Wo-lʋŋʋ jɩgɩ nyɔɔrɩ na?
2
Amʋ laan ma ta a tɩtɩ nɩ a wɩ: «Amʋ wʋ́ kɩ kwɛɛra yɔɔ sɩ a maŋɩ-tɩ a nii, tɩ sɩɩnɩ tɩ lana na?»a Tɔ. A ma na nɩ kʋntʋ ba jɩgɩ kuri. 2 A ta maanɩ nɩ mwaanʋ yɩ jwərim mʋ. Kwɛɛra dɩ ba jɩgɩ nyɔɔrɩ. 3 A laan ma zʋ sa-nyɔrɩ wʋnɩ sɩ a nyɔ a su a na wʋpolo. A maa lagɩ sɩ a tɔgɩ swan ŋwaanɩ a bʋŋɩ a nii cwǝŋǝ kɔɔ mʋ jɩgɩ nyɔɔrɩ sɩ nɔɔna taa tɔgɩ-ka ba lʋgʋ baŋa ŋwɩa wʋnɩ.4 Amʋ dɛɛn kɩ tɩtʋŋ-kamunə yadonnə a pa a tɩtɩ. A lɔgɩ sam, yɩ a jəri vinyə tweeru dɩ.b 5 A ta ma cɩ gaara yɩ a jəri dwə-vɔɔrʋ, dɩ ga-punnu, dɩ tweeru tɩlʋ na ləri biə dwi dwi tɩn ya wʋnɩ. 6 A ma kʋ buli sɩ ba taa mɔɔnɩ na da ba yagɩ tweeru tɩm sɩ tɩ bɩ lanyɩranɩ. 7 Amʋ nan ta yəgi gambɛ, baara dɩ kaana, yɩ ba dɩ lʋ ba biə a sɔŋɔ wʋnɩ pa ba ji amʋ nyɩm. A ta ma na naanɩ, dɩ peeni, dɩ bʋnɩ kɔgɔ kɔgɔ sɩ a taa te. Kʋ na yɩ balʋ maama na loori yigə ba zʋʋrɩ Zeruzalɛm nɩ ba daarɩ amʋ tɩn, a vara bam daga ba dwe bantʋ nyɩm. 8 A ma na səbu dɩ səbu-sɩŋa zanzan a pa a tɩtɩ. A dɛɛn joŋi jɩjɩgɩrʋ tɩɩnɩ dɩlʋ dɩ provɛnsa yalʋ a na te tɩn pwa bam tee nɩ. A dɛɛn pɛ baara dɩ kaana taa wʋ a tee nɩ ba leeni le sɩ kʋ taa ywəmmə kʋ pa-nɩ. Kʋ maa na yɩ kaana, amʋ yɔɔrɩ a jɩgɩ-ba mʋ nɩ kʋ na wʋ́ pa nabiinǝ di ywəəni zanzan te tɩn. 9 Kʋ na yɩ balʋ dwi maama na loori yigə ba zʋʋrɩ Zeruzalɛm wʋnɩ ba daarɩ amʋ tɩn, ba wʋlʋwʋlʋ wʋ yi amʋ kamunni dɩm. Dɩ kʋntʋ maama dɩ, a ta tɔgɩ swan cwǝŋǝ kam mʋ.c
10 Kʋlʋ maama amʋ yi na pagɩ
kʋ baŋa nɩ tɩn mʋ
a yǝni a joŋi sɩ a nii
kʋ na yɩ te tɩn.
A wʋbʋŋa na jaanɩ sɩ a beeri
ywəəni dɩlʋ maama,
amʋ yǝni a tɔgɩ dɩ kwaga mʋ.
Amʋ yi ma su a na tʋŋɩ
a na kʋlʋ maama tɩn,
pa a na nyɔɔrɩ
a tɩtʋŋa yam baŋa nɩ.
11 A laan ma jǝni a jeeli
a kikiə maama,
dɩdaanɩ a tɩtʋŋ-cɛɛra
na pɛ-nɩ kʋlʋ maama tɩn.
A ma na nɩ tɩ ba jɩgɩ kuri.
Kʋ nyɩ dɩ nɔɔnʋ na duri
o zəli viu sɩ o ja te tɩn mʋ.
A tɩtʋŋa yam maama ba jɩgɩ nyɔɔrɩ
tɩga kam baŋa nɩ.
Swan dɩ jwərim taanɩ
12 Amʋ ta ma jeeli sɩ a nii swan na yɩ te tɩn cɩga cɩga, sɩ a daarɩ a lwarɩ jwərim dɩ yiyiri kikiə na yɩ te tɩn. Bɛŋwaanɩ, wʋlʋ na tu o di paarɩ tɩn maŋɩ sɩ o tɔgɩ pwa balʋ na loori‑o tɩn cwǝŋǝ kam mʋ. 13 Amʋ nan tu a maanɩ nɩ swan jɩgɩ nyɔɔrɩ ya dwe jwərim, sɩ kʋ maŋɩ dɩ pooni na garɩ lim te tɩn. 14 Cɩga tɩn,
Swan tu yiǝ waɩ ya na cwǝŋǝ.
