Bɛɛ mʋ lana kʋ paɩ nabiinǝ?
7
Nɔɔnʋ na beeri yɩrɩ-ŋʋm,kʋntʋ lana kʋ pa‑o
kʋ garɩ tralɩ nugə na tiini ka lana tɩn.
Nabiinu tʋʋnɩ dɛ maa garɩ
o lʋra dɛ dɩm.
2 Nmʋ nan na ve luə sɔŋɔ,
kʋntʋ lana kʋ pa‑m
kʋ garɩ n na ve sɔŋɔ kʋlʋ wʋnɩ
ba na di candiə tɩn.
Tʋʋnɩ maa yɩ nɔɔnʋ maama gurim je.
Kʋ maŋɩ sɩ balʋ ta na ŋwɩ tɩn
yɩ swe tʋʋnɩ ni nɩ.
3 Nmʋ wʋ na cɔgɩ,
kʋntʋ garɩ n na su dɩ mwaanʋ.
Bɛŋwaanɩ, yi-nywana waɩ ya paɩ
n bɩcarɩ mʋ fɔgɩ lanyɩranɩ.a
4 Swan tu yǝni o bʋŋɩ luə wʋbʋŋa mʋ.
Joro fra nan zʋʋrɩ je sɩlʋ
mwaanʋ na wʋ mɛ tɩn wʋnɩ mʋ.
5 Nmʋ na sɛ swan tu na bwɛ nmʋ te tɩn,
kʋntʋ lana kʋ pa‑m
kʋ garɩ nɔn-jwəəru na wʋ n tee nɩ,
yɩ ba leeni ba zuli nmʋ.
6 Joro na puri mwaanʋ,
kʋ nyɩ dɩ sabarɩ na tʋ mim wʋnɩ
yɩ sɩ bagɩ yɔɔ te tɩn mʋ.
Kʋntʋ dɩ ba jɩgɩ kuri.
7 Swan tu na jigi kampin-nyɩm,
o dɩ laan yɩ joro mʋ.
Nɔɔnʋ wʋlʋ maa na joŋi dim,
kʋ tu kǝm dɩm wʋ́ cɔgɩ o wʋbʋŋa mʋ.
8 Tɩtʋŋɩ gurim mʋ garɩ
dɩ pulim je.
Nɔɔnʋ na waɩ o jaanɩ o tɩtɩ bɩcarɩ,
kʋntʋ garɩ o na brɩ o tɩtɩ kamunni.b
9 Kwaanɩ sɩ n ta n waɩ
n banɩ n jaana.
Balʋ na paɩ ba ban-lʋm daanɩ tɩn
yɩ nɔn-jwəəru mʋ.
10 Yɩ zaŋɩ n bwe nɩnɛɛnɩ,
«Bɛɛ mʋ kɩ yɩ faŋa kam garɩ lele?»
Bwiə yam kʋntʋ nan ba tɔgɩ
swan wʋbʋŋa!
11 Swan mʋ lana ya paɩ nɔɔnʋ,
nɩnɛɛnɩ o ko na tiŋi jɩjɩgɩrʋ tɩlʋ sɩ o pa‑o tɩn.
Swan jɩgɩ nyɔɔrɩ ya paɩ
balʋ maama na ŋwɩ tɩn.
12 Swan wʋ́ pa n na woro mʋ
sɩ kʋlʋkʋlʋ yɩ yi‑m,
nɩnɛɛnɩ səbu dɩ na kwǝli nɔɔnʋ kuri te tɩn.
Nmʋ nan na lwarɩ swan,
kʋ tiini kʋ jɩgɩ nyɔɔrɩ mʋ kʋ pa‑m,
nmʋ na wʋ́ fɔgɩ n na ŋwɩa
kʋ baŋa nɩ tɩn ŋwaanɩ.
13 Nan maanɩ Wɛ na kɩ te maama tɩn n nii!
Wɛ na pɛ woŋo kʋlʋ gugwǝli,
wɔɔ mʋ wʋ́ wanɩ o twɩ-kʋ?
14 Wǝǝnu na tɔgɩ cwə-laa tɩ pa‑m,
sɩ n ta n jɩgɩ wʋpolo.
Tɩ nan daa na ve gweeni,
sɩ n maanɩ nɩ Wɛ mʋ paɩ
sɩ lanyɩranɩ dɩ cam tui,
pa nabiinǝ yǝri kʋlʋ jwa
na wʋ́ kɩ kʋ pa-ba tɩn.
