Ezipi tɩʋ taanɩ
19
Wɛ kwǝrǝ kalʋ na ve Ezipi tɩʋ seeni tɩn mʋ tɩntʋ:Nii-na! Baŋa-Wɛ dɔgɩ kunkoŋo kʋlʋ na wurigi tɩn baŋa nɩ
DƖ maa bɩɩnɩ Ezipi.
Ezipi tɩʋ jwǝnǝ yam yɩra saɩ mʋ DƖ yigə nɩ.
Kʋ maa na yɩ Ezipi tiinə bam tɩtɩ,
ba wʋʋ maama cɔɔrɩ mʋ.
2 «A lagɩ a pa Ezipi tiinə bam zaŋɩ da-baŋa nɩ mʋ ba kɩ najara.
Nɔɔnʋ mʋ wʋ́ kɩ najara dɩ o cʋrʋ,
yɩ nɔɔnʋ dɩ o farʋ dɩ dwǝni daanɩ.
Tɩʋ wʋ́ ciŋi kʋ doŋ tɩʋ sɩ najara zaŋɩ,
yɩ pɛ dɩ kɩ jara dɩ o doŋ pɛ.
3 Ezipi tiinə bam nagwələ lagɩ ya tɩ mʋ,
amʋ na wʋ́ pa ba wʋbʋŋa yam ji kafɛ tɩn ŋwaanɩ.
Baá nuŋi bərə sɩ ba lwarɩ ba jwǝnǝ yam dɩ ba cirǝ wʋbʋŋa.
Ba maa wʋ́ vu ciciri vʋra dɩ sampwəri te.
4 Amʋ nan lagɩ a kwe Ezipi tiinə bam mʋ
a kɩ pɛ-balɔrɔ jɩŋa nɩ.
Wʋntʋ wʋ́ tɔgɩ kǝm-cɛɛrɩ baŋa nɩ o taa te-ba.»a
Yuutu Baŋa-Wɛ dɩm na yɩ Paŋwa tɩn mʋ tagɩ kʋntʋ.
5 Nili bugə na bam wʋ́ wɩ ba ti,
pa tɩ-kʋra yɩranɩ daarɩ.
6 Bu-tʋlɩ sɩm wʋ́ taa lwe mʋ,
yɩ bu-tʋlɩ sɩm dɩ na ba ba wɩ maama.
Bugə ni gaarʋ, dɩ nancan-gullu tɩm dɩ maama wʋ́ kwaarɩ.
7 Kʋ wǝli da, wʋdiiru tɩlʋ ba na dugi
Nili bugə kam ni nɩ tɩn maama wʋ́ kʋ mʋ.
Kʋ nan na yɩ karɩ sɩlʋ ba na dugi bugə kam ni nɩ tɩn,
sɩ maama wʋ́ kʋ mʋ, yɩ viu kalɩ kʋ ja je,
sɩ karɩ daa yɩ daarɩ dáanɩ.
8 Kalǝŋ-jara wʋ́ taa ŋʋʋsɩ mʋ yɩ ba keerǝ.
Bɛŋwaanɩ, balʋ na dɩ ba gwǝli Nili bugə kam wʋnɩ tɩn,
dɩ balʋ na dʋlɩ ba bʋrɩ ba dɩ ka wʋnɩ tɩn
wʋ́ taa tʋŋa yɔɔ yɩranɩ mʋ.
9 Balʋ na tʋŋɩ gwar-ŋʋnnʋ tɩtʋŋa tɩn vwana wʋ́ parɩ mʋ.
Balʋ dɩ na dʋlɩ garyiə tɩn tɩɩna wʋ́ ti.
10 Kʋ na yɩ balʋ na sɔ gwaarʋ tɩn,
ba wʋʋ wʋ́ cɔɔrɩ mʋ.
Balʋ maama na tʋŋɩ ŋwɩɩrʋ ŋwaanɩ tɩn wʋʋ maa wʋ́ cɔgɩ.
11 Sʋan tɩʋ dɩdɛɛra bam yɔɔrɩ ba yɩ jwəəru yɩranɩ mʋ.
Ezipi Pa-farʋ wʋm na jɩgɩ nakwa balʋ tɩn ba brɩ-o swan.
Abam lagɩ á tɔgɩ cwǝŋǝ kɔɔ nɩ mʋ sɩ á ta dɩd-o nɩ:
«Amʋ dɩ tɔgɩ a yɩ swan tiinə dwi dɩm wʋ nɔɔnʋ mʋ.
Kʋ na zɩgɩ faŋa tɩn mʋ
dɩ́ nabaara bam joŋi swan pwa tee nɩ»?
12 Nmʋ swan tiinə nan daa wʋ yən nɩ mʋ?
Bǝŋi-ba sɩ ba ba ba ta ba brɩ-m
kʋlʋ maama Paŋwa Tu Baŋa-Wɛ
na bʋŋɩ sɩ DƖ kɩ dɩ Ezipi tɩʋ kʋm tɩn.
13 Sʋan tɩʋ dɩdɛɛra bam sɩɩnɩ ba ji jwəəru mʋ.
Kʋ ta na yɩ Memfisi tɩʋ yigǝ tiinǝ bam,
nɔɔna jɩgɩ-ba ba gana mʋ.
Balʋ na yɩ Ezipi sɔ-yuni tɩm yigǝ tiinǝ tɩn
jaanɩ ba nɔɔna bam ba ywəri.
14 Baŋa-Wɛ nan na kɩ te tɩn,
DƖ vugimi nakwa bam wʋbʋŋa mʋ,
pa Ezipi tiinə kaagɩ ba tusi cwǝŋǝ.
