Kweelim maŋa kam taanɩ
12
«Maŋa kam kʋntʋ na yiǝ, malɛsɩ sɩm yigə tu Misɛɛlɩ wʋ́ zaŋɩ o nuŋi. Wʋntʋ mʋ yɩ wʋlʋ na nii nmʋ dwi tiinə bam baŋa nɩ tɩn. Lɛɛrʋ nan mʋ wʋ́ tiini tɩ taa wʋra maŋa kam kʋntʋ nɩ. Kʋ na zɩgɩ á tɩʋ kʋm pulim maŋa nɩ sɩ kʋ taa veǝ, nɔɔna ta wʋ nɛ lɛɛrʋ tɩntʋ doŋ.a Dɩ kʋ dɩ, nmʋ nɔɔna balʋ maama yɩra na pʋpʋnɩ ya tiŋi tɔnɔ kʋm wʋnɩ tɩn wʋ́ na vrɩm. 2 Nɔɔna balʋ na tɩgɩ ba tigi tɩga kuri nɩ tɩn zanzan wʋ́ joori ba bi. Ba badonnǝ wʋ́ bi ba na ŋwɩa kalʋ na ba ti tɩn, yɩ badaara dɩ bi ba na cavɩɩra dɩ yáalɩm sɩ kʋ taa ve maŋa kalʋ na ba ti tɩn. 3 Nɔɔna balʋ na fɔgɩ ba jɩgɩ Wɛ swan yam tɩn wʋ́ taa nyɩ dɩ pooni mʋ nɩ wɛyuu pooni na yɩ te tɩn. Balʋ na wǝli nɔɔna sɩ ba taa tɔgɩ cɩga cwǝŋǝ tɩn maa wʋ́ taa nyɩɩna nɩ wɛyuu pooni na yɩ te tɩn maŋa maama.b 4 Kʋ nan na yɩ nmʋ Daniyɛlɩ, nmʋ maŋɩ sɩ n səgi taanɩ dɩntʋ na wʋ tɔnɔ kʋm wʋnɩ tɩn mʋ, sɩ kʋ taa nii kweelim maŋa kam. Nɔɔna zanzan wʋ́ taa kaagɩ ba ve yigə dɩ kwaga, sɩ ba kwaanɩ ba lwarɩ wǝǝnu tɩntʋ kuri.»5 Amʋ Daniyɛlɩ laan ma kwǝni a yuu sɩ a nii, yɩ a na nɔɔna bale mʋ na zɩga ba wǝli da. Ba dɩdʋa zɩgɩ bu-tʋla kam bubɛ dɩdʋa nɩ mʋ, yɩ wʋdoŋ wʋm dɩ zɩgɩ dɩdoŋ dɩm nɩ. 6 Nɔɔna bale bam dɩdʋa ma bwe wʋlʋ na zʋ gar-fɩfalɩ yɩ o zɩgɩ bu-tʋla kam baŋa nɩ tɩn o wɩ: «Kʋ lagɩ kʋ daanɩ tɩta mʋ sɩ wo-kɩnkagɩla yantʋ maama kɩ ya ti?»
7 Wʋlʋ na zʋ gar-fɩfalɩ yɩ o zɩgɩ bu-tʋla kam baŋa nɩ tɩn ma zǝŋi o jɩn sɩle wɛɛnɩ, yɩ o du durə Yuutu Baŋa-Wɛ dɩm yɩrɩ ŋwaanɩ o wɩ: «Wǝǝnu tɩntʋ maama lagɩ tɩ daanɩ nɩnɛɛnɩ maŋa wʋdoŋ laŋa nɩ, dɩ maŋa kuni bɩle laŋa nɩ, kʋ wǝli dɩ maŋa cicoro laŋa nɩ mʋc. Wɛ nɔn-ŋʋna tɩm yaara yam na kɩ tɩ ti, mʋ wǝǝnu tɩntʋ maama kweelim dɩ wʋ́ yi.»
8 Amʋ na ni o taanɩ dɩm tɩn, a dɛɛn wʋ lwarɩ dɩ kuri. A maa bwe‑o a wɩ: «Amʋ tu, kweelim maŋa kam lagɩ ka guri tɩta mʋ?» 9 O dɩ ma ləri-nɩ o wɩ:
«Daniyɛlɩ, pa dɩ́ tiŋi taanɩ dɩm, bɛŋwaanɩ, taanɩ dɩntʋ laan kwǝli mʋ pa dɩ səgi sɩ kʋ taa nii kweelim maŋa kam. 10 Cam maŋa kam wʋ́ pa nɔɔna zanzan fɔgɩ ba kwɛ mʋ sɩ ba taa lana jasɩ. Nɔn-balwaarʋ maa wʋ́ taa ve yigə ba kɩ ba kənə, yɩ ba bá ni wǝǝnu tɩntʋ kuri. Balʋ na jɩgɩ Wɛ swan yam tɩn yɩranɩ mʋ wʋ́ ni tɩ kuri.
11 Kʋ zɩgɩ maŋa kalʋ nɩ ba na wʋ́ cɩ nɔɔna sɩ ba daa yɩ taa kɩ dɛ maama kaanɩm dɩm, yɩ ba daarɩ ba kwe wo-zɔɔnɩ dɩlʋ na cɔgɩ Wɛ yɩrɩ tɩn ba zɩgɩ, kʋ lagɩ kʋ kɩ da mʋrʋ dɩ biə-yale dɩ funʋgʋ (1,290)d mʋ. 12 Wʋlʋ maama nan na zuri o yɩra o cəgi sɩ kʋ yi da mʋrʋ dɩ biə-yatɔ dɩ fiintɔ-yanu yam (1,335) kweelim maŋa kam, kʋ tu wʋ́ tiini o na yu-yoŋo!
13 Kʋ nan na yɩ nmʋ Daniyɛlɩ, yɔɔrɩ n ta n ve dɩ yazurə sɩ kʋ yi n kweelim maŋa. N mʋmwɛ wʋ́ ba dɩ ti. Nmʋ nan ta wʋ́ joori n bi kweelim maŋa kam nɩ sɩ n joŋi ŋwɩɩrʋ tɩlʋ na tigi tɩ cəgi‑m tɩn.»