Amʋ bá wanɩ a lwarɩ wǝǝnu kuri a ti
15 Amʋ maanɩ wǝǝnu dwi dwi zanzan a ŋwɩa wʋnɩ, yɩ a lwarɩ tɩ kuri a ga. Nɔn-ŋʋm wʋra yɩ o wuuri o tɩ dɩ o na maŋɩ o tɔgɩ cɩga te tɩn. Nɔn-balɔrɔ dɩ maa wʋra o na yɔɔrɩ o kwɩn o ja gaalɩ yɩ o ta tʋŋɩ lwarɩm. 16 Yɩ tiini n brɩ n tɩtɩ nɩ n yɩ nɔn-ŋʋm, naa n brɩ n swan dɩ. Nmʋ bʋŋɩ sɩ n cɔgɩ n tɩtɩ mʋ na? 17 Nmʋ ta yɩ yɔɔrɩ n ta n kɩ lwarɩm, naa sɩ n ta n tʋŋɩ jwərim. Nmʋ bʋŋɩ sɩ n wuuri n tɩ mʋ na? 18 Kʋ nan lana sɩ n tɔgɩ cwe sɩle sɩm kʋntʋ. Bɛŋwaanɩ, nmʋ na kwarɩ Wɛ n wǝǝnu wʋ́ kwɛ mʋ sɩ maama wʋnɩ.
19 Swan tu yǝni o naɩ dam o swan ŋwaanɩ, sɩ kʋ dwǝni dɩdɛɛra fugə na nii ba tɩʋ baŋa nɩ.
20 Nɔɔn-nɔɔnʋ tǝrǝ lʋgʋ baŋa je maama nɩ o na yɔɔrɩ o kɩ cɩga, yɩ o ba fɔgɩ o kɩ lwarɩm.
21 Yɩ yɔɔrɩ n sɛ kʋlʋ maama nɔɔna na wʋ́ ta tɩn. N waɩ n ni nɩ n tɩntʋŋnʋ mʋ jɩgɩ-m o twɩa. 22 Bɛŋwaanɩ, nmʋ tɩtɩ ye nɩ n maŋɩ n twɩ n donnǝ kuni zanzan mʋ.
23 Amʋ ma kwaanɩ sɩ a tɔgɩ swan ŋwaanɩ a lwarɩ wǝǝnu tɩm kʋntʋ maama na yɩ te tɩn. A wʋbʋŋa ma ja sɩ a joŋi swan. Amʋ nan maanɩ nɩ kʋ kuri cana kʋ dwe sɩ a lwarɩ. 24 Woŋo kʋlʋ maama na wʋra tɩn kuri nim tiini kʋ cana mʋ. Nɔɔn-nɔɔnʋ bá wanɩ o lwarɩ tɩ kuri.
25 Amʋ wʋbʋŋa laan ma ja sɩ a zaasɩ yǝno yɩ a vɛɛsɩ wǝǝnu wʋnɩ a nii sɩ a ja swan, sɩ a wanɩ a lwarɩ wǝǝnu na yɩ te tɩn. Amʋ ta maa lagɩ sɩ a lwarɩ bɛŋwaanɩ mʋ lwarɩm kikiə yɩ jwərim yɩranɩ, yɩ jwərim kikiə yɩ cicooru mʋ. 26 Amʋ nan ta maanɩ nɩ: kaanɩc wʋlʋ na lagɩ o ja‑m nɩ o yɩ cɩkʋ tɩn mʋ cana o dwe tʋʋnɩ. O maa kwaanɩ o kukwəri‑m nɩ o na kwe cɩgɩrʋ o ma vɔ‑m te tɩn. Balʋ nan na kɩ ba sui Wɛ yi tɩn wʋ́ lu o jɩŋa nɩ. O nan wʋ́ yɔɔrɩ o ja lwarɩm-kərə mʋ.
27 Amʋ wʋlʋ na yɩ Wɛ kwərə-tu tɩn wɩ: «Nii-na amʋ na vɛɛsɩ wǝǝnu wʋnɩ mʋ fɩɩn fɩɩn sɩ a laan ba a lwarɩ wǝǝnu na yɩ te tɩn. 28 A nan na kwaanɩ a beeri maama tɩn, a gɛ kʋ ŋwa mʋ. Amʋ na beeri baara mʋrʋ tɩtarɩ nɩ tɩn, mʋ a nɛ baarʋ dɩdʋa na tɔgɩ cɩga. Kʋ daarɩ a wʋ nɛ kaanɩ bantʋ maama wʋnɩ, dɩ dɩdʋa dɩ! 29 Woŋo kʋlʋ yɩranɩ amʋ na tu a lwarɩ mʋ tɩntʋ: Wɛ kɩ nabiinǝ pa ba yɔɔrɩ ba tɔgɩ cwǝŋǝ mʋ. Ba laan nan mʋ pɛ vuvugə tui.»