Nɔɔnʋ maama gurim je yɩ bɩdwɩ
9
Amʋ nan sɩɩnɩ yiǝ a bʋŋɩ wǝǝnu tɩntʋ maama wʋnɩ sɩ a lwarɩ tɩ na yɩ te tɩn. A ma lwarɩ nɩ nɔn-ŋʋna dɩ swan tiinə dɩ ba kikiə maama wʋ Wɛ jɩŋa nɩ mʋ. Nɔɔn-nɔɔnʋ nan yǝri kʋlʋ na wʋ yigə nɩ tɩn, nɩ kʋ na wʋ́ taa jɩgɩ sono naa kʋʋ́ taa jɩgɩ dʋnʋ kʋ pa‑o. 2 Kʋʋ́ taa yɩ bɩdwɩ kʋ pa nɔɔnʋ maama. Nabiinǝ maama lagɩ ba guri bɩdwɩ mʋ, nɩ kʋ na yɩ nɔn-ŋʋna dɩ nɔn-balwaarʋ, naa balʋ na maŋɩ dɩ Wɛ cullu tɩm tɩn dɩ balʋ na wʋ maŋɩ tɩn, naa balʋ na kɩ kaanɩm ba pa Wɛ tɩn dɩ balʋ na ba kɩ-dɩ tɩn maama. Nɔn-ŋʋna dɩ lwarɩm-kərə gurim yɩ bɩdwɩ mʋ, kʋ ta wǝli dɩ balʋ na goni ni dɩ Wɛ tɩn, dɩ balʋ na vɩn sɩ ba kɩ kʋntʋ tɩn. 3 Kʋ na kɩ te lʋgʋ baŋa nɩ kʋntʋ tɩn yɩ wo-cɛɔ mʋ, dɩ nɔɔna maama gurim na yɩ bɩdwɩ te tɩn. Nabiinǝ bɩcara nan yɩ lwarɩm yɩranɩ mʋ. Ba ta na ŋwɩ tɩn, vuvugə mʋ su ba wʋbʋŋa. Kʋ kwaga nɩ ba laan ma tɩ.4 Wʋlʋ nan ta na ŋwɩ lʋgʋ baŋa nɩ, tɩɩna wʋ kʋ tu tee nɩ mʋ. «Kakurə kalʋ na ŋwɩ tɩn garɩ nyoŋo kʋlʋ na tɩgɩ tɩn.» 5 Cɩga ŋwaanɩ tɩn, balʋ ta na ŋwɩ tɩn ye nɩ baá ba ba tɩ. Kʋ nan na yɩ twa bam, ba yǝri kʋlʋkʋlʋ ni nɩ. Nyɔɔrɩ daa tǝrǝ sɩ ba joŋi, yɩ nɔɔna maŋɩ ba swe ba swiə mʋ. 6 Ba na soe wǝǝnu te tɩn, dɩ ba na culi-tɩ te tɩn, dɩ ba fra na wʋ wǝǝnu baŋa nɩ te tɩn laan je mʋ fasɩ. Ba daa ba jɩgɩ tɩtʋŋɩ lʋgʋ baŋa nɩ sɩ ba tɔgɩ ba kɩ.
Ywəəni dim taanɩ
7 Nan ta n jɩgɩ ywəəni n di wʋdiu, sɩ n daarɩ n nyɔ dɩvɛn dɩ wʋpolo. Bɛŋwaanɩ, Wɛ yi maŋɩ dɩ su n kikiə yam kʋntʋ. 8 Kwɛ n tɩtɩ sɩ n yǝni n zʋ gwar-pwǝǝnu, sɩ n daarɩ n turi n yuu dɩ nugə. 9 Ta n soe n kaanɩ sɩ á taá di ywəəni daanɩ n ŋwɩa da yam na yɩ kukugə tɩn maama wʋnɩ. Mʋ pɛɛrɩ dɩlʋ Wɛ na pɛ‑m lʋgʋ baŋa nɩ, sɩ n wanɩ n di ywəəni n tɩtʋŋ-cɛɛra yam baŋa nɩ tɩn. 10 Tɩtʋŋɩ dɩlʋ maama n na jɩgɩ n tʋŋa, sɩ n tʋŋɩ-dɩ dɩ n dam maama.a Bɛŋwaanɩ, curu nɩ, ba ba tʋŋa, ba nan ba bʋŋɩ wʋbʋŋa naa ba jɩgɩ yǝno, yɩ ba ta ba beeri swan dáanɩ. Nmʋ nan lagɩ n vu dáanɩ mʋ.
