Zuda tiinə wʋ́ joori ba di ywəəni
14
Baŋa-Wɛ lagɩ DƖ joori DƖ duri Zakɔbɩ dwi dɩm yibwənə mʋ. DƖ maa wʋ́ fɔgɩ DƖ kuri Yisɩrayɛlɩ tiinə bam sɩ ba taa yɩ DƖ tɩtɩ nyɩm. DƖ nan wʋ́ ja-ba DƖ joori ba tɩtɩ tɩʋ kʋm wʋnɩ yɩ DƖ pa ba jǝni da. Vərə laan maa wʋ́ ba ba gwaanɩ ba wʋnɩ, sɩ ba dɩ Zakɔbɩ dwi tiinə bam taa yɩ bɩdwɩ. 2 Tɩɩnɩ zanzan nɔɔna mʋ lagɩ ba wǝli Wɛ nɔɔna bam sɩ ba joori ba tɩtɩ tɩʋ kʋm nɩ. Yisɩrayɛlɩ tiinə bam maa na tu ba jǝni Baŋa-Wɛ tɩga kam nɩ, ba laan wʋ́ wanɩ dwi-gɛ tiinə bam kʋntʋ ba taa te, sɩ dwi-gɛ tiinə bam ji ba gambɛ, baara dɩ kaana maama. Kʋntʋ tɩn, ba lagɩ ba di dam balʋ ya na jaanɩ-ba ba pɩ tɩn baŋa nɩ mʋ, sɩ ba taa te balʋ ya na jɩgɩ-ba ba bɛɛsɩ tɩn.Babilɔnɩ tɩʋ pɛ taanɩ
3 Yisɩrayɛlɩ tiinə bam, Baŋa-Wɛ wʋ́ sɩɩnɩ DƖ pa á ba á sin dɩ cam, dɩ yaara, dɩ tɩtʋŋ-dɛɛra yalʋ á dʋna na fɩn abam ba dɩ ya wʋnɩ tɩn. Dɛ dɩm kʋntʋ na yiǝ, 4 abam laan wʋ́ taá kɩ Babilɔnɩ tɩʋ pɛ mʋ á mwana yɩ á wɩ:
Bɛ mʋ tɩntʋ, wʋlʋ na bɛɛsɩ dɩbam tɩn daa tərə!
O daa bá yaarɩ dɩbam!
5 Baŋa-Wɛ bwəri pusɩŋ-nyɩna da-lwaanʋ tɩm,
yɩ DƖ daarɩ DƖ nɔnɩ pwa dam DƖ sɩn tɩga nɩ.
6 Ba ya jɩgɩ ba dam dɩm kʋntʋ mʋ
ba bɛɛsɩ nɔɔna taan ba ba yaga.
Ba ma kwe ba banɩ ba fɩn tɩɩnɩ pa dɩ tʋɩ dɩ pa-ba,
yɩ ba laan yɔɔrɩ ba jɩgɩ-ba ba yaarɩ taan.
7 Tɩga baŋa je maama laan nɛ bɩcar-zuru dɩ yazurə,
yɩ ba maama jɩgɩ wʋpolo le ba leenə.
8 Liban tɩʋ sɛdrɩ tweeru tɩm tɩtɩ,
dɩdaanɩ tu-ŋʋnnʋ tɩdaara tɩm
dɩ jɩgɩ wʋpolo mʋ dɩ kʋlʋ na yi nmʋ tɩn yɩ ba tɛ ba wɩ:
«Nmʋ laan na tʋ n tigi tɩga nɩ te tɩn ŋwaanɩ,
nɔɔn-nɔɔnʋ daa bá ba yo
sɩ kʋ tu goni dɩbam o dɩ tɩga nɩ.»
9 Babilɔnɩ tɩʋ pɛ wʋm,
curu yɔɔrɩ kʋ ti yigə mʋ sɩ kʋ jeeri‑m.
Kʋ ma ciŋi cirǝ dwi maama sɩ ba zaŋɩ ba jeeri‑m.
Kʋ na yɩ balʋ dɛɛn na di paarɩ lʋgʋ baŋa tɩɩnɩ dɩm wʋnɩ tɩn,
curu ta pɛ ba zaŋɩ ba paarɩ yitunnu baŋa nɩ mʋ.
10 Bantʋ maama laan maa wʋ́ ləri n taanɩ
sɩ ba ta dɩ nmʋ nɩ:
«Nmʋ dɩ laan bwǝnǝ mʋ nɩ dɩbam na yɩ te tɩn.
Nmʋ dɩ yɔɔrɩ n yɩ nɩ dɩbam na yɩ te tɩn mʋ.»
11 Nmʋ nɩnwaŋ-fɔrɔ kʋm maama laan tu kʋ ti curu nɩ mʋ,
yɩ n ya yɩ wʋlʋ ba na magɩ kwaanʋ mʋ
ba jɩgɩ ba tee nmʋ yɩrɩ tɩn.
