Ta n ye n na zuli Wɛ te tɩn
5
Nmʋ na yǝni n ma n zʋʋrɩ Wɛ-digə sɩ n zuli‑DƖ, sɩ n ja n tɩtɩ. Fʋfɔ n yi Wɛ te sɩ n cəgi DƖ taanɩ, sɩ kʋntʋ wʋ́ taa garɩ kaanɩm dɩlʋ jwəəru na kɩ yɩ ba yǝri nɩ ba cɔgɩ tɩn.a 2 Bʋŋɩ n yi sɩ n laan ŋɔɔnɩ n ni-taanɩ. Yɩ goni ni dɩ Wɛ yɔɔ yɔɔ yɩ n wʋ fɔgɩ n bʋŋɩ dɩ wʋnɩ. Lwarɩ lanyɩranɩ nɩ Wɛ wʋ Wɛ-sɔŋɔ nɩ mʋ yɩ nmʋ zʋʋrɩ tɩga kam baŋa nɩ. Kʋntʋ ŋwaanɩ nan pa n ni-taanɩ dɩm taa yɩ fɩnfɩɩn yɩranɩ.b 3 Wʋbʋbʋŋ-fara paɩ nɔɔnʋ dwɛ dɩndwɩa yɩ ya daan‑o mʋ. Kʋntʋ doŋ mʋ ta-farɩ zanzan paɩ nɔɔnʋ tɛ wo-jwəəru.4 Nmʋ nan na goni ni dɩ Wɛ, sɩ n kɩ lɩla n kwe-dɩ. Wɛ ba lagɩ jwəəru ni-taanɩ. Kʋntʋ ŋwaanɩ, yɔɔrɩ n kwe ni dɩlʋ n na goni tɩn. 5 Nmʋ na wʋ goni ni sɩ n kɩ woŋo, kʋntʋ garɩ n na tiŋi ni yɩ n laan kwanɩ-dɩ. 6 Yɩ pa n ni-taanɩ ja‑m dɩ zʋ lwarɩm wʋnɩ. Ta n cʋ n tɩtɩ sɩ n yɩ ta dɩ Wɛ tɩntʋŋnʋ nɩ: «Amʋ wʋ maanɩ mʋ yɩ a ta tɩntʋ.» Bɛŋwaanɩ, Wɛ banɩ waɩ dɩ zaŋɩ nmʋ baŋa nɩ n ŋwaŋa kam ŋwaanɩ yɩ DƖ daarɩ o saarɩ n tɩtʋŋa yam maama.
7 Dɩndwɩa dwi dwi wʋra. Wʋbʋŋ-yɔɔrʋ dɩ taana daga zanzan. Nmʋ nan maŋɩ sɩ n ta n kwarɩ Wɛ mʋ.
Bɛɛsɩm taanɩ
8 Nmʋ na nɛ nɩ cɩga ti tɩʋ kʋlʋ wʋnɩ, yɩ kʋ dɩdɛɛra jɩgɩ nabwənə ba bɛɛsa pa ba warɩ ba tɩtɩ sɩ ba joŋi, sɩ n yɩ pa kʋ sʋ-m. Kʋ nan na yɩ te tɩn, dɩdɛɛrʋ maama jɩgɩ o yigə tu na nii‑o tɩn. Yɩ kʋ daarɩ yigə tu maama dɩ jɩgɩ o yuutu. 9 Kʋ ya maŋɩ sɩ nɔɔnʋ maama na nyɔɔrɩ tɩga kam baŋa nɩ. Pɛ wʋm tɩtɩ maŋɩ sɩ o nii karɩ sɩm baŋa nɩ.
