Jɩjɩgɩrʋ paɩ ywəəni na?
6
Amʋ nan ta maanɩ wo-cɛɔ kʋdoŋ mʋ lʋgʋ baŋa nɩ, yɩ kʋ daanɩ nabiinǝ je maama nɩ. 2 Wɛ waɩ DƖ pa nɔɔnʋ duuni, dɩ jɩjɩgɩrʋ, dɩ zulə, pa kʋ tu jɩgɩ kʋlʋ maama na jɩgɩ o fra tɩn, yɩ DƖ waɩ DƖ vanɩ kʋ tu cwǝŋǝ sɩ o yɩ di-tɩ. Nɔn-gaa mʋ wʋ́ ba o di tɩ ywəəni. Kʋntʋ maama tiini kʋ yɩ wo-cɛɔ. A bá wanɩ a lwarɩ kʋ kuri.3 Nɩnɛɛnɩ nɔɔnʋ na kwɩn o ja gaalɩ yɩ o lʋ biə bi, kʋ tu na maŋɩ o ŋwɩ taan, yɩ o na wʋ di ywəəni o jɩjɩgɩrʋ tɩm baŋa nɩ, bu-tʋʋ wʋlʋ ba na lʋgɩ zɩm tɩn ta gar-o. 4 Bɛŋwaanɩ, ba na lʋgɩ bu-tʋʋ, dɩ́ bá wanɩ dɩ́ lwarɩ kʋ kuri. O tuǝ yɩ o daarɩ o joori lɩla. O yɩrɩ maŋɩ dɩ wʋ bəŋi. 5 Bu wʋm kʋntʋ ta wʋ fɔgɩ o na wɩa pooni. O nan wʋ lwarɩ ŋwɩa na yɩ te tɩn. Dɩ kʋntʋ dɩ, o ta nɛ siun o dwǝni nadum wʋm kʋntʋ, 6 kʋ fɔgɩ kʋ daɩ nɔɔnʋ wʋm ŋwɩa na yi bɩna mʋrrʋ tɩle yɩ o wʋ di ka ywəəni. Ba maama kweelim yɩ bɩdwɩ mʋ. Kʋ daɩ kʋntʋ na?
7 Nabiinǝ tɩtʋŋa maama yɔɔrɩ ya yɩ ba ni-wʋdiu ŋwaanɩ mʋ. Ba nan ba fɔgɩ ba naɩ sɩ kʋ yi-ba. 8 Swan tu wʋ́ na nyɔɔrɩ o dwǝni joro na? Nabwəm dɩ na ye o na wʋ́ taa jaanɩ o tɩtɩ nɔɔna yiǝ nɩ te tɩn, bɛɛ nyɔɔrɩ mʋ o jɩga?
9 «Nɔɔnʋ yi na su dɩ kʋlʋ maama
o na jɩgɩ tɩn,
kʋntʋ garɩ o na pɛ o fra
zʋ wo-gaa wʋnɩ.»
Kʋntʋ dɩ cana sɩ dɩ́ lwarɩ kʋ kuri. Kʋ nyɩ dɩ nɔɔnʋ na duri o zəli viu sɩ o ja-kʋ te tɩn mʋ.
10 Kʋlʋ maama zɩm na wʋra tɩn mʋ, Wɛ maŋɩ DƖ tigisi-kʋ sɩ kʋ taa jɩgɩ kʋ yɩrɩ. Nabiinu dɩ ye o ŋwɩa cwǝŋǝ na yɩ te tɩn. O bá wanɩ o dwəni dɩ wʋlʋ na dana o dwe‑o tɩn. 11 Bɛŋwaanɩ, nɔɔnʋ na tiini o ŋɔɔnɩ zanzan, vuvugə wʋ́ tiini ka tɔgɩ da mʋ. Bɛɛ nyɔɔrɩ mʋ o lagɩ o na o ŋwaŋa kam baŋa nɩ? 12 Bɛŋwaanɩ, nɔɔn-nɔɔnʋ yǝri kʋlʋ na wʋ́ taa lana kʋ pa nabiinǝ ba ŋwɩa wʋnɩ, ba ŋwɩa kam na yɩ kukugə te tɩn ŋwaanɩ. Ka ta nyɩ dɩ nɔɔnʋ lunluŋu mʋ na bá daanɩ yɩ ka je tɩn. Dɩ́ bá wanɩ dɩ́ lwarɩ ka kuri. Cɩga tɩn, wɔɔ mʋ wʋ́ wanɩ o brɩ dɩbam kʋlʋ na wʋ́ kɩ dɩ́ tʋʋnɩ kwaga nɩ tɩn?