Nan nii! Pʋpɔnɔ sara baŋa nɩ mʋ nmʋ tigə,
kʋ daarɩ yɩ kanzwa yɩ nmʋ gar-jalɩ.
12 Nmʋ ya nyɩ dɩ naŋɔgɔ na tiini kʋ nyɩɩnɩ tɩn mʋ.
Nan nii nmʋ laan na zɩgɩ wɛɛnɩ n tʋ tɩga nɩ te!
Nmʋ dɛɛn mʋ yigi lʋgʋ baŋa tɩɩnɩ maama n dɩ tɩga nɩ,
yɩ nmʋ tɩtɩ laan tʋ n tigi n kwaga tɩtarɩ nɩ.
13 Nmʋ ya kɩ n wʋbʋŋa nɩ mʋ n wɩ:
«Amʋ wʋ́ di wɛɛnɩ mʋ baŋa baŋa,
sɩ a zɩgɩ a paarɩ yituŋu kʋm wɛ wɛ,
wɛyuu calɩcwɩ sɩm na lɛɛnɩ je sɩlʋ nɩ tɩn.
A laan maa wʋ́ taa je jazɩm baŋa seeni piu kʋm nɩ yigə yigə,
mɛ seeni wa yam na yǝni ya jeeri tɩn.
14 A ta wʋ́ di wɛɛnɩ a gaalɩ kunkwǝǝnu tɩm mʋ,
sɩ a taa yɩ nɩ Yuutu Wɛ dɩm na yɩ te tɩn.»
15 Kʋ nan na kɩ te tɩn, ba joori ba dʋlɩ‑m mʋ
ba dɩ goŋ-canluŋu wʋnɩ.
Nmʋ laan ma n tu n zʋ curu kuri kuri.a
16 Balʋ na wʋ curu nɩ tɩn maa wʋ́ fɔgɩ ba nii‑m zii,
yɩ kʋ sʋ-ba dɩ kʋlʋ na yi‑m tɩn.
Ba laan maa wʋ́ bwe ba ta wɩ:
«Wʋlʋ dɛɛn na sugi tɩga baŋa
yɩ o pa lʋgʋ baŋa tɩɩnɩ dɩm sisiŋi tɩn mʋ tɩntʋ na?
17 Wʋlʋ dɛɛn na pɛ lʋgʋ kʋm maama ji kagʋa,
yɩ o yɔɔrɩ o cɔgɩ tɩga baŋa tɩɩnɩ maama tɩn mʋ tɩntʋ na?
O ma daarɩ o vɩn sɩ o pa balʋ o na jaanɩ najara wʋnɩ tɩn cwǝŋǝ
sɩ ba joori sɔŋɔ.»
18 Lʋgʋ baŋa tɩɩnɩ dɩm pwa maama tɩga
ba tigə dɩ ba nɩnwaŋa zɩla mʋ.
Ba dɩdʋa dɩdʋa maa tigi o tɩtɩ yibeeli wʋnɩ.
19 Kʋ nan na yɩ nmʋ, Babilɔnɩ tɩʋ pɛ,
ba lɩ‑m n yibeeli dɩm nɩ mʋ,
nɩ ba na goni tiu naga ba yagɩ te tɩn.
Nmʋ yɩra yam wʋ́ gwaanɩ dɩ balʋ ba na gʋ najara wʋnɩ
yɩ ba tɩ ba tigə laŋa nɩ tɩn mʋ.
Ba laan maa wʋ́ tuuri á yɩra yam maama ba vu ba dɩ goŋo wʋnɩ,
mɛ na yɩ kandwa je.
Kʋ laan maa wʋ́ pa ba nɔnɩ n yɩra yam ba sɩn tɩga nɩ.
20 Nmʋ na maŋɩ n cɔgɩ n tɩʋ kʋm
yɩ n gʋ n nɔɔna bam tɩn ŋwaanɩ,
ba bá kɩ n yɩra yam tɩga nɩ
nɩ ba na kɩ pwa badonnǝ bam te tɩn.
Nɔn-balwaarʋ dwi dɩm yɩra maama nan wʋ́ saarɩ mʋ
sɩ kʋ taa ve wuu.
21 Ti-na yigə sɩ á gʋ pɛ wʋm biə,
ba nabaara lwarɩm dɩm ŋwaanɩ.
Yɩ pa-ba cwǝŋǝ sɩ ba wanɩ lʋgʋ baŋa maama ba di,
sɩ ba fɔgɩ ba lɔ tɩɩnɩ je maama nɩ ba zɩgɩ.
22 Paŋwa Tu Baŋa-Wɛ na tagɩ te tɩn mʋ tɩntʋ:
«Amʋ tɩtɩ nan mʋ lagɩ a kɩ jara dɩ Babilɔnɩ tiinə bam. A maa wʋ́ pa Babilɔnɩ tɩʋ kʋm yɩrɩ saarɩ, sɩ nɔɔn-nɔɔnʋ daa yɩ daarɩ kʋ wʋnɩ. Ba biə dɩ ba dwi dɩm maama maa wʋ́ ti.»b
Baŋa-Wɛ na tagɩ kʋlʋ tɩn mʋ kʋntʋ.
