12
Ta n guli wʋlʋ na naanɩ‑m tɩn gulə nmʋ nɔn-dʋnnɩ maŋa nɩ. Kɩ kʋntʋ yɩ cam maŋa ta wʋ yi‑m, sɩ n laan ta nɩnɛɛnɩ, «Amʋ daa ba ni ŋwɩa ywəəni.» 2 Maŋa kam kʋntʋ nɩ wɩa kam, dɩ cana kam, dɩ calɩcwɩ sɩm pooni daa bá taa naɩ tɩ pa‑m, yɩ woŋo maama yɩ lim mʋ. Dʋ-kunkwəənu dɩ maa wʋ́ joori tɩ li tɩga kam. 3 Maŋa kam kʋntʋ nɩ, balʋ na yɩrɩ sɔŋɔ kʋm tɩn yɩra laan wʋ́ taa saɩ mʋ. Babɩa vwana dɩ maa wʋ́ parɩ. Kaana balʋ na cʋ muni tɩn maa yagɩ munə cʋm, ba na muri tɩn ŋwaanɩ. Balʋ dɩ na nii digə takwəəru tɩm seeni tɩn yiǝ laan dwe mʋ.a 4 Maŋa kam kʋntʋ nɩ, baá cɩ manchoŋo ni dɩm. Nɔŋɔ kʋm sɔɔ daa bá taa ni tɩʋ wʋnɩ. Zuŋə dɩdʋa tɩtɩ na keeri tɩtɩɩ nɩ, nmʋ wʋ́ zaŋɩ dɔɔm wʋnɩ lɩla. Lɩnlɛ kwǝri nan daa bá tʋ n zwa wʋnɩ.b 5 Ka maŋa nɩ, nmʋ wʋ́ ta n kwarɩ fʋʋnɩ dɩ wɛyuu diinim. Liǝ maa wʋ́ taa jɩgɩ-m n vəŋə wʋnɩ. Yuuywe jiri napwəənu nɩnɛɛnɩ tiu na kɩɩ punnu tɩte tɩn mʋ. Yɩra yəni ya ba ya duni nɩnɛɛnɩ manjolo na zɩgɩ woŋo yuu nɩ kʋ tʋ tɩga nɩ tɛ tɩn mʋ. Nmʋ fra maama wʋ́ ti. Bɛŋwaanɩ, kʋ gɛ fɩɩn sɩ n vu n yi n wɛyuu sɔŋɔ kʋm. Ba laan maa wʋ́ taa keeri luə bugi-bugi je maama nɩ. 6 Nan guli n Naanʋ wʋm gulə yɩ səbu-poŋo capʋnnʋ tɩm ta wʋ kɔgɩ, yɩ səbu-sɩŋa na-zʋŋa kam dɩ wʋ lɔgɩ. Kɩ kʋntʋ yɩ goŋo kʋm ta wʋ cɔgɩ vʋlɩ dɩm seeni sɩ kʋ paɩ ba daa yɩ wanɩ na ba mɔ. 7 Dɩ́ yɩra yam laan maa wʋ́ joori tɩga kam ka ji tɩɩrʋ, sɩ joro kʋlʋ na paɩ ŋwɩa tɩn joori kʋ vu Wɛ dɩlʋ na kwe-kʋ DƖ pa dɩbam tɩn te.8 Amʋ wʋlʋ na yɩ Wɛ kwərə-tu tɩn mʋ wɩ:
Dɩ́ bá wanɩ dɩ́ ni wǝǝnu tɩntʋ maama kuri.
Tɩ kuri nim tiini dɩ cana
dɩ gaalɩ sɩ dɩ́ lwarɩ.
Kweelim taanɩ
9 Kʋlʋ na wǝli da tɩn mʋ yɩ: Wɛ kwərə-tu dɛɛn jɩgɩ swan lanyɩranɩ yɩ o ta yǝni o brɩ nɔɔna pa ba yiǝ pʋʋrɩ. O ma zaasɩ bɩtar-dɩndɩ sɩ o wanɩ o lwarɩ ya kuri, yɩ o daarɩ o tigisi-ya o kɩ daanɩ.c 10 Kwərə-tu wʋm ma sɩɩnɩ o yiǝ o lagɩ bɩtarbiǝ balʋ na maŋɩ tɩn, yɩ o tɔgɩ cɩga baŋa o pʋpʋnɩ taanɩ dɩlʋ na yɩ cɩga cɩga tɩn.
11 Swan tu ni-taanɩ nyɩ dɩ nacəgə mʋ nayɩrʋ na jɩgɩ o yɩrɩ o vara. Kʋ tu zaasɩm dɩm nyɩ dɩ cɩna yalʋ na fɔgɩ ya cwi daa yɩra nɩ tɩn mʋ. Ya maama nuŋi nayɩrʋ dɩdʋad tee nɩ mʋ.
12 Amʋ bu, kʋlʋ ta na wǝli da tɩn mʋ maŋɩ sɩ n ta n ye n tɩtɩ dɩ wǝǝnu tɩntʋ: nmʋ na kwaanɩ n pʋpʋnɩ swan taana n tiŋi, n tɩtʋŋa yam bá ti. Nmʋ na tiini n zaasɩ wǝǝnu zanzan, kʋʋ́ bugi n yɩra mʋ.