Bɛɛsɩm dɩ yaara taanɩ
4
Amʋ daa ta ma maanɩ nabwənə na tiini ba naɩ bɛɛsɩm lʋgʋ baŋa je maama nɩ te tɩn. Ba maa keeri zanzan yɩ nɔɔn-nɔɔnʋ tǝrǝ o na wʋ́ wanɩ o wǝli-ba sɩ o ganɩ ba wʋrʋ. Balʋ na jɩgɩ-ba ba bɛɛsɩ tɩn tiini ba dana lanyɩranɩ mʋ. Kʋntʋ ŋwaanɩ nɔɔn-nɔɔnʋ tǝrǝ sɩ o pa nabwənə bam bɩcarɩ zuri. 2 Amʋ laan maa bʋŋɩ nɩ: balʋ na tɩga yɩ ba daa tǝrǝ tɩn garɩ balʋ ta na ŋwɩ yɩ ba yaarɩ tɩn. 3 Kʋ nan na yɩ cɩga, balʋ ba ta na wʋ lʋgɩ tɩn yuu mʋ ywəmmə ba dwe maama, bɛŋwaanɩ bantʋ ta wʋ nɛ lwarɩm kikiə yalʋ na kaagɩ ya kɩ lʋgʋ baŋa nɩ tɩn.4 Amʋ ta maanɩ nɩ nɔɔna na yǝni ba ma dam dɩ yǝno ba tʋŋɩ te tɩn maama yɩ ba dwǝni daanɩ mʋ. Kʋ maama ba jɩgɩ kuri. Kʋ nyɩ dɩ nɔɔnʋ na duri o zəli viu sɩ o ja te tɩn mʋ.
5 Kʋ na yɩ jwəəru,
ba yǝni ba vɔ ba jɩa tɩtʋŋa baŋa nɩ mʋ.
Kana nan mʋ wʋ́ gʋ-ba.
6 Nɔɔnʋ nan na nɛ o wʋdiu bwaŋa dɩdʋa
yɩ o bɩcarɩ zuri,
kʋntʋ garɩ o na yaarɩ dɩ tɩtʋŋ-cɛɛra
sɩ o na bwɛn sɩle.
Kʋntʋ maama nyɩ dɩ nɔɔnʋ na duri o zəli viu sɩ o ja te tɩn mʋ.
Ciloŋo taanɩ
7 Amʋ daa ta ma maanɩ woŋo kʋdoŋ lʋgʋ baŋa nɩ kʋ na ba jɩgɩ kuri. 8 Amʋ nɛ nɩ nɔɔnʋ wʋdoŋ wʋra o na ba jɩgɩ fara, naa cʋrrʋ, naa biə, yɩ o laan tʋŋɩ taan o ba jǝni tɩga nɩ. O tʋŋɩ mʋ sɩ o na jɩjɩgɩrʋ yɩ o yi ba sui-tɩ. Wʋntʋ nan maŋɩ sɩ o bwe o tɩtɩ o wɩ: «Wɔɔ mʋ lagɩ o na nyɔɔrɩ a tɩtʋŋ-cɛɛra yam baŋa nɩ? Amʋ ba di ywəəni ya ŋwaanɩ.» Kʋntʋ maama dɩ ba jɩgɩ kuri. Cam yɩranɩ mʋ wʋra kʋ tu ŋwɩa wʋnɩ.
9 Bale garɩ dɩdʋa.
Bɛŋwaanɩ, baá na nyɔɔrɩ da-tee nɩ
ba tɩtʋŋa yam baŋa nɩ.
10 Ba wʋnɩ dɩdʋa na tʋa,
wʋdoŋ wʋm wʋ́ ja-o
sɩ o zaŋɩ wɛɛnɩ.
Sɩ kʋ na yɩ nɔɔnʋ dɩdʋa o yɩranɩ yɩ o tʋ,
lɛɛrʋ mʋ wʋ́ yi kʋ tu,
o doŋ na tǝrǝ sɩ o zən‑o
sɩ o zaŋɩ tɩn ŋwaanɩ.
11 Kʋ ta wǝli da, nɔɔna bale na kukwəri daanɩ,
ba yɩra wulim wʋ́ magɩ daanɩ
sɩ waarʋ yɩ yi-ba.
Nɔɔnʋ nan na yɩ o yɩranɩ,
o lagɩ o kɩ tɛ mʋ o cɩ o waarʋ?
12 Nɔɔnʋ dɩdʋa waɩ o magɩ
o doŋ wʋlʋ na zaŋɩ
o baŋa nɩ tɩn o di.
Kʋ nan na yɩ nɔɔna bale mʋ
jaŋɩ dɩd-o,
o yɩranɩ bá wanɩ o magɩ-ba o di.
Ŋʋna kalʋ na ŋʋgɩ kuni bɩtɔ tɩn ba kɔɩ mɔle-mɔlɩ.
Swan dɩ paarɩ taanɩ
13 Nɔn-dʋŋʋ na yɩ yinigə tu yɩ o jɩgɩ swan, wʋntʋ garɩ pa-dooru wʋlʋ na vɩn sɩ nɔɔna brɩ-o tɩn. 14 Nɔn-dʋŋʋ kʋm waɩ o nuŋi pɩɩna digə nɩ yɩ o laan ba o di paarɩ, naa ba lʋg-o yinigə wʋnɩ o paarɩ laŋa kam nɩ yɩ o daarɩ o ji pɛ. 15 Amʋ ta ma maanɩ nɔɔna balʋ maama na ŋwɩ lʋgʋ baŋa nɩ tɩn na kaagɩ ba kɩ te yɩ ba pɛ nɔn-dʋŋʋ wʋdoŋ kwaga ba pu. Wʋntʋ lagɩ o ba o jǝni pa-dooru wʋm jǝŋǝ je nɩ mʋ. 16 Nɔn-kɔgɔ kʋlʋ na tɔgɩ wʋntʋ kwaga tɩn tiini kʋ daga kʋ gaalɩ. Ba kwaga kam nan na tuǝ, ba wʋlʋwʋlʋ bá nɩg-o. Kʋ maama dɩ ba jɩgɩ kuri. Kʋ nyɩ dɩ nɔɔnʋ na duri o zəli viu sɩ o ja te tɩn mʋ.