Kwərə-tu Tɔnɔ
1
Wʋlʋ na yɩ Wɛ kwərə-tu tɩn kwǝrǝ mʋ tɩntʋ. Wʋntʋ mʋ yɩ Pɛ Davidi bu, o na di paarɩ Zeruzalɛm tɩʋ kʋm nɩ tɩn.Dɩ́ yǝri wǝǝnu kuri
2 Wɛ kwərə-tu mʋ wɩ:
Dɩ́ bá wanɩ dɩ́ ni wǝǝnu tɩntʋ maama kuri.
Tɩ kuri nim tiini dɩ cana dɩ gaalɩ sɩ dɩ́ lwarɩ.
3 Nabiinǝ yaarɩ dɩ tɩtʋŋ-cɛɛra mʋ tɩga baŋa nɩ.
Bɛ nyɔɔrɩ mʋ ba nan naɩ ya baŋa nɩ?
4 Nabiinǝ tui lʋgʋ kʋm baŋa mʋ,
yɩ badonnǝ dɩ ləri ba tʋa.
Lʋgʋ kʋm nan yɔɔrɩ kʋ yɩ kʋ na maŋɩ kʋ yɩ te tɩn mʋ.
5 Wɛ dɩm yǝni dɩ puli mʋ,
yɩ dɩ laan vu dɩ zʋ.
Dɩ nan ta wʋ́ kɩ lɩla mʋ
sɩ dɩ joori dɩ tʋlɩ dɩ vəŋə kam.
6 Viu yǝni kʋ dʋlɩ kʋ ve jagwiə seeni,
yɩ kʋ ta dʋlɩ kʋ ve jazɩm baŋa seeni.
Viu kʋm nan ta ve yigə dɩ kwaga mʋ
kʋ kaagɩ kʋ ve kʋntʋ mʋ taan.
7 Bu-tʋlɩ sɩm maama soe sɩ ve
sɩ lo sɩ na bam nɩnɩʋ kʋm wʋnɩ mʋ,
yɩ nɩnɩʋ kʋm ba fɔgɩ kʋ sui kʋ pɛɛlɩ.
Na bam daa maa yǝni ba joori mʋ,
ba ve bu-tʋlɩ sɩm na buri mɛ tɩn.
8 Woŋo maama yǝni kʋ kɩ kʋntʋ doŋ mʋ
yɩ kweelim tǝrǝ.
Nɔɔn-nɔɔnʋ bá wanɩ o ta kʋ kuri o ti.
Nabiinu yiǝ bá wanɩ woŋo maama ya nii ya su.
O zwa dɩ nan bá wanɩ ya cəgi wǝǝnu maama ya su.
9 Wo-dʋŋʋ tǝrǝ lʋgʋ baŋa nɩ.
Kʋlʋ na maŋɩ kʋ wʋra tɩn mʋ ta wʋ́ taa wʋra taan.
Kikiə yalʋ dɛɛn na kɩ tɩn mʋ ta wʋ́ joori ya kɩ.
10 Woŋo kʋlʋ nɔɔna na tɛ kʋ taanɩ ba wɩ:
«Nii-na, wo-dʋŋʋ mʋ tɩntʋ!»
kʋntʋ woŋo kʋm maŋɩ kʋ wʋra mʋ faŋa faŋa,
yɩ ba wʋ lʋgɩ dɩbam.
11 Dɩ́ daa ba gulə balʋ ya na wʋra faŋa kam nɩ tɩn gulə.
Kʋ nan na yɩ balʋ ba jwa na wʋ́ lʋ tɩn,
balʋ na tu bantʋ kwaga nɩ tɩn wʋ́ swe ba dɩ swiə.
Amʋ na lwarɩ cɩga kalʋ tɩn
12 Amʋ wʋlʋ na yɩ Wɛ kwərə-tu tɩn dɛɛn di Yisɩrayɛlɩ tiinə paarɩ Zeruzalɛm nɩ. 13 Amʋ sɩɩnɩ a yiǝ mʋ sɩ a tɔgɩ swan cwǝŋǝ a ma zaasɩ a daarɩ a vɛɛsɩ wǝǝnu tɩlʋ maama na jɩgɩ tɩ kɩ lʋgʋ baŋa nɩ tɩn, sɩ a wanɩ tɩ kuri a lwarɩ. Amʋ nɛ nɩ tɩtʋŋa yalʋ Wɛ na pɛ nabiinǝ sɩ ba taa tʋŋɩ tɩn tiini kʋ cana kʋ pa-ba. 14 Amʋ nan maanɩ wǝǝnu tɩlʋ maama na jɩgɩ tɩ kɩ lʋgʋ baŋa nɩ tɩn. Nii-na! Tɩ maama cana sɩ dɩ́ lwarɩ tɩ kuri mʋ. Kʋ nyɩ dɩ nɔɔnʋ na duri o zəli viu sɩ o ja-kʋ te tɩn mʋ.
15 Woŋo kʋlʋ na gugwǝli,
kʋ twɩɩm camma mʋ.a
Wǝǝnu tɩlʋ maa na tǝrǝ tɩn
warɩ sɩ nɔɔnʋ jeeli tɩ ni.
16 Amʋ nan ya tagɩ a tɩtɩ nɩ a wɩ: «Nii mʋ! Amʋ tiini a jɩgɩ yi-pʋrʋ a dwe balʋ na maŋɩ ba di paarɩ Zeruzalɛm nɩ tɩn maama. A ma joŋi swan dɩ yǝno zanzan.»b 17 Amʋ sɩɩnɩ a yiǝ mʋ sɩ a lwarɩ swan, sɩ a ta lwarɩ jwərim dɩ cicooru na yɩ te tɩn. A tu a maanɩ nɩ kʋntʋ maama dɩ nyɩ dɩ nɔɔnʋ na duri o zəli viu sɩ o ja-kʋ te tɩn mʋ.
18 Nɔɔnʋ yi-pʋrʋ na maɩ te tɩn,
o liǝ dɩ maɩ kʋntʋ mʋ.
O yǝno na daga te,
o wʋ-cɔgɔ dɩ wʋ́ taa daga kʋntʋ doŋ mʋ.