Wɛ Nijoŋnu
Oze Tɔnɔ
1
Baŋa-Wɛ kwǝrǝ kalʋ DƖ na pɛ Beeri bu Oze tɩn mʋ tɩntʋ. Kʋ maa yɩ maŋa kalʋ Ozɩasɩ, dɩ Zʋatam, dɩ Asasɩ, dɩ Ezekɩasɩ dɛɛn na saŋɩ daanɩ ba di Zuda tɩʋ paarɩ tɩn mʋ. Maŋa kam kʋntʋ nɩ Zoasɩ bu Zeroboam dɩ dɛɛn di paarɩ Yisɩrayɛlɩ tɩʋ kʋm nɩ.aOze kaanɩ dɩ o biə taanɩ
2 Baŋa-Wɛ dɛɛn na puli o kwe o kwǝrǝ o pa Oze sɩ o lwǝni o brɩ Yisɩrayɛlɩ tiinə bam tɩn mʋ DƖ tagɩ dɩd-o DƖ wɩ: «Nan zaŋɩ n di kaanɩ na yɩ ka-tʋla tɩn. Wʋntʋ wʋ́ lʋ biə o kəm-balwaarʋ dɩm baŋa nɩ o pa‑m, yɩ ba maama lagɩ ba ywəri nmʋ kwaga nɩ mʋ. Amʋ nɔɔna Yisɩrayɛlɩ tiinə bam dɩ nan yɩ kʋntʋ doŋ mʋ. Ba kaagɩ ba cɔgɩ mʋ zanzan yɩ ba ywəri amʋ Baŋa-Wɛ kwaga nɩ.»
3 Oze ma sɩɩnɩ o vu o di kaanɩ. O dɛɛn yɩ Dibilayim bukɔ mʋ, o yɩrɩ mʋ Gomɛrɩ. O ma ja pugə o lʋ bəkərə o pa‑o. 4 Baŋa-Wɛ ma ta dɩ Oze o wɩ: «Pa bu wʋm yɩrɩ wɩ: ‹Zizreyɛlɩ›. Bɛŋwaanɩ, kʋ bá daanɩ a lagɩ a pa cam yɔɔrɩ dɩ yi Zehu dwi dɩm dɩ wʋntʋ dɛɛn na tiini o tʋŋɩ nɔn-gʋra tɩtʋŋa Zizreyɛlɩ tɩʋ kʋm nɩ te tɩn ŋwaanɩ.b Kʋntʋ baŋa nɩ amʋ wʋ́ pa o dwi dɩm paarɩ ti Yisɩrayɛlɩ tɩʋ kʋm nɩ. 5 Dɛ dɩm kʋntʋ nɩ a lagɩ a cɔgɩ Yisɩrayɛlɩ jar-kərə bam mʋ dɩ ba dam maama Zizreyɛlɩ bolo kʋm nɩ.»
6 Gomɛrɩ daa ma ja pugə yɩ o lʋ bukɔ. Baŋa-Wɛ ma ta dɩ Oze DƖ wɩ: «Pa bu wʋm yɩrɩ nɩ ‹Lo-Ruhama›.c Bɛŋwaanɩ, amʋ daa bá taa jɩgɩ Yisɩrayɛlɩ dwi tiinə bam sono. A daa bá yagɩ ba lwarɩm a ma cɛ-ba. 7 Kʋ nan na yɩ Zuda dwi tiinə bam, amʋ wʋ́ taa jɩgɩ ba sono yɩ a joŋi-ba a yagɩ ba cam wʋnɩ. Amʋ wʋlʋ na yɩ ba Tu Baŋa-Wɛ dɩm tɩn mʋ wʋ́ joŋi-ba, yɩ kʋ daɩ ba najara zɩla ŋwaanɩ, naa ba siseŋ-nɔɔna ŋwaanɩ, naa balʋ na ye najara kǝm lanyɩranɩ tɩn ŋwaanɩ.»
8 Gomɛrɩ bukɔ wʋm na waarɩ o tu tɩga tɩn, o daa ma kwe pugə o lʋ bəkərə kadoŋ. 9 Baŋa-Wɛ ma ta dɩ Oze DƖ wɩ: «Pa bu wʋm yɩrɩ nɩ ‹Lo-Ammi›.d Bɛŋwaanɩ, abam daa sɩɩnɩ á daɩ amʋ nɔɔna. Amʋ dɩ maa daɩ abam dɩ Wɛ.»
Yisɩrayɛlɩ tiinə wʋ́ joori ba na vrɩm
10 Kʋ jwa na wʋ́ taa yɩ te tɩn, Yisɩrayɛlɩ tiinə bam wʋ́ puli ba taa daga zanzan nɩ nɩnɩʋ ni kasʋlʋ biə na daga te tɩn, yɩ nɔɔn-nɔɔnʋ bá wanɩ o ga o lwarɩ ba ni na maɩ te. Kʋ na yɩ jǝgǝ kalʋ Wɛ ya na tagɩ dɩ ba nɩ: ba daɩ o nɔɔna tɩn, jǝgǝ kam kʋntʋ nɩ nɔ́ɔ, DƖ wʋ́ ta dɩ ba nɩ: «Abam yɩ Ŋwɩa Tu Wɛ dɩm biə mʋ.»e 11 Dɛ dɩm kʋntʋ nɩ, Zuda tiinə bam dɩ Yisɩrayɛlɩ tiinə bam wʋ́ joori ba kɩ daanɩ, kɔgɔ dɩdʋa. Baá kuri yuutu dɩdʋa ba wʋnɩ sɩ o taa nii-ba. Baá taa te ba tɩga kam dɩ yazurə. Cɩga tɩn, Zizreyɛlɩ dɛ dɩm kʋntʋ wʋ́ taa yɩ dɛ-kamunu.