Sɛ pɛ wʋm ni-taanɩ
8
Wɔɔ mʋ sɩɩnɩ o yɩ swan tu cɩga cɩga?Wɔɔ mʋ waɩ wǝǝnu kuri o lwara?
Swan paɩ nɔɔnʋ yigə poli mʋ,
yɩ yi-nywana daa ba jɩg-o.
2 Ta n ye sɩ n sɛ Pɛ wʋm ni, nmʋ na goni ni Wɛ yigə nɩ mʋ nɩ: nń kɩ kʋntʋ tɩn ŋwaanɩ.a 3 Yɩ lɔgɩrɩ n nuŋi da Pɛ wʋm tee nɩ. Yɩ tɔgɩ dɩ balʋ na bʋŋɩ sɩ ba nuŋi o kwaga nɩ tɩn, Pɛ wʋm na waɩ o kɩ kʋlʋ maama o na lagɩ tɩn ŋwaanɩ. 4 Bɛŋwaanɩ, Pɛ wʋm ni-taanɩ tiini dɩ jɩgɩ dam mʋ yɩ nɔɔn-nɔɔnʋ warɩ sɩ o bwe‑o o wɩ: «Bɛɛ mʋ yɩ n kɩ kʋntʋ?» 5 Wʋlʋ nan na tʋŋɩ o tɔgɩ Pɛ wʋm ni, kʋntʋ tu bá zʋ cam wʋnɩ. Swan tu yǝni o lwarɩ maŋa kalʋ na maŋɩ kǝm, dɩdaanɩ cwǝŋǝ kalʋ kǝm dɩm na wʋ́ tɔgɩ tɩn mʋ.
6 Bɛŋwaanɩ, woŋo maama
jɩgɩ kʋ maŋa mʋ,
yɩ kʋ dɩ jɩgɩ kʋ cwǝŋǝ mʋ
sɩ kʋ tʋŋɩ.
Lɛɛrʋ nan yǝni tɩ tui nabiinǝ baŋa.
7 Dɩ́ bá wanɩ dɩ́ lwarɩ kʋlʋ
na wʋ́ kɩ tɩn cɩga cɩga,
Nɔɔn-nɔɔnʋ maa tǝrǝ sɩ o ta
jwa na wʋ́ taa yɩ te tɩn
o brɩ dɩbam.
8 Nɔɔn-nɔɔnʋ warɩ viu sɩ o ja.
Nɔɔn-nɔɔnʋ warɩ o tʋʋnɩ dɛ dɩm sɩ o cɩ.
Nɔɔn-nɔɔnʋ warɩ sɩ o lɩ o tɩtɩ najara kǝm wʋnɩ.
Nmʋ na tʋŋɩ lwarɩm kikiə,
ya bá wanɩ ya joŋi‑m ya yagɩ.
9 Amʋ na sɩɩnɩ a yiǝ a zaasɩ wǝǝnu tɩm kʋntʋ maama tɩn, mʋ a maanɩ kʋlʋ maama na jɩgɩ kʋ kɩ lʋgʋ baŋa nɩ tɩn. A ma na nɩ maŋa dɩ maŋa nɔɔnʋ waɩ o te o donnǝ dɩ dam pa ba maamab yaarɩ.
Dɩ́ warɩ dɩ́ lwarɩ Wɛ cwe sɩm
10 A ta nɛ nɔn-balwaarʋ na tɩgɩ yɩ ba kɩ ba luə dɩ zulə tɩn. Bantʋ ya yǝni ba ve Wɛ digə kam, yɩ nɔɔna te-ba tɩʋ kʋlʋ wʋnɩ ba na kɩ ba kǝm-balwaarʋ da tɩn. Kʋ maama ba jɩgɩ kuri. 11 Nɔɔna nan na yǝni ba kɩ lwarɩm yɩ ba wʋ waarɩ-ba lɩla, kʋntʋ pa nabiinǝ yɔɔrɩ ba lagɩ sɩ ba dɩ taa tʋŋɩ lwarɩm kikiə mʋ. 12 Cɩga tɩn, lwarɩm-kərə wʋ́ wanɩ ba tʋŋɩ lwarɩm kuni bi mʋ yɩ ba ta yɔɔrɩ ba kwɩn ba ja gaalɩ. Amʋ nan ye nɩ: «Nmʋ na kwarɩ Wɛ, wǝǝnu wʋ́ yɔɔrɩ cwǝŋǝ tɩ pa‑m, nmʋ na zuli‑DƖ tɩn ŋwaanɩ.» 13 Amʋ ta ye nɩ: «Nɔn-balwaarʋ wǝǝnu bá da cwǝŋǝ. Ba ŋwɩa nyɩ dɩ nɔɔnʋ lunluŋu na bá daanɩ yɩ kʋ je tɩn mʋ. Bantʋ bá kwɩn ba kɛ, ba na ba kwarɩ Wɛ tɩn ŋwaanɩ.»
14 Woŋo kʋdoŋ maa wʋra lʋgʋ baŋa nɩ yɩ a bá wanɩ a lwarɩ kʋ kuri. A maanɩ nɩ nɔn-ŋʋna wʋra yɩ kʋ kɩ-ba nɩnɛɛnɩ ba ga yɩ nɔn-balwaarʋ mʋ te. Kʋ ta daarɩ yɩ kʋ kɩ nɔn-balwaarʋ nɩnɛɛnɩ kʋ ya na maŋɩ sɩ nɔn-ŋʋna na te tɩn mʋ. Amʋ tee nɩ, kʋntʋ maama ba jɩgɩ kuri.
Ywəəni dim taanɩ
15 Amʋ nan wʋ́ ta nɩ: dɩ́ maŋɩ sɩ dɩ́ di ywəəni mʋ dɩ́ ŋwɩa kantʋ wʋnɩ. Kʋlʋkʋlʋ daa tǝrǝ lʋgʋ baŋa nɩ kʋ na lana kʋ paɩ nabiinǝ tɩn, kʋ na daɩ dɩ́ na wʋ́ taa di wʋdiu, yɩ dɩ́ nyɔa, yɩ dɩ́ di ywəəni tɩn yɩranɩ. Nɔɔnʋ na kɩ kʋntʋ mʋ yɩ o tʋŋɩ o tɩtʋŋa, kʋʋ́ zən‑o o ŋwɩa wʋnɩ, nɩ Wɛ na pɛ o taa yɩ te lʋgʋ baŋa nɩ tɩn.
16 Amʋ sɩɩnɩ a yiǝ mʋ sɩ a lwarɩ swan cɩga cɩga na yɩ te tɩn, sɩ a daarɩ a maanɩ tɩtʋŋɩ dɩlʋ maama na jɩgɩ dɩ kɩ lʋgʋ baŋa nɩ tɩn. Dɔɔm maa ba tui a yiǝ nɩ, wɩa dɩdaanɩ tɩtɩ maama nɩ. 17 Amʋ laan ma maanɩ Wɛ na kɩ te tɩn maama. Nɔɔnʋ na maŋɩ o kwaanɩ te maama sɩ o ni kʋ kuri, o bá lwarɩ kʋlʋ maama na kɩ lʋgʋ baŋa nɩ tɩn kuri. O na maŋɩ o yɩ swan tu yɩ o brɩ nɩ o ye kʋ kuri, o nan ta yǝri.