Kusia tiinə taanɩ
18
Lɛɛrʋ wʋ́ yi tɩʋ kʋlʋ sɔɔ na zaŋanɩ kayɩra mʋ wuuri sɩ bɩɩnɩ tɩn!
Tɩʋ kʋm kʋntʋ nan lɛɛnɩ kʋ wʋ Kusi bwi sɩm je nɩ mʋ.
2 Kʋ yǝni kʋ tʋŋɩ kʋ nɔɔna dɩ kwǝrǝ mʋ
sɩ ba tɔgɩ Nili bugə kamb baŋa nɩ ba vu je sɩdonnǝ ba pa.
Ba kwe sangɛ mʋ ba ma ba kɩ nabwǝǝru tɩlʋ ba na maɩ ba yɛ na tɩn.
Nan tʋŋɩ-ba sɩ ba kɩ lɩla ba joori ba tɩtɩ tɩʋ.
Kʋ yɩ tɩʋ kʋlʋ nɔɔna na dwara yɩ ba yɩra dɩ swələ tɩn.
Nɔɔna je maama nɩ kwarɩ kʋ nɔn-biə mʋ,
ba kǝm na cana
yɩ ba cɔgɩ balʋ na dwǝni dɩ ba tɩn ŋwaanɩ.
Ba tɩga kam nan yɩ bwi mʋ pɔɔrɩ-ka sɩ kɩ tɩtarɩ nɩ.
3 Abam lʋgʋ baŋa nabiinǝ maama,
ba na zǝŋi drapoo pweeru tɩm yuu nɩ, fɔgɩ-na á nii!
Ba maa na wugi nabɔnɔ, fɔgɩ-na á cəgi!
4 Baŋa-Wɛ nan na tagɩ te dɩ amʋ tɩn mʋ tɩntʋ:
«Amʋ wʋ́ zɩgɩ a na zʋʋrɩ mɛ tɩn nɩ mʋ
sɩ a taa yɩ cɩmm yɩ a niə.
Amʋ wʋ́ tʋŋɩ mɛmɛ nɩ fʋnyʋgʋ na zaŋɩ wɩa maŋa nɩ te tɩn,
naa nyɔnɔ na tʋɩ wʋdiu zagɩm maŋa nɩ te tɩn mʋ.»
5 Bɛŋwaanɩ, vinyə tweeru na gɛ fɩɩn sɩ dɩ lə dɩ biə,
maŋa kalʋ punnu tɩm na yɔɔrɩ tɩ wʋra tɩ brɩ sɩ tɩ kɩ biə tɩn,
Wɛ lagɩ DƖ kwe sʋgʋ mʋ DƖ farɩsɩ tweeru tɩm nɛ DƖ dɩ tɩga nɩ,
nɩ sɩ na yɩ balɛ naa sɩ yɩ sɩlʋ na jagɩ sɩ maa kɛ yigə tɩn dɩ.
6 Ba yɩra yam wʋ́ maŋɩ tɩga nɩ mʋ,
sɩ ya ji wʋdiiru ya pa pweeru yuu zunə dɩ ga-vara.
Kwiə maŋa nɩ mʋ zunə bam wʋ́ di-ya,
sɩ ga-vara bam dɩ di-ya waarʋ maŋa nɩ.
7 Maŋa kam kʋntʋ nɩ nɔɔna wʋ́ ja pɛɛra ba ba ba pa Paŋwa Tu Baŋa-Wɛ dɩm. Balʋ na wʋ́ ja pɛɛra yam ba ba ba pa‑DƖ tɩn mʋ
nuŋi tɩʋ kʋlʋ nɔɔna na dwara yɩ ba yɩra dɩ swələ tɩn.
Nɔɔna je maama nɩ kwarɩ kʋ nɔn-biə mʋ,
ba kǝm na cana
yɩ ba cɔgɩ balʋ na dwǝni dɩ ba tɩn ŋwaanɩ.
Ba tɩga kam nan yɩ bwi mʋ pɔɔrɩ-ka sɩ kɩ tɩtarɩ nɩ.
Bantʋ wʋ́ ja ba pɛɛra ba ba Siyɔn piu kʋm, jǝgǝ kalʋ Paŋwa Tu Baŋa-Wɛ na kuri sɩ nɔɔna taa zuli DƖ yɩrɩ da tɩn mʋ.