Jɩjɩgɩrʋ taanɩ
10 Nɔɔnʋ na tiini o lagɩ səbu, kʋ tu yi ba fɔgɩ dɩ sui dɩ o na jɩgɩ kʋlʋ tɩn. Nɔɔnʋ fra na zʋ jɩjɩgɩrʋ wʋnɩ, o ŋwɩɩrʋ ba yi‑o. Kʋ maama ba jɩgɩ kuri. 11 Nɔɔnʋ jɩjɩgɩrʋ na maɩ te tɩn, balʋ na joŋi tɩ wʋnɩ sɩ ba di tɩn dɩ gaalɩ kʋntʋ mʋ. Kʋ tu na nɛ nyɔɔrɩ dɩlʋ o jɩjɩgɩrʋ baŋa nɩ tɩn mʋ yɩ o yi na nɛ-tɩ tɩn yɩranɩ. 12 Tɩntʋŋna na tʋŋɩ taan ba ti, yɩ ba na di wʋdi-fɔrɔ naa fɩnfɩɩn yɩranɩ, ba laan waɩ ba dɔ lanyɩranɩ tɩtɩ nɩ. Kʋ nan na yɩ nadunə, ba ba yǝni ba dɔ, ba jɩjɩgɩrʋ tɩm wʋbʋŋa na yaarɩ-ba tɩn ŋwaanɩ.
13 Amʋ nan ta maanɩ wo-cɛɔ kʋdoŋ mʋ lʋgʋ baŋa nɩ. Nadum mʋ kɩ o jɩjɩgɩrʋ o kɩ daanɩ pa tɩ waɩ tɩ cɩ-o cam wʋnɩ. 14 O jɩjɩgɩrʋ tɩm laan ma je wo-cɛɔ baŋa nɩ. O na lʋgɩ bu wʋlʋ tɩn daa ta wʋ nɛ woŋo sɩ o taa te. 15 Ba na lʋgɩ bu wʋlʋ maama, kʋ tu nuŋi o nu wʋnɩ bwəri mʋ. O ŋwɩa na tu ka kweeli, o daa ta wʋ́ yagɩ lʋgʋ baŋa bwəri mʋ. O na maŋɩ o tʋŋɩ te maama, o bá ja kʋlʋkʋlʋ o wǝli da o kɛ. 16 Tɩntʋ maama yɔɔrɩ tɩ yɩ wo-cɛɔ mʋ! Nɔɔnʋ na tu lʋgʋ baŋa wʋnɩ te tɩn, kʋntʋ mʋ o maŋɩ sɩ o yagɩ-kʋ. Bɛ nyɔɔrɩ mʋ o lagɩ o na o tɩtʋŋa maama baŋa nɩ, dɩ o na tʋŋɩ sɩ o joŋi viuc yɩranɩ tɩn ŋwaanɩ? 17 O ŋwɩa maama wʋnɩ, lim dɩdaanɩ wʋ-cɔgɔ mʋ tɔg-o. O maa yɔɔrɩ o naɩ ban-zɔŋɔ, dɩ yawɩɩrʋ, dɩdaanɩ ni-kantɔgɔ yɩranɩ.
Ywəəni dim taanɩ
18 Amʋ nan maanɩ nɩ kʋ lamma sɩ dɩ́ taa di wʋdiu, yɩ dɩ́ nyɔa, sɩ dɩ́ daarɩ dɩ́ di ywəəni dɩ́ tɩtʋŋ-cɛɛra yam dɩ́ na kɩ dɩ́ lʋgʋ baŋa ŋwɩa kam wʋnɩ tɩn baŋa nɩ. Mʋ nyɔɔrɩ dɩlʋ Wɛ na paɩ dɩbam tɩn. 19 Kʋ ta na yɩ Wɛ na paɩ balʋ duuni dɩ jɩjɩgɩrʋ tɩn, DƖ ta pa-ba pwələ sɩ ba di ywəəni tɩ baŋa nɩ, sɩ ba joŋi ba ŋwɩɩrʋ tɩm kʋntʋ yɩ ba tʋŋɩ ba tɩtʋŋ-cɛɛra yam dɩ wʋpolo. Kʋntʋ maama yɩ Wɛ pɛɛrɩ mʋ. 20 Nɔɔnʋ nan ba maŋɩ sɩ o fɔgɩ o jeeli o ŋwɩa da yam na yɩ te tɩn, Wɛ na paɩ o yɔɔrɩ o na wʋpolo o tɩtʋŋa yam baŋa nɩ tɩn ŋwaanɩ.