́ bá joori da-kwaga. Nmʋ dɩ wʋ́ ba n sɛ nɩ amʋ mʋ yɩ n Tu Baŋa-Wɛ dɩm.

21 Baŋa-Wɛ kwǝrǝ mʋ tɩntʋ: Dɛ dɩm kʋntʋ nɩ amʋ wʋ́ ləri ba wɛ-loro kʋm. A wʋ́ ta dɩ wɛyuu kunkwǝǝnu tɩm sɩ tɩ pa dʋa taa nɩ tɩga kam baŋa nɩ. 22 Tɩga kam dɩ wʋ́ sɛ yɩ ka kɩ mɩna, dɩ dɩvɛn, dɩ nugə lanyɩranɩ. Tɩntʋ maama wʋ́ ləri dɩ wʋpolo tɩ wɩ: «Wɛ mʋ dugə.» 23 Cɩga tɩn, amʋ wʋ́ pa a nɔɔna bam fɔgɩ ba na kugu je tɩga kam baŋa nɩ sɩ ba taa yɩ a tɩtɩ nyɩm. Kʋ na yɩ wʋlʋ ba ya na bǝi o yɩrɩ nɩ «Sono tǝrǝ» tɩn, amʋ mʋ wʋ́ taa soe kʋ tu. Kʋ ta na yɩ balʋ ba ya na bǝ-ba wɩ «Ba daɩ amʋ nɔɔna» tɩn, amʋ laan wʋ́ ta dɩ ba nɩ: ba sɩɩnɩ ba yɩ a nɔɔna mʋ. Ba dɩ maa wʋ́ ləri ba wɩ: «Nmʋ yɩ dɩbam Tu Wɛ dɩm mʋ.»