Ezipi dɩ Kusi taanɩ
20
Asiiri tɩʋ pɛ Sarɩgon dɛɛn tʋŋɩ o jar-kərə yuutu pa o vu o jeeri Asedodi tɩʋ dɩ najara, sɩ o wanɩ-kʋ o di. 2 Bɩnɩ dɩm kʋntʋ wʋnɩ mʋ Baŋa-Wɛ tagɩ dɩ Amɔtɩ bu Ezayi DƖ wɩ: «Lɩ gwar-zɩnzwara tɩlʋ na wʋ n yɩra nɩ tɩn, sɩ n daarɩ n lɩ natra yalʋ n na zʋ tɩn.» O ma sɩɩnɩ o kɩ kʋntʋ, yɩ o kaagɩ je sɩm maama o beerǝ bwəri dɩ o napra yɩranɩ.a3 Baŋa-Wɛ laan ma ta DƖ wɩ: «Nɩ amʋ tɩntʋŋnʋ Ezayi na kaagɩ o ve bwəri o napra baŋa nɩ bɩna yatɔ te tɩn, kǝm dɩm kʋntʋ wʋ́ ji maana mʋ sɩ kʋ brɩ kʋlʋ na wʋ́ yi Ezipi tɩʋ dɩ Kusib tɩʋ tɩn. 4 Asiiri tɩʋ pɛ lagɩ o ba o kalɩ Ezipi dɩ Kusi tiinə balʋ o na wanɩ tɩn mʋ o ja o kɛ, yɩ baá taa ve bwəri dɩ napra mʋ ba maa kɛa. Kʋ nan wʋ́ taa yɩ ba nɔn-dʋnnʋ dɩ ba nankwɩn mʋ, yɩ ba maama kurə naɩ cavɩɩra yɩranɩ. 5 Balʋ ya na kwe ba tɩɩna ba daŋɩ Kusi tɩʋ baŋa nɩ, yɩ ba daarɩ ba kɩ ba cɩga dɩ Ezipi tɩʋ tɩn laan maa wʋ́ taa kwarɩ fʋʋnɩ, yɩ cavɩɩra jɩgɩ-ba. 6 Maŋa kam kʋntʋ na yiǝ, balʋ na zʋʋrɩ nɩnɩʋ kʋm ni seeni tɩn laan maa wʋ́ ta nɩ: ‹Dɩbam ya salɩ bantʋ yɩra nɩ yɩ dɩ́ duri dɩ́ vu ba te sɩ ba joŋi dɩbam mʋ ba yagɩ Asiiri pɛ wʋm jɩŋa nɩ. Nan nii kʋlʋ na yi-ba tɩn! Dɩbam laan nan wʋ́ tɔgɩ yən nɩ mʋ sɩ dɩ́ lu?› »