Daniyɛlɩ 1

Wɛ Nijoŋnu

Daniyɛlɩ Tɔnɔ

Daniyɛlɩ dɩ o badonnǝ bam taanɩ

Daniyɛlɩ na kɩ te Babilɔnɩ tɩʋ nɩ tɩn

Zuda tɩʋ Pɛ Yeoyakim paarɩ dim bɩna yatɔ bɩnɩ dɩm nɩ mʋ Babilɔnɩ tɩʋ Pɛ Nebukadnɛtsarɩ ve Zeruzalɛm sɩ o kɩ najara dɩ ba, yɩ o kaagɩ tɩʋ kʋm maama o pu. 2 Baŋa-Wɛ dɛɛn ma yagɩ cwǝŋǝ sɩ o di Pɛ Yeoyakim. Pɛ Nebukadnɛtsarɩ ma pɛ Wɛ diga kam zɩla yadonnə o ja o viiri. O na joori o tɩtɩ tɩʋ Babilɔnɩ tɩn mʋ o jaanɩ Wɛ diga zɩla yam o zʋ o tɩʋ jwəm zulə digə kam o tiŋi da.

3 Pɛ Nebukadnɛtsarɩ dɛɛn jɩgɩ nɔɔnʋ dɩdʋa na nii o nakwa maama baŋa nɩ. O yɩrɩ maa yɩ Asepenaza. Pɛ wʋm ma pa‑o ni sɩ o beeri Yisɩrayɛlɩ tiinə bam tɩtarɩ nɩ balʋ ya na nuŋi Zuda tɩʋ pɛ sɔŋɔ kʋm nɩ, naa Zuda tiinə nadunə badonnǝ wʋnɩ tɩn o pa‑o. 4 Bantʋ maŋɩ sɩ ba taa yɩ nɔn-dʋnnʋ tɩlʋ na lana fasɩ yɩ gɛɛrɩ tǝrǝ ba yɩra nɩ tɩn. Ba maa wʋ́ taa yɩ yi-pʋrɩ-nyɩna balʋ wʋbʋŋa na dana sɩ ba wanɩ wǝǝnu ba zaasɩ tɩn. Ba maa maŋɩ sɩ ba taa yɩ balʋ na maŋɩ sɩ ba tʋŋɩ Pɛ sɔŋɔ tɩtʋŋa tɩn mʋ. Asepenaza nan mʋ wʋ́ zaasɩ-ba sɩ ba lwarɩ Babilɔnɩ tiinə taanɩ dɩm sɩ ba daarɩ ba taa karɩmɩ ba twannʋ. 5 Pɛ wʋm ma pa ni sɩ dɛ maama wʋnɩ, ba pa nɔɔna bam kʋntʋ wʋdiu kʋlʋ wʋntʋ tɩtɩ dɩ o sɔŋɔ tiinə na wʋ́ di tɩn. Nɔn-dʋnnʋ tɩm nan maŋɩ sɩ ba kwe bɩna yatɔ mʋ ba zaasɩ lanyɩranɩ, sɩ ba zaasɩm dɩm kwaga nɩ ba taa tʋŋɩ ba paɩ pɛ wʋm o sɔŋɔ kʋm nɩ.

6 Zuda tɩʋ nɔɔna balʋ ba dɛɛn na kuri tɩn badonnǝ mʋ tɩntʋ: Daniyɛlɩ, dɩ Hanania, dɩ Mikayɛlɩ, dɩ Azarɩa. 7 Nebukadnɛtsarɩ nakwa yigə tu wʋm dɛɛn ma joori o pa-ba yɩrɩ-dʋʋra. O dɛɛn pagɩ Daniyɛlɩ yɩrɩ o wɩ: Bɛlɩtesaza. Hanania yɩrɩ maa yɩ Saderakɩ. Mikayɛlɩ maa yɩ Mesakɩ, yɩ Azarɩa yɩrɩ ləri dɩ ji Abɛd-Nego.

8 Daniyɛlɩ ma kɩ o wʋbʋŋa nɩ sɩ o yɩ digimi o tɩtɩ dɩ pɛ wʋm wʋdi-laarʋ tɩlʋ ba na pɛ‑o sɩ o taa di tɩn. O ma loori cwǝŋǝ Pɛ nakwa yigə tu wʋm tee nɩ sɩ o taa di wʋdi-gaa. 9 Wɛ dɛɛn ma pa Asepenaza lagɩ Daniyɛlɩ ni-taanɩ pa o duri o ŋwaŋa. 10 Dɩ kʋntʋ maama dɩ, nɔɔnʋ wʋm ta kwarɩ fʋʋnɩ dɩ pɛ wʋm mʋ. O ma ta dɩ Daniyɛlɩ o wɩ: «Amʋ tu Pɛ wʋm mʋ pɛ ni abam na wʋ́ taá di wʋdiiru tɩlʋ, dɩ á na wʋ́ taá nyɔ sana balʋ tɩn. Abam na lagɩ á taá di wʋdiiru tɩdonnǝ, yɩ ba ba ba maanɩ nɩ á yɩra ba zurǝ nɩ á yuudonnə bam, Pɛ wʋm wʋ́ wanɩ o go amʋ yuu o dɩ tɩga nɩ kʋ ŋwaanɩ.»

