Woŋo maama jɩgɩ kʋ maŋa
3
Woŋo maama lʋgʋ baŋa nɩjɩgɩ kʋ maŋa mʋ.
Maŋa tigi mʋ sɩ dɩ́ tʋŋɩ
tɩtʋŋɩ dwi maama.
2 Maŋa wʋra ba na wʋ́ lʋ nɔɔnʋ,
yɩ maŋa dɩ wʋra kʋ tu na wʋ́ tɩ.
Jərim maŋa maa wʋra
yɩ ka-gɔ-ka-yagɩ maŋa dɩ wʋra.
3 Maŋa wʋra sɩ ba gʋ nɔɔna,
yɩ maŋa wʋra sɩ ba sooni nɔɔna.
Ka-ja-ka-cɔgɩ maŋa maa wʋra,
yɩ ka-lɔ-ka-zɩge maŋa dɩ wʋra.
4 Wʋ-cɔgɔ maŋa mʋ wʋra,
yɩ mwaanʋ maŋa dɩ wʋra.
Maŋa tigi mʋ kərə ŋwaanɩ,
yɩ kadoŋ dɩ tigə wʋpolo kwɛɛra ŋwaanɩ.a
5 Maŋa wʋra mʋ sɩ ba dʋlɩ kandwa ba jagɩ ba yagɩ.
Maŋa dɩ maa wʋra sɩ ba tigisi-ya ba kɩ daanɩ.
Maŋa nan mʋ wʋra sɩ nɔɔna kukwəri daanɩ,
yɩ maŋa dɩ wʋra sɩ ba yagɩ-da kukwərim.
6 Maŋa mʋ wʋra sɩ nɔɔnʋ beeri o na woŋo.
Maŋa ta maa wʋra sɩ o ga kʋlʋ o na jɩgɩ tɩn.
Maŋa wʋra sɩ dɩ́ kwalɩmɩ wǝǝnu,
yɩ maŋa dɩ wʋra sɩ dɩ́ dʋlɩ kʋlʋ dɩ́ na jɩgɩ tɩn dɩ́ yagɩ.
7 Maŋa wʋra sɩ dɩ́ kaarɩ gwaarʋ dɩ́ yagɩ,
yɩ maŋa dɩ wʋra sɩ dɩ́ nyaanɩ-tɩ dɩ́ kɩ daanɩ.
Maŋa wʋra ka pa nɔɔnʋ sɩ o taa yɩ cɩmm,
yɩ maŋa wʋra sɩ kʋ tu ŋɔɔnɩ.
8 Maŋa ta wʋra mʋ sɩ nɔɔna taa soe daanɩ,
yɩ kadoŋ dɩ wʋra sɩ ba taa culi daanɩ.
Jara-kǝm maŋa maa wʋra,
yɩ bɩcar-zuru maŋa dɩ wʋra.
9 Nɔɔna na tiini ba tʋŋɩ te, bɛɛ nyɔɔrɩ mʋ ba nan naɩ kʋ baŋa nɩ?
Bɛɛ nyɔɔrɩ mʋ dɩ́ wʋ́ na dɩ́ ŋwɩa wʋnɩ?
10 Amʋ maanɩ Wɛ na kwe tɩtʋŋa yalʋ DƖ pa nabiinǝ sɩ ba taa tʋŋɩ tɩn. 11 Wɛ maa paɩ wǝǝnu maama kɩ lanyɩranɩ tɩ maŋa nɩ cɩga cɩga. DƖ ma kwe wʋbʋŋa yalʋ na ve taan wuu seeni tɩn DƖ kɩ nabiinǝ yuu nɩ. Kʋntʋ maama wʋnɩ nan, dɩ́ bá wanɩ dɩ́ lwarɩ DƖ na jɩgɩ kʋlʋ DƖ kɩ tɩn maama dɩ́ ti. 12 Amʋ ma maanɩ nɩ kʋlʋ na lamma kʋ paɩ nɔɔna tɩn maŋɩ sɩ ba taa jɩgɩ wʋpolo yɩ ba tɔgɩ cwə-laarʋ ba ŋwɩa wʋnɩ mʋ. 13 Kʋ maŋɩ sɩ ba taa di wʋdiu, yɩ ba nyɔa, sɩ ba daarɩ ba di ywəəni ba tɩtʋŋa yam baŋa nɩ. Kʋntʋ maama yɩ Wɛ pɛɛrɩ mʋ.
