Dɩ́ bá wanɩ wǝǝnu maama dɩ́ lwarɩ dɩ́ ti
11
«Kwe n wǝǝnua n dʋlɩ n yagɩsɩ tɩ tɔgɩ nɩnɩʋ kʋm baŋa
tɩ jagɩ tɩ yi je maama.
Kʋ na kɩ da yale,
nmʋ wʋ́ joori n na-tɩ.»
2 «Pɔɔrɩ n jɩjɩgɩrʋ n pa
nɔɔna barpɛ naa nɔɔna nana,
sɩ n yǝri cam dɩlʋ na
wʋ́ yi‑m lʋgʋ baŋa nɩ tɩn.»b
3 «Kunkwǝǝnu na kikili liirə liirə,
dɩ́ ye nɩ dʋa lagɩ ka nɩ mʋ.
Tiu nan na tʋ kʋ jeeri mɛ maama,
kʋʋ́ taa tigi kʋntʋ mʋ taan.»
4 «Wʋlʋ na fɔgɩ o nii tɩga yibiyə
sɩ o lwarɩ duum maŋa,
kʋ tu bá zaŋɩ o du duum.
Wʋlʋ dɩ na nii kunkwǝǝnu
na kikili te tɩn,
kʋ tu bá zagɩ wʋdiu o ja o zʋ digə.»
5 Nmʋ nan bá wanɩ n lwarɩ cwǝŋǝ kalʋ viu na tɔgɩ da kʋ dʋlɩ tɩn. N ta bá wanɩ n lwarɩ bu na kɩ te o ŋwɩ o nu pugə nɩ tɩn. Kʋntʋ doŋ mʋ n bá wanɩ n lwarɩ Wɛ kikiə yam kuri n ti, dɩ DƖ na yɩ dɩlʋ na kɩ wǝǝnu maama tɩn. 6 Zɩzɩŋa nɩ sɩ n nuŋi n vu n puli duum. Daa ta ta n tʋŋɩ n kara nɩ sɩ tɩga laan ba ka yi. Bɛŋwaanɩ, n bá wanɩ n lwarɩ tɩtʋŋɩ dɩlʋ na wʋ́ kɩ lanyɩranɩ tɩn. Dɛ dɩlʋ n tɩtʋŋa yam maama wʋ́ pa n na nyɔɔrɩ.
Ywəəni taanɩ
7 Tɩga baŋa pooni mʋ jɩgɩ ywəəni. Nɔɔnʋ yiǝ na naɩ wɩa kam pooni, kʋntʋ tiini kʋ lana mʋ kʋ pa‑o. 8 Nɔɔnʋ na maŋɩ o kwɩn dɩ bɩna zanzan, kʋ maŋɩ mʋ sɩ kʋ tu di o ŋwɩa da yam maama ywəəni. O nan yɩ swe nɩ o lagɩ o taa wʋ lim wʋnɩ mʋ taan. Kʋ na yɩ kʋlʋ maama jwa na wʋ́ ba kʋ kɩ tɩn, dɩ́ bá wanɩ dɩ́ lwarɩ kʋ kuri.
Nɔn-dʋnnɩ taanɩ
9 Nmʋ wʋlʋ na yɩ nɔn-dʋŋʋ tɩn, nmʋ ta na wʋ kwɩn: sɩ n di n ŋwɩa kam ywəəni. Ta n jɩgɩ wʋpolo n nɔn-dʋnnɩ maŋa nɩ. Pa n wʋbʋŋa dɩ n yiǝ taa brɩ-m cwǝŋǝ kalʋ n na wʋ́ tɔgɩ tɩn. Nan ta n ye nɩ: nmʋ na tɔgɩ cwǝŋǝ kalʋ maama, Wɛ wʋ́ di n taanɩ kʋ baŋa nɩ. 10 Yɩ sɛ sɩ liǝ zʋ n wʋbʋŋa, sɩ kʋlʋkʋlʋ dɩ yɩ pa n yɩra cɛ. Bɛŋwaanɩ, dɩ́ nɔn-dʋnnɩ maŋa kam ba daanɩ yɩ ka tiə.