Joro maa wʋ lim wʋnɩ o veǝ.
Dɩ kʋ maama dɩ, a maanɩ nɩ swan tiinə dɩ jwəəru lagɩ ba guri bɩdwɩ mʋ. 15 Amʋ laan ma ta a tɩtɩ nɩ a wɩ: «Tʋʋnɩ na wʋ́ ja joro tɩn, dɩ lagɩ dɩ ba amʋ dɩ baŋa mʋ. Bɛɛ nyɔɔrɩ mʋ a nan nɛ a swan yam baŋa nɩ?» A ma ləri a tɩtɩ nɩ a wɩ: «Amʋ bá wanɩ a lwarɩ kʋ kuri».
16 Swan tu dɩdaanɩ joro maama maŋɩ sɩ ba tɩ mʋ. Ba na tɩga, nɔɔna daa bá taa guli ba gulə taan. Jwa seeni baá swe dɩbam maama swiə. 17 Kʋntʋ pɛ a ŋwɩa kam ji wo-cɛɔ ka pa-nɩ. Cam yɩranɩ mʋ tu a baŋa dɩ kʋlʋ maama na yǝni kʋ kɩ tɩga baŋa nɩ tɩn. Kʋ maama ba jɩgɩ kuri. Kʋ nyɩ dɩ nɔɔnʋ na duri o zəli viu sɩ o ja te tɩn mʋ.
Tɩtʋŋ-cɛɛra taanɩ
18 A na tu a maanɩ nɩ a maŋɩ sɩ a yagɩ kʋlʋ maama a na tʋŋɩ a na tɩn a pa wʋlʋ na wʋ́ saŋɩ amʋ kwaga tɩn, kʋ ma pa tɩtʋŋ-cɛɛra yalʋ maama a na tʋŋɩ tɩga baŋa nɩ tɩn ji wo-cɛɔ ya pa-nɩ. 19 A nan warɩ sɩ a lwarɩ kʋntʋ tu wʋ́ taa yɩ swan tu mʋ naa joro mʋ. O laan maa wʋ́ ba o joŋi kʋlʋ maama a tɩtʋŋ-cɛɛra dɩ a swan na jaanɩ tɩ ba tɩ pa-nɩ tɩn, o taa te. Kʋ maama ba jɩgɩ kuri.d 20 Amʋ na jǝni a jeeli a tɩtʋŋ-cɛɛra yam maama na wʋ́ pa-nɩ nyɔɔrɩ dɩlʋ tɩn, a wʋʋ cɔgɩ ya ŋwaanɩ. 21 Bɛŋwaanɩ, dɩ́ wʋ́ kwe dɩ́ swan, dɩ dɩ́ yǝno, dɩ́ dɩ wʋbʋŋa maama, dɩ́ tʋŋɩ taan sɩ dɩ́ na wǝǝnu. Bɛɛ laan nan mʋ te sɩ dɩ́ yagɩ-tɩ dɩ́ pa wʋlʋ na wʋ yaarɩ tɩ ŋwaanɩ tɩn? Kʋ maama ba jɩgɩ kuri, sɩ kʋ yɩ lɛɛrʋ yɩranɩ mʋ. 22 Lʋgʋ baŋa ŋwɩa wʋnɩ, nabiinu wʋ́ tʋŋɩ taan, yɩ o je dɩ liǝ mʋ. O nan lagɩ o na bɛɛ nyɔɔrɩ mʋ kʋ baŋa nɩ? 23 Dɛ maama wʋnɩ, dɩ́ tɩtʋŋa yǝni ya ni dɩbam yɩ liǝ daanɩ dɩbam ya ŋwaanɩ. Tɩtɩ nɩ dɩ, dɩ́ wʋbʋŋa maa kaagɩ ya beerǝ. Kʋ maama ba jɩgɩ kuri.
24 Kʋlʋ na tiini kʋ lamma kʋ paɩ nɔɔnʋ tɩn mʋ maŋɩ sɩ o taa di wʋdiu, yɩ o nyɔa, sɩ o daarɩ o di ywəəni o tɩtʋŋa yam baŋa nɩ. Amʋ nan maanɩ nɩ tɩntʋ maama nuŋi Wɛ tee nɩ mʋ. 25 Bɛŋwaanɩ, Wɛ na wʋ wǝli, nɔɔn-nɔɔnʋ warɩ o na wʋdiu naa ywəəni sɩ o di. 26 Kʋ na yɩ nɔɔnʋ wʋlʋ na kɩ o sui Wɛ yi tɩn, Wɛ paɩ kʋ tu swan, dɩ yǝno, dɩ wʋpolo mʋ. Kʋ daarɩ, lwarɩm-kərə tʋŋɩ ba tiŋi sɩ ba laan kwe ba pa balʋ kikiə na sui Wɛ yi tɩn mʋ. Kʋntʋ dɩ ba jɩgɩ kuri. Kʋ nyɩ dɩ nɔɔnʋ na duri o zəli viu sɩ o ja te tɩn mʋ.