11 Asepenaza nan ya lɩ nɔɔnʋ mʋ sɩ o taa nii Daniyɛlɩ, dɩ Hanania, dɩ Mikayɛlɩ, dɩ Azarɩa baŋa nɩ. Daniyɛlɩ ma yi o te o ta dɩd-o o wɩ: 12 «Pa dɩ́ maanɩ dɩ́ nii da fugə laŋa nɩ sɩ n ta n paɩ dɩbam dwə-vɔɔrʋ yɩranɩ sɩ dɩ́ taa di, dɩ na-gaa sɩ dɩ́ taa nyɔa. 13 Da fugə na yiǝ, sɩ n pa dɩ́ nuŋi dɩ́ zɩgɩ. Nmʋ ma n wʋ́ kwe dɩbam yatɩga kam n maŋɩ dɩ nɔn-dʋnnʋ tɩlʋ tɩm na di pɛ wʋm wʋdi-laarʋ tɩn yatɩga. Nmʋ yi laan na nɛ kʋlʋ, sɩ n kɩ dɩdaanɩ dɩbam nɩ kʋ na maŋɩ te tɩn.» 14 Nɔɔnʋ wʋm ma sɛ sɩ o maanɩ-ba da fugə baŋa nɩ o nii.

15 Da fugə kam na yi tɩn, ba ma nii ba na nɩ Daniyɛlɩ dɩ o yuudonnə bam dɛɛn mʋ nugi lanyɩranɩ yɩ ba jɩgɩ lam ba dwe nɔn-dʋnnʋ tɩlʋ na di pɛ wʋm wʋdiiru tɩm tɩn. 16 Wʋlʋ na nii ba baŋa nɩ tɩn daa maa wʋ fɩn-ba sɩ ba di pɛ wʋm wʋdi-laarʋ tɩm sɩ ba daarɩ ba nyɔ o sana bam. Dwə-vɔɔrʋ yɩranɩ mʋ ba dɛɛn laan jɩgɩ ba di.

17 Wɛ dɛɛn ma pa nɔn-dʋnnʋ tɩna tɩntʋ yi-pʋrʋ dɩ yǝno, sɩ ba wanɩ ba zaasɩ twannʋ dɩ swan dwi maama. Kʋ wǝli da, Wɛ dɛɛn pɛ Daniyɛlɩ wʋbʋŋa mʋ sɩ o taa waɩ o maŋɩ vɩɩra dɩ dɩndwɩa kuri cɩga cɩga.

18 Bɩna yatɔ yalʋ Pɛ Nebukadnɛtsarɩ na pɛ ba ma ba brɩ nɔn-dʋnnʋ tɩm tɩn ma yi. Asepenaza ma ja ba maama o ja o jeeri Pɛ wʋm yigə nɩ. 19 Pɛ wʋm ma ŋɔɔnɩ dɩ ba dɩdʋa dɩdʋa, yɩ o daarɩ o bwe-ba bwiə. O ma maanɩ nɩ nɔn-dʋnnʋ tɩm maama wʋnɩ, Daniyɛlɩ, dɩ Hanania, dɩ Mikayɛlɩ, dɩdaanɩ Azarɩa mʋ kɩ lanyɩranɩ ba dwǝni wuu. O ma pa ni sɩ ba taa bwələ dɩd-o ba taa tʋŋɩ ba pa‑o. 20 Ba dɛɛn na wʋra tɩn, pɛ wʋm na lagɩ sɩ ba zən‑o dɩ swan, o yǝni o maanɩ nɩ nɔn-dʋnnʋ tɩm kʋntʋ swan dɩ ba yiyiu kɛ o sampwəri sɩm dɩ o liri-kərə bam maama swan mʋ kuni fugə laŋa nɩ. 21 Daniyɛlɩ dɛɛn maŋɩ pɛ sɔŋɔ kʋm nɩ mʋ o tʋŋɩ taa sɩ kʋ yi maŋa kalʋ Pɛ Sirusi na puli o di paarɩ tɩn.