Ba maa nyɩ dɩ sa-nyɔrʋ na bugi
yɩ o ve cwǝŋǝ yuu dɩ gaa wʋnɩ te tɩn.
15 Nɔɔn-nɔɔnʋ nan tǝrǝ Ezipi tɩʋ nɩ
sɩ kʋ tu wanɩ o joŋi-ba o yagɩ.
O na yɩ nɔn-yɩrʋ naa nɔn-kafɛ mʋ dɩ,
naa nadum naa nabwəm mʋ,
kʋ tu bá wanɩ o wǝli-ba.
16 Maŋa kam kʋntʋ nan na yiǝ, Ezipi tɩʋ tiinə maama wʋ́ na Paŋwa Tu Baŋa-Wɛ na twɩ DƖ jɩŋa te sɩ DƖ waarɩ-ba tɩn. Kʋntʋ maa wʋ́ pa ba taa fʋna nɩ kaana na jɩgɩ fʋʋnɩ te tɩn. 17 Zuda tɩʋ tiinə nan mʋ lagɩ ba pa fʋʋnɩ tiini dɩ ja Ezipi tɩʋ nɔɔna bam. Ba maa na yɔɔrɩ ba bəŋi Zuda tɩʋ kʋm yɩrɩ ba brɩ wʋlʋ, kʋ tu wʋ́ fʋm mʋ, dɩ Paŋwa Tu Baŋa-Wɛ na bʋŋɩ sɩ DƖ kɩ-ba te tɩn.
18 Maŋa kam kʋntʋ na yiǝ, Ezipi tɩɩnɩ dɩnu mʋ lagɩ dɩ taa jɩgɩ Ebru taanɩ dɩm ba ŋɔɔna, nɩ ba na ŋɔɔnɩ Kaanan nɩ te tɩn. Ba laan maa wʋ́ du durə ba sɛ ba pa Paŋwa Tu Baŋa-Wɛ. Baá taa bǝi tɩɩnɩ dɩm kʋntʋ dɩdʋa yɩrɩ wɩ: «Wɩa Tɩʋ kʋm.»
19 Maŋa kam kʋntʋ nan na yiǝ, baá lɔ bimbim Baŋa-Wɛ ŋwaanɩ Ezipi tɩʋ kʋm tɩtarɩ nɩ. Ba ta maa wʋ́ cwi kandwɛ nɩnɛɛnɩ ywe doŋ Ezipi sisəm dɩm nɩ ba pa‑DƖ. 20 Wǝǝnu tɩm kʋntʋ wʋ́ taa yɩ mɩmaŋɩ sɩ tɩ guli Ezipi tiinə bam mʋ nɩ Paŋwa Tu Baŋa-Wɛ yɔɔrɩ DƖ jɩgɩ dam. Ba dʋna na jɩgɩ-ba ba bɛɛsa, yɩ ba na keeri ba loori-DƖ, DƖ dɩ wʋ́ tʋŋɩ dɩdɛɛrʋ sɩ o ba o joŋi-ba o yagɩ. 21 Baŋa-Wɛ laan wʋ́ pa Ezipi tiinə bam lwarɩ DƖ na yɩ wʋlʋ tɩn cɩga cɩga, yɩ ba dɩ sɛ ba pa‑DƖ. Ba maa wʋ́ taa jaanɩ pɛɛra ba tui ba kɩ kaanɩm ba pa‑DƖ, sɩ ba ma ba zuli‑DƖ. Ba ta wʋ́ taa goni ba niə dɩ DƖ, ba daarɩ ba tɔgɩ-ya. 22 Baŋa-Wɛ tɩtɩ mʋ wʋ́ waarɩ Ezipi tiinə bam, yɩ Dɩntʋ nan ta mʋ lagɩ DƖ pa-ba yazurə. Ba maa na pipiri ba joori DƖ te, DƖ dɩ wʋ́ sɛ ba wɛ-loro kʋm yɩ DƖ daarɩ DƖ pa ba na yazurə.
23 Maŋa kam kʋntʋ na yiǝ, cwəŋə wʋ́ taa tigi yala-yala Ezipi dɩ Asiiri tɩɩnɩ dɩm tɩtarɩ nɩ. Tɩɩnɩ dɩm kʋntʋ dɩle nɔɔna wʋ́ taa kaagɩ ba ve da-tɩɩnɩ dɩm wʋnɩ. Ba ta wʋ́ yǝni ba kɩ daanɩ ba zuli Wɛ. 24 Maŋa kam kʋntʋ nɩ, Yisɩrayɛlɩ tɩʋ kʋm wʋ́ wǝli Ezipi dɩ Asiiri wʋnɩ, sɩ tɩɩnɩ dɩtɔ dɩm kʋntʋ taa yɩ daanɩ. Ba maa wʋ́ ja Wɛ yu-yoŋo ba ba ba pa tɩga baŋa maama nabiinǝ. 25 Paŋwa Tu Baŋa-Wɛ laan maa wʋ́ kɩ bantʋ maama yu-yoŋo yɩ DƖ ta nɩ: «Ezipi tiinə bam yɩ amʋ nɔɔna mʋ. Asiiri tiinə bam maa yɩ amʋ tɩtɩ jɩŋa tɩtʋŋa. Sɩ kʋ na yɩ Yisɩrayɛlɩ tiinə bam, amʋ mʋ kuri-ba sɩ ba taa yɩ amʋ tɩtɩ nyɩm. Kʋntʋ ŋwaanɩ, amʋ wʋ́ kɩ ba maama yu-yoŋo.»