23 «Amʋ wʋ́ pa ba tɩʋ kʋm ji kunkwəəruc zʋʋrɩm je mɛ buli na daga tɩn. A maa wʋ́ cɔgɩ kʋ je sɩm maama, nɩ a kwe zwɛ mʋ a yɔɔrɩ a zwarɩ kʋ wǝǝnu maama a yagɩ.»
Paŋwa Tu Baŋa-Wɛ na tagɩ kʋlʋ tɩn mʋ kʋntʋ.
Asiiri tɩʋ taanɩ
24 Paŋwa Tu Baŋa-Wɛ nan yɔɔrɩ DƖ du durə mʋ DƖ wɩ:
«Amʋ na jaanɩ wʋbʋŋa sɩ a kɩ te tɩn wʋ́ sɩɩnɩ kʋ kɩ mʋ.
A nan na ti a yigə sɩ a tʋŋɩ kʋlʋ tɩn maŋɩ sɩ kʋ zɩgɩ mʋ.
25 A lagɩ a yɔɔrɩ a cɩcʋgɩ Asiiri tiinə
balʋ na wʋ amʋ tɩga kam nɩ tɩn mʋ.
A ta wʋ́ nɔnɩ ba balʋ na wʋ amʋ pweeru tɩm yuu nɩ tɩn
a sɩn tɩga nɩ.
Kʋ na yɩ ban-daa kalʋ Asiiri tiinə bam na dɩ a nɔɔna bam ban nɩ tɩn,
amʋ wʋ́ lɩ-ka a yagɩ.
A maa wʋ́ dwanɩ ba zɩla yam ba bakalɩ baŋa nɩ a yagɩ.
26 Amʋ na jɩgɩ bʋbʋŋɩ dɩlʋ tɩga baŋa maama ŋwaanɩ tɩn mʋ kʋntʋ.
Amʋ nan mʋ twɩ a jɩŋa
sɩ a magɩ lʋgʋ baŋa dwi tiinə bam.»
27 Paŋwa Tu Baŋa-Wɛ wʋbʋŋa nan na jaanɩ sɩ DƖ kɩ te tɩn mʋ kʋntʋ.
Nɔɔn-nɔɔnʋ bá wanɩ o cɩ DƖ cwǝŋǝ.
DƖ maŋɩ DƖ twɩ DƖ jɩŋa sɩ DƖ tʋŋɩ.
Nɔɔn-nɔɔnʋ bá wanɩ o pipiri DƖ yigə.
Filisi tiinə taanɩ
28 Wɛ dɛɛn pɛ kwǝrǝ kantʋ yi amʋ te bɩnɩ dɩlʋ Pɛ Ahazɩ na tɩgɩ tɩn wʋnɩ mʋ.d
29 Filisi tiinə bam, abam maama yɩ taá caka nɩ:
da-lɔŋɔ kʋlʋ ya na jɩgɩ abam kʋ magɩ tɩn laan bwəri.
Lwarɩ-na nɩ bɩsankwɩa dʋnɩ yɩ ka bu nii mʋ.
Bɩsankwɩa kam kʋntʋ bu wʋm vɩan nan wʋ́ dwǝni ka tɩtɩ vɩan kam.
30 Zʋrɩ na jɩgɩ balʋ tɩn wʋ́ na ba ni-wʋdiu.
Nabwənə dɩ wʋ́ sin dɩ ba yaara yam.
Kʋ daarɩ abam Filisi tiinə bam wʋ́ tɩ mʋ dɩ kana.
Abam kɔgɔ kʋm nɔɔn-nɔɔnʋ bá wəri.
31 Á tɩʋ kʋm nakwa bam, taá coosǝ!
Á tɩʋ kʋm nɔn-biə bam dɩ taa keerǝ!
Abam Filisi tiinə bam maama,
kwarɩ-na fʋʋnɩ sɩ á wʋʋ maama cɔɔrɩ!
Bɛŋwaanɩ, jar-kərə nuŋi jazɩm baŋa seeni
ba bɩɩnɩ sɩ ba jeeri abam dɩ najara.
Kafʋʋrʋ tǝri ba kɔgɔ kʋm wʋnɩ.
32 Dwi-gɛ tiinə na tʋŋɩ nɔɔna dɩbam tee nɩ,
dɩ́ nan wʋ́ ta bɛɛ mʋ dɩ́ brɩ-ba?
Dɩ́ wʋ́ ta dɩ ba mʋ dɩ́ wɩ:
«Baŋa-Wɛ maŋɩ DƖ cwi Siyɔn tɩʋ mʋ DƖ zɩgɩ.
Kʋ nan yɩ dáanɩ mʋ DƖ nɔɔna balʋ na yaarɩ tɩn
wʋ́ zʋ ba na dalɩm je.»