N bá wanɩ n cɩ n tɩtɩ dɩ cam
11 Amʋ daa ta tu a maanɩ tɩntʋ mʋ lʋgʋ baŋa nɩ:
Kʋ daɩ nɩ balʋ na duri lɩla lɩla tɩn mʋ wʋ́ di yigə durim kanyiŋə kam nɩ.
Kʋ daɩ nɩ nɔn-babɛ mʋ wʋ́ di najara yam.
Kʋ nan daɩ swan tiinə mʋ naɩ ba ni-wʋdiu.
Kʋ ta daɩ yi-pʋrɩ-nyɩna mʋ yɩ nadunə,
yɩ kʋ daɩ nɔn-yum mʋ na yigə-vəŋə.
Kʋ nan na yɩ te kʋ paɩ ba maama tɩn, kǝm maama wʋ́ kɩ kʋ maŋa nɩ mʋ. 12 Bɛŋwaanɩ, nɔɔn-nɔɔnʋ yǝri maŋa kalʋ tʋʋnɩb na wʋ́ ja-o tɩn. Kʋ nyɩ dɩ ba na kwe bʋra ba ma ja kale te tɩn, naa ba na jaanɩ zunə cɩkʋ wʋnɩ te tɩn mʋ. Tʋʋnɩ dɩ yǝni dɩ da dɩ yi nabiinǝ mʋ maŋa kalʋ na wʋ maŋɩ tɩn wʋnɩ.c
Swan garɩ dam
13 Amʋ ta ma maanɩ woŋo kʋdoŋ lʋgʋ baŋa nɩ na yɔɔrɩ kʋ brɩ-nɩ swan na yɩ te tɩn.
14 Tʋ-balaŋa dɛɛn mʋ wʋra yɩ kʋ nɔn-biə yɩ fɩnfɩɩn yɩranɩ. Pa-kamunu ma la o jar-kərə o vu sɩ o zaŋɩ najara dɩ ba. Pɛ wʋm ma pa ba kaagɩ tɩʋ kʋm ba pu, sɩ ba daarɩ ba lɔ taala ba salɩ kʋ kabri sɩm təŋə sɩ ba wanɩ ba zʋ kʋ wʋnɩ. 15 Yinigə tu maa wʋra tɩʋ kʋm wʋnɩ o na jɩgɩ swan. Wʋntʋ ma tɔgɩ o swan yam baŋa nɩ o joŋi-kʋ o yagɩ. Kʋ kwaga seeni nan nɔɔn-nɔɔnʋ wʋ guli yinigə tu wʋm gulə. 16 Kʋntʋ mʋ pɛ a lwarɩ nɩ: swan lana ya garɩ dam. Nɔɔnʋ nan na yɩ yinigə tu yɩ o jɩgɩ swan, nɔɔna wʋ́ gooni o swan yam mʋ. Ba ba yǝni ba sɛ kʋ tu ni-taanɩ.d
Swan dɩ jwərim taanɩ
17 Swan tu na ŋɔɔnɩ tɩga tɩga
yɩ n cəgi o ni-taanɩ,
kʋntʋ jɩgɩ kuri kʋ garɩ
pɛ na bagɩ dɩ kwǝr-dɩa
o brɩ nɔn-jwəəru.
18 Swan lana ya dwe najara zɩla.
Lwarɩm-kəru dɩdʋa nan waɩ
o cɔgɩ wo-laarʋ zanzan
na maŋɩ tɩ tigi tɩn.