10
Nanjʋ-tʋʋ na tʋ tralɩ nugə nɩ,ka wʋ́ pɔ mʋ ka lwe.
Kʋntʋ doŋ mʋ nɔɔnʋ jwərim fɩnfɩɩn wʋ́ cɔgɩ swan zanzan.
2 Swan tu wʋbʋŋa paɩ
o yɔɔrɩ cwǝŋǝ mʋ.
Joro wʋbʋŋa nan paɩ
o tʋŋɩ gweeni mʋ.
3 O na kwe cwǝŋǝ o maa veǝ,
o brɩ o tɩtɩ jaja nɩ
o yɩ joro mʋ,
o na tiini o ga wʋbʋŋa tɩn ŋwaanɩ.
4 Pɛ wʋm banɩ na zaŋɩ nmʋ baŋa nɩ, yɩ zaŋɩ n nuŋi o tee nɩ. Nmʋ na jaanɩ n wʋʋ, kʋ laan wʋ́ pa o ban-lʋm dɩm zuri.
5 Amʋ nan maanɩ wo-cɛɔ kʋdoŋ mʋ lʋgʋ baŋa nɩ, nɩ pɛ na kɩ o cɔgɩ te tɩn. 6 Jwəəru mʋ yǝni tɩ jiri yigǝ tiinǝ. Nadunəa dɩ maa wʋ kwaga kwaga. 7 Amʋ ta ma na gambɛ na dɔgɩ siseŋ-nɔɔna baŋa nɩ te tɩn, yɩ kʋ daarɩ nakwa ve tɩga nɩ.
8 Wʋlʋ na kʋgɩ goŋo,
kʋ tu wʋ́ wanɩ o joori
o tʋ kʋ wʋnɩ.
Wʋlʋ nan na yarɩ kəbrə
o dɩ tɩga nɩ,
bɩsankwɩa wʋ́ wanɩ ka tɔgɩ dáanɩ ka dʋn‑o.
9 Wʋlʋ na yarɩ kandwa piu yɩra nɩ,
kʋ tu wʋ́ wanɩ o na zʋnnɩ
ya baŋa nɩ.
Nɔɔnʋ wʋlʋ nan na lɔɛ dɛ,
o dɩ waɩ o naɩ zʋnnɩ tɩ baŋa nɩ.
10 Tɩntʋŋnʋ dooru na ba jɩgɩ ni,
yɩ o na wʋ dwəri‑kʋ,
o tɩtʋŋa wʋ́ taa camma mʋ.
Swan nan wʋ́ pa nɔɔnʋ tɩtʋŋa
taa kɩ lanyɩranɩ.
11 Nɔɔnʋ na jɩgɩ liri sɩ o ma
o ja bɩsankwɩa,
yɩ ka na wuuri ka dʋn‑o,
bɛɛ nyɔɔrɩ mʋ liri tu wʋm wʋ́ na kʋ baŋa nɩ?
12 Swan tu ni-taanɩ wʋ́ pa‑o zulə mʋ.
Joro ni-taanɩ nan wʋ́ cɔg-o mʋ fasɩ.
13 Kʋ tu na puri o ni,
jwərim yɩranɩ mʋ o ŋɔɔna.
O ni-taanɩ dɩm yǝni dɩ kweeli
dɩ vuvugə yɩranɩ.
14 Joro yǝni o ŋɔɔnɩ ta-fara mʋ
o ba kwǝrǝ.
Nɔɔn-nɔɔnʋ nan yǝri kʋlʋ
jwa na wʋ́ kɩ tɩn.
Wɔɔ mʋ wʋ́ wanɩ o brɩ dɩbam
kʋlʋ na wʋ́ kɩ dɩ́ tʋʋnɩ
kwaga nɩ tɩn?
15 Joro tɩtʋŋ-cɛɛra paɩ
o yɩra cɛ mʋ.
O nan maŋɩ o yǝri cwǝŋǝ kalʋ
o na wʋ́ tɔgɩ
sɩ o vu o yi tɩʋ kʋm wʋ tɩn.
16 Lɛɛrʋ wʋ́ yi tɩʋ kʋlʋ pɛ na yɩ nɔn-dʋŋʋ yɩ o wʋ lwarɩ swan,
yɩ kʋ nakwa yɔɔrɩ ba di wʋdi-fɔrɔ zɩzɩŋa maama nɩ tɩn mʋ.
17 Kʋ daarɩ yu-yoŋo mʋ wʋ́ yi tɩʋ kʋlʋ pɛ ba na lʋgɩ nadunə dwi wʋnɩ,
yɩ kʋ nakwa jaanɩ ba tɩtɩ sɩ ba di wʋdiu kʋ maŋa nɩ tɩn.
Ba yazurə ŋwaanɩ mʋ ba di wʋdiu,
yɩ ba ba nyɔ sana ba sui.
18 Nɔɔnʋ yawɔrɔ mʋ paɩ
o digə tʋ ka vin.
O na wʋ kwǝni o digə lulogo,
ka wʋ́ taa lurə mʋ taan.
19 Dɩ́ yǝni dɩ́ saŋɩ wʋdiu sɩ kʋ pa ywəəni taa wʋra.
Sana dɩ maa paɩ dɩ́ jɩgɩ wʋpolo dɩ́ ŋwɩa wʋnɩ.
Səbu nan na tǝri nɔɔnʋ tee nɩ,
tɩntʋ maama warɩ tɩ kɩ.
20 Yɩ zaŋɩ n sɔɔlɩ lwarɩm n daŋɩ
pɛ wʋm yuu nɩ,
kʋ na maŋɩ kʋ yɩ n tɩtɩ wʋbʋŋa wʋnɩ mʋ dɩ.
Ta yɩ sɔɔlɩ lwarɩm n pa nadunə,
kʋ na maŋɩ kʋ yɩ n tɩtɩ digə nɩ mʋ n tagɩ ba taanɩ dɩ.
Nmʋ na kɩ kʋntʋ,
zuŋə wʋ́ ja n taanɩ dɩm
ka vu ka ta ka brɩ-ba jaja.b