14 Amʋ maanɩ nɩ Wɛ na kɩ wǝǝnu tɩlʋ maama tɩn wʋra mʋ taan.b Dɩ́ bá wanɩ dɩ́ wǝli kʋlʋkʋlʋ DƖ kikiə yam wʋnɩ, naa dɩ́ lɩ kʋlʋkʋlʋ ya wʋnɩ dɩ́ yagɩ. DƖ pɛ kʋ taa yɩ kʋntʋ mʋ sɩ dɩ́ taa kwarɩ-DƖ. 15 Kʋlʋ zɩm na wʋra tɩn maŋɩ kʋ kɩ maŋa wʋdoŋ nɩ. Kʋlʋ na lagɩ kʋ kɩ jwa nɩ tɩn dɩ maŋɩ kʋ wʋra mʋ. Wɛ maa beeri wǝǝnu tɩlʋ na maŋɩ tɩ kɩ tɩ kɛ tɩn sɩ DƖ pa tɩ joori tɩ kɩ.
Nabiinǝ dɩ vara yɩ bɩdwɩ mʋ na?
16 Kʋlʋ na wǝli da tɩn, amʋ maanɩ kʋ na yɩ te tɩga baŋa nɩ tɩn nɩ: cɩga bʋrɩm na maŋɩ sɩ dɩ taa wʋ mɛ tɩn, lwarɩm mʋ wʋ daanɩ. Cwə-balwaarʋ mʋ ləri cwə-laarʋ yuu nɩ. 17 Amʋ ma ta a tɩtɩ nɩ a wɩ: «Maŋa na yiǝ, Wɛ wʋ́ di nɔn-ŋʋna dɩdaanɩ nɔn-balwaarʋ maama taanɩ, DƖ na maŋɩ DƖ tiŋi dɛ mʋ sɩ wǝǝnu maama dɩ kikiə maama kɩ tɩ maŋa nɩ tɩn ŋwaanɩ.»c 18 A ta ma ta nabiinǝ taanɩ a tɩtɩ nɩ a wɩ: «Wɛ yǝni DƖ maŋɩ dɩbam mʋ DƖ nii, sɩ DƖ pa dɩ́ lwarɩ nɩ dɩbam dɩ vara bam ba garɩ daanɩ. 19 Bɛŋwaanɩ, dɩbam nabiinǝ dɩ vara maama guri bɩdwɩ mʋ. Tʋʋnɩ yǝni dɩ tui dɩ jaanɩ dɩ́ maama. Nabiinǝ dɩ vara siun yɩ bɩdwɩ mʋ. Kʋntʋ tɩn, nabiinǝ ba garɩ vara. Cɩga tɩn, kʋ maama ba jɩgɩ kuri. 20 Wǝǝnu maama ŋwɩ yɩ tɩ guri bɩdwɩ mʋ. Kʋlʋ maama na ŋwɩ tɩn nuŋi tɩga kam tɩɩrʋ wʋnɩ mʋ, yɩ tɩ maama nan wʋ́ joori tɩ zʋ tɩɩrʋ wʋnɩ. 21 Wɔɔ mʋ wanɩ o lwarɩ cɩga cɩga nɩ nabiinǝ na tɩga, ba diini wɛɛnɩ mʋ, yɩ kʋ daarɩ vara na tɩga ba zʋʋrɩ tɩga kam kuri nɩ?»
22 Kʋntʋ maama wʋnɩ amʋ maanɩ nɩ kʋlʋ na tiini kʋ lana sɩ dɩ́ kɩ tɩn yɩ sɩ dɩ́ di ywəəni mʋ dɩ́ tɩtʋŋa baŋa nɩ. Mʋ nyɔɔrɩ dɩlʋ Wɛ na paɩ dɩbam tɩn. Nɔɔn-nɔɔnʋ tǝrǝ o na wʋ́ pa dɩ́ lwarɩ kʋlʋ na wʋra jwa seeni tɩn.