Moabɩ tiinə taanɩ
15
Kwǝrǝ kantʋ mʋ wʋra Moabɩ tiinə ŋwaanɩ:Ara tɩʋ na wʋ Moabɩ laŋa kam nɩ tɩn cɔgɩ.
Kʋ nan yɩ tɩtɩɩ dɩdʋa nɩ mʋ kʋ yɔɔrɩ kʋ cɔgɩ!
Kira tɩʋ dɩ na wʋ Moabɩ nɩ tɩn cɔgɩ.
Kʋ nan yɩ tɩtɩɩ dɩdʋa nɩ mʋ kʋ cɔgɩ kʋntʋ!
2 Dibɔn tɩʋ tiinə diini ba tɩʋ jwəm digə kam,
dɩdaanɩ dɩ wara-je bimbim dɩm mʋ,
sɩ ba keeri wʋ-cɔgɔ ŋwaanɩ.
Moabɩ tiinə yɔɔrɩ ba keeri mʋ
Nebo dɩ Medɩba tɩɩnɩ dɩm na cɔgɩ tɩn ŋwaanɩ.
Ba ceeri ba yum mʋ yɩ ba daarɩ ba fanɩ ba twana
ba wʋʋ na cɔgɩ tɩn ŋwaanɩ.
3 Ba ma zʋ gwar-zɩnzwara
yɩ ba kaagɩ tɩʋ kʋm cwe sɩm yuu nɩ ba veǝ.
Ba ta yɔɔrɩ ba diini ba sam nayuni mʋ,
yɩ ba jeeri ba jeerim je maama nɩ
ba kaagɩ ba coosǝ.
Ba maama ma vin ba yibiyə tɩga nɩ
yɩ ba kanɩ yi-na taa.
4 Hesebon tɩʋ tiinə dɩ Elealɛ tɩʋ tiinə dɩ yɔɔrɩ ba keeri mʋ.
Ba kərə kam sɔɔ kɛ kʋ ni Yahaza tɩʋ nɩ dɩ.
Moabɩ tɩʋ jar-kərə tɩtɩ vwana parɩ mʋ,
yɩ ba coosǝ, ba baarɩ maama na ti tɩn ŋwaanɩ.
5 A yɔɔrɩ a ŋwanɩ a paɩ Moabɩ tiinə bam mʋ.
Tɩʋ kʋm nɔɔna duri mʋ sɩ ba kwaanɩ ba yi Soarɩ.
Badaara dɩ ma duri sɩ ba vu ba yi Egɩlat-Selisiya.
Ba badonnǝ dɩ kwaana sɩ ba di ba yi Luhifi.
Ba nan yɔɔrɩ ba keeri mʋ yɩ ba veǝ.
Balʋ na tɩn Horon tɩʋ cwǝŋǝ nɩ ba maa kɛ tɩn
dɩ kaasɩ mʋ dɩ ba tɩʋ kʋm na cɔgɩ tɩn.
6 Nimirim na bam wɩ maama,
yɩ gaa kʋlʋ na wʋ dáanɩ tɩn dɩ kwaarɩ.
Ga-zuru dɩ tweeru maama je mʋ.
7 Moabɩ tiinə na nɛ jɩjɩgɩrʋ tɩlʋ ba tiŋi tɩn mʋ ba laga ba kɩ daanɩ,
yɩ ba ja-tɩ ba vu ba bɛ ‹Bugə ni tweeru› bugə kam.
8 Ba coosə yam kwəri kɛ sɩ yi Moabɩ laŋa kam sisəm.
Ba na kaasɩ te tɩn yi Egelayim seeni,
yɩ ba lu-kəri sɩm kwəri dɩ vu ya yi Bɛɛr-Elim tɩʋ kʋm.
9 Dibɔn tɩʋ bugə kam su dɩ jana mʋ.
Dɩ kʋ dɩ, amʋ Baŋa-Wɛ wʋ́ pa ba cam dɩm dwǝni kʋntʋ.
Kʋ nan na yɩ balʋ na nɛ cwǝŋǝ sɩ ba lu
yɩ ba ta daarɩ Moabɩ laŋa kam nɩ tɩn,
nyoŋo mʋ wʋ́ zaŋɩ ba baŋa nɩ kʋ gʋ-ba.