16
Pa-na sɩ dɩ́ kwe peeni dɩ́ ŋwɩ dɩ́ pa
wʋlʋ na nii tɩga kam baŋa nɩ tɩn.
Dɩ́ wʋ́ zɩgɩ Siloe tɩʋ nɩ mʋ dɩ́ tʋŋɩ-sɩ
sɩ sɩ tɔgɩ kagʋa kam yuu
sɩ vu sɩ yi Siyɔn piu kʋm.a
2 Moabɩ tɩʋ kaana bam yɔɔrɩ ba zɩgɩ Aranon bugə kam bubɛ nɩ mʋ
yɩ ba lagɩ sɩ ba bɛ-ka.
Ba nan nyɩ nɩ zunə balʋ nɔɔna na ciŋi ba pwǝru nɩ
pa ba pipəgi ba vwana tɩn mʋ.
3 Ba maa tɛ ba wɩ: «Brɩ-na dɩbam dɩ́ na wʋ́ kɩ te tɩn.
Kuri-na bʋbʋŋɩ á pa dɩbam.
Kwe-na á lunluŋu á kwǝli dɩbam wɩa tɩtarɩ nɩ,
nɩ woro na wʋra te tɩtɩɩ nɩ tɩn.
Pa-na dɩbam dalɩm je,
dɩ́ daa na ba jɩgɩ sɔŋɔ tɩn ŋwaanɩ.
Yɩ pa-na sɩ balʋ na zəli dɩbam sɩ ba ja tɩn wanɩ ba lwarɩ dɩ́ je.
4 Yagɩ-na sɩ dɩbam balʋ ba na zəli Moabɩ tɩʋ nɩ tɩn
na cwǝŋǝ sɩ dɩ́ ba dɩ́ jǝni abam tɩtarɩ nɩ.
Pa-na sɩ dɩ́ na dalɩm je abam tee nɩ,
sɩ dɩ́ dʋna bam yɩ wanɩ dɩbam ba cɔgɩ.»
Wʋlʋ na bɛɛsɩ nɔɔna tɩn nan wʋ́ je.
Cɔgɩm dɩm dɩ maa wʋ́ ti
yɩ wʋ-lʋn-nyɩna bam dɩ saarɩ tɩga kam baŋa nɩ.
5 Baá tɔgɩ sono baŋa ba pa paarɩ dɩdoŋ taa zɩga,
sɩ nɔɔnʋ tɔgɩ cɩga kikiə baŋa nɩ o di paarɩ dɩm kʋntʋ.
Wʋlʋ nan na wʋ́ di-dɩ tɩn yɩ Davidi dwi tu mʋ.
Wʋntʋ wʋ́ bʋrɩ nɔɔna bʋra dɩ cɩga mʋ,
sɩ o daarɩ o nii sɩ nɔn-ŋʋnnɩ taa tʋŋa.
6 Dɩbam ni Moabɩ tɩʋ tiinə bam na jɩgɩ fiə te tɩn ni nɩ.
Ba yɔɔrɩ ba brɩ ba tɩtɩ kamunni mʋ dɩ ba dagɩm,
yɩ ba tʋŋɩ yi-dɛɛrɩ kikiə.
Ba kamunni ŋwɛ kikiə yam nan ba jɩgɩ kuri.
7 Moabɩ tiinə bam nan maŋɩ sɩ ba taa coosi mʋ,
lɛɛrʋ tɩlʋ na yi ba tɩʋ kʋm tɩn ŋwaanɩ.
Ba maama wʋ́ taa keeri mʋ wʋ-cɔgɔ ŋwaanɩ.
Taá keerǝ, dɩ kʋ na cɛ á yɩra
pa á daa ba naɩ Kir-Aresɛtɩ maasa á di tɩn.
8 Karɩ sɩlʋ na wʋ Hesebon nɩ tɩn,
dɩ Sibima tɩʋ vinyə tweeru karɩ sɩm maama kwaarɩ mʋ.
Tiu biə bam kʋntʋ nyʋa dɛɛn mʋ pɛ
tɩɩnɩ zanzan dɩdɛɛra nyɔ sana ba bugi.
Vinyə tweeru tɩm ma ta nɛ sɩ yi Yazɛrɩ
yɩ dɩ ta jagɩ sɩ yi kagʋa kam seeni.
Dɩ nɛ sɩm ta kɛ sɩ yi
nɩnɩʋ kʋm ni na wʋ mɛ tɩn.
9 Amʋ nan wʋ́ keeri mʋ nɩ Yazɛrɩ tiinə na keeri te tɩn,
Sibima vinyə tweeru tɩm na cɔgɩ tɩn ŋwaanɩ.
A yi-na nuŋi mʋ barɩ-barɩ,
Hesebon dɩ Elealɛ tɩɩnɩ ŋwaanɩ!
Bɛŋwaanɩ, abam daa bá taa kaasɩ dɩ wʋpolo,
á kaagɩ wʋdiiru kǝm baŋa nɩ, dɩ á tweeru na kɩ biə te tɩn.
10 Wʋpolo dɩ ywəəni dim daa tǝrǝ abam karɩ sɩm nɩ.
Vinyə tweeru karɩ sɩm nɩ, nɔɔna warɩ sɩ ba leeni le da.
Ba maa warɩ sɩ ba bagɩ sɔɔ ba yagɩ wɛɛnɩ.
Ba daa warɩ vinyə tiu biə bam sɩ ba kan ba nyʋa,
Bɛŋwaanɩ, amʋ pɛ wʋpolo sɔɔ kǝm ti ba tee nɩ.
11 A bɩcarɩ yɔɔrɩ dɩ zagɩ mʋ Moabɩ tɩʋ ŋwaanɩ,
pa a suuri nɩ ba na taɩ kɔnɔ yɩ kʋ yɩ te tɩn.
A wʋʋ dɩ ma tiini kʋ cɔgɩ Kir-Aresɛtɩ ŋwaanɩ.
12 Moabɩ tiinə ta na kaagɩ ba ve ba jwǝnǝ yigə nɩ,
yɩ ba na yaarɩ ba tɩtɩ ya wara je sɩm nɩ,
sɩ ba loori zǝnǝ ya tee nɩ te maama dɩ,
ya bá wanɩ-ba ya joŋi ya yagɩ.
13 Kwǝrǝ kam kʋntʋ mʋ Baŋa-Wɛ dɛɛn ya maŋɩ DƖ pa Moabɩ tɩʋ kʋm ŋwaanɩ. 14 Baŋa-Wɛ ta na tagɩ te tɩn mʋ tɩntʋ: «Bɩna yatɔ na yiǝ, nɩ tɩntʋŋnʋ na jeeli o tɩtʋŋa da yam te tɩn, Moabɩ tɩʋ jɩjɩgɩrʋ tɩm na pa-ba zulə tɩn daa bá taa jɩgɩ kuri. Kʋ nɔn-biə bam na maŋɩ ba daga te tɩn dɩ, ba fɩnfɩɩn yɩranɩ mʋ wʋ́ daarɩ, yɩ ba dɩ nan wʋ́ taa tiini ba bwǝnǝ mʋ.»