Damasɩ tɩʋ taanɩ
17
Kwǝrǝ kalʋ na wʋra Damasɩ tɩʋ kʋm ŋwaanɩ tɩn mʋ tɩntʋ:«Nii mʋ! Damasɩ tɩʋ kʋm daa bá taa yɩ tʋ-fɔrɔ!
Kʋ lagɩ kʋ taa yɩ di-dwəənu yɩranɩ mʋ kʋ zɩga.
2 Baá duri ba daarɩ Aroyɛrɩ tɩɩnɩ dɩm
sɩ vara yɩranɩ taa tigi dɩ wʋnɩ,
yɩ nɔɔn-nɔɔnʋ bá wanɩ-ba sɩ o zəli.
3 Efrayim tɩɩnɩ dɩm ya na lɔgɩ dɩ pɩ dɩ dam tɩn wʋ́ cɔgɩ.
Damasɩ tɩʋ paarɩ dam dɩm dɩ maa wʋ́ ti.
Siiri tiinə balʋ fɩnfɩɩn na daarɩ tɩn wʋ́ yáalɩ mʋ,
nɩ Yisɩrayɛlɩ tiinə dɛɛn na daga yɩ ba laan yáalɩ te tɩn.»
Paŋwa Tu Baŋa-Wɛ na tagɩ te tɩn mʋ kʋntʋ.
4 «Maŋa kam kʋntʋ nan na yiǝ,
Zakɔbɩ dwi tiinə nɩnwaŋa kam wʋ́ ba tɩga.
Tɩʋ kʋm jɩjɩgɩrʋ maa wʋ́ je,
nɩ kana na jɩgɩ nadum pa o yɩra nugə kam je te tɩn.
5 Kʋ na wʋ́ kɩ-ba te tɩn wʋ́ taa nyɩ nɩ
mɩn-zagɩna na zagɩ mɩna ba kɩ daanɩ te tɩn mʋ.
Kʋ ta wʋ́ taa nyɩ nɩ ba na larɩ mɩna Refayim bolo kʋm nɩ te tɩn.
6 Mɩn-lara yadaara nan ta wʋ́ daarɩ da.
Kʋʋ́ kɩ nɩ ba na pʋrɩ Olivi tiu te,
yɩ ba daarɩ kʋ tiu biə bale, naa batɔ,
tiu kʋm nɛ sɩlʋ na tiini sɩ wʋ wɛ wɛ tɩn yɩra nɩ.
Tiu bi-laarʋ tɩna, naa tɩnu mʋ wʋ́ daarɩ
kʋ nɛ sɩm maama nɩ.»
Baŋa-Wɛ dɩm na yɩ Yisɩrayɛlɩ tiinə Wɛ tɩn mʋ tagɩ kʋntʋ.
7 Maŋa kam kʋntʋ maa na yiǝ,
nɔɔna wʋ́ kwǝni ba nii ba Kəru wʋm sɩ o zǝni-ba.
Baá kwe ba tɩɩna mʋ
ba daŋɩ Yisɩrayɛlɩ tiinə Wʋ-poŋo Tu wʋm wʋnɩ.
8 Ba yigə daa bá taa wʋ bimbinə yalʋ
ba na kɩ dɩ ba jɩan tɩn wʋnɩ.
Kʋ na yɩ jwǝnǝ yalʋ ba na mɔɔnɩ tɩn,
ba tɩɩna bá taa wʋ ya wʋnɩ,
nɩ kʋ na yɩ Asera nyɩnyʋgʋ dɛ sɩm
dɩdaanɩ wəənu tɩlʋ ba na zwɛ ba paɩ wapuli tɩn.
9 Maŋa kam kʋntʋ nan na yiǝ, nɔɔna wʋ́ duri ba daarɩ tɩɩnɩ dɩlʋ na lɔgɩ dɩ pɩ dɩ dam yɩ Yisɩrayɛlɩ tiinə bam zəli-ba dɩ wʋnɩ tɩn. Ga-balɔrɔ dɩ punnu yɩranɩ mʋ wʋ́ taa wʋra. Je sɩm maama maa wʋ́ taa tigi yɔɔ yɩranɩ.
10 Abam nan swe á Wɛ dɩm na yɩ á Vɩrnʋ tɩn ni nɩ mʋ.
Á daa maa ba guli Wɛ na yɩ á piu dɩ á dalɩm je tɩn gulə.
Kʋntʋ ŋwaanɩ, abam na maŋɩ á jəri tweeru tɩlʋ na tiini dɩ lana tɩn,
dɩ dɩlʋ á na zɩŋɩ á ja á nuŋi dwi-gɛ tiinə tɩɩnɩ wʋnɩ á ba tɩn,
11 abam nan na nii dɩ baŋa nɩ pa dɩ puli dɩ nuŋi lɩla,
yɩ dɩ bɩ dɩ kɩ punnu tɩtɩɩtɩ dɩlʋ wʋnɩ á na jəri-dɩ tɩn dɩ,
á bá na kʋlʋkʋlʋ á zagɩ.
Á nan wʋ́ na wʋ-cɔgɔ dɩ zʋnnɩ dɩlʋ na ba ti tɩn yɩranɩ mʋ.
12 Nii dwi-gɛ tiinə zanzan jar-kərə na kɩ sɔɔ te!
Ba yɔɔrɩ ba wuuri mʋ nɩ nɩnɩʋ kʋm na wuuri te tɩn!
Nii ba nɔn-kɔgɔ sɔɔ na zaŋɩ te!
Kʋ nyɩ nɩ na-fara na wuuri ba bɩɩnɩ te tɩn mʋ!
13 Nɔɔna bam kʋntʋ kwǝrǝ na maŋɩ ka zaŋɩ,
nɩ na-fara na wuuri kʋ kɩ sɔɔ te tɩn dɩ,
Baŋa-Wɛ nan na puri DƖ ni DƖ bwɛ-ba,
ba maama wʋ́ lagɩ je mʋ ba vu.
Kʋʋ́ taa nyɩ dɩ viu na kalɩ swannʋ pweeru yuu nɩ
kʋ ja je te tɩn mʋ,
naa kʋrɩm viu na pɛ weeru kʋ ja kɛ te tɩn mʋ.
14 Dɩdaan-ni maŋa nɩ, fʋʋnɩ tiini dɩ jɩgɩ dɩbam,
dɩ́ dʋna na yi dɩbam tɩn ŋwaanɩ.
Tɩga nan na jɩgɩ ka pʋʋrɩ tɩn, dɩ ba viiri mʋ!
Kʋlʋ na wʋ́ yi balʋ na tu sɩ ba kɩ jara dɩ dɩbam
yɩ ba vrɩ dɩ́ wǝǝnu ba ja viiri tɩn mʋ kʋntʋ.