Aguri bɩtar-dɩndɩ yadonnə
30
Yakɛ bu Aguri bɩtar-dɩndɩ mʋ sɩntʋ.Nii-na kʋlʋ kʋm baarʋ wʋm kʋntʋ dɛɛn na tagɩ dɩ Yitiyɛlɩ, dɩ Ukalɩ tɩm.
2 Amʋ yǝri kʋlʋkʋlʋ.
A yi maa wʋ pʋʋrɩ nɩnɛɛnɩ a donnǝ nabiinǝ bam tɩte.
3 A maa wʋ fɔgɩ a zaasɩ swan,
yɩ a yǝri Wʋ-poŋo Tu Baŋa-Wɛ.
4 Nabiinu wɔɔ mʋ diini Wɛyuu
yɩ o joori o ba?a
Wɔɔ mʋ jaanɩ viu
o kɩ o ja-guli nɩ?
Wɔɔ mʋ pɛ nɩnɩʋ kʋm
o kukuli o gɔrɔ nɩ?
Wɔɔ mʋ lɔgɩ lʋgʋ kʋm baŋa maama sisəm o tiŋi?
Abam ye o dɩ o bu wʋm yɩrɩ na?
Á na ye, sɩ á ta á brɩ-nɩ.
5 Wɛ taanɩ dɩm maama yɔɔrɩ dɩ zɩgɩ dɩ cɩga mʋ.
DƖ waɩ DƖ cʋ balʋ na tui ba zʋʋrɩ DƖ woro nɩ tɩn.
6 Ta n ye sɩ n yɩ wǝli kʋlʋkʋlʋ Wɛ taanɩ dɩm wʋnɩ,
sɩ Wɛ wʋ́ bwɛ‑m sɩ kʋ brɩ nɩ n yɩ vwa-fɔrʋ mʋ.
7 Amʋ Tu Baŋa-Wɛ,
a beeri wǝǝnu tɩle mʋ
sɩ n kɩ n pa-nɩ, sɩ a laan tɩ.
8 Yɩ pa a taa yɩ vwa-nyɩm.
Ta yɩ pa zʋrɩ ja-nɩ.
Nan yɩ pa-nɩ duuni zanzan.
Pa-nɩ kʋlʋ yɩranɩ na maŋɩ
a jam tɩn.b
9 Kʋ na daɩ kʋntʋ, a na jɩgɩ kʋ gaalɩ,
a daa bá tɩɩgɩ nmʋ yɩra nɩ,
yɩ a ta wɩ «Wɔɔ mʋ yɩ Baŋa-Wɛ?»
Yinigə nan na tiini ka ja-nɩ,
a waɩ a ŋɔna
pa a yáalɩ amʋ Tu Wɛ yɩrɩ.
10 Yɩ co gambaa kwaga ka tu yigə nɩ,
sɩ o laan wʋ́ sɔɔlɩ lwarɩm
o kɩ n yuu nɩ.
11 Nɔɔna badonnǝ soe
sɩ ba taa cɔgɩ ba kwə yɩrɩ,
yɩ ba ta yɔɔrɩ ba paɩ
ba niinə ba jɩgɩ yuu.
12 Nɔɔna badonnə maa bʋŋɩ ba paɩ bam ba jɩgɩ gɛɛrɩ,
yɩ yagɩ yɩra ba wʋ ba digiru tɩm zarɩ.
13 Badonnǝ maa brɩ ba kamunni mʋ
yɩ ba ta gooni ba donnǝ.
14 Badaara kɩ wʋ-gʋʋ mʋ dɩ nɔɔna
yɩ ba ni-yələ nyɩ dɩ sʋ-lwaanʋ.
Ba maa lagɩ sɩ nabwənə yɩrɩ saarɩ tɩga baŋa nɩ.
15 Kaləndiu jɩgɩ bukwa bale mʋ.
Ba maama maa tɛ ba wɩ: «Te n pa-nɩ.»
Wǝǝnu tɩtɔ wʋra tɩ na ba fɔgɩ tɩ sui.
Tɩna mʋ ba tɛ ba wɩ «Kʋ maŋɩ!»
16 Tɩ maa yɩ:
curu cwǝŋǝ,
dɩ ka-dʋgʋ pugə,
dɩ tɩga na ba fɔgɩ ka sui na tɩn,
dɩ min-vʋgʋ na di bilǝm-biləm tɩn.
17 Wʋlʋ na mwanɩ o ko,
naa o na kɩ o nu kacaarɩ,
bacangaarʋ wʋ́ zɔgɩ o yiǝ tɩ lɩ,
yɩ duurə dɩ di o ya-nwana yam.
18 Wǝǝnu tɩtɔ wʋra tɩ na tiini tɩ sʋ-nɩ.
A maa ba ni wǝǝnu tɩna kuri.
19 Tɩ maa yɩ:
Kaloŋ-zɔŋɔ na jaanɩ te wɛyuu kʋm nɩ,
dɩ bɩsankwɩa na ye ka cwǝŋǝ te pweeru yuu nɩ,
dɩ naboro na yɛ nɩnɩʋ kʋm wʋnɩ te tɩn,
dɩ baarʋ dɩ kaanɩ sono laŋa na yɩ te tɩn.
20 Nan nii-na ka-tʋla na-vəli na yɩ tɩte tɩn:
Oó di mʋ o daarɩ o guguni o ni yɩ o wɩ:
«Amʋ wʋ kɩ kʋlʋkʋlʋ a cɔgɩ.»
21 Wəənu tɩtɔ mʋ wʋra, tɩ na jɩgɩ lʋgʋ baŋa tɩ vuvugə,
tɩ brɩ tɩ yɩ tɩna mʋ dɩ, lʋgʋ na ba wanɩ kʋ sɛ-tɩ:
22 Tɩ maa yɩ:
Gambaa na jigi pɛ,
dɩ nɔn-joro na di kʋ su,
23 dɩ bukɔ wʋlʋ yuu na cana tɩn na da o zʋ barʋ,
dɩ tɩntʋŋ-kana na zəli o tu o daarɩ o vrɩ barʋ wʋm o te.
24 Vara kuni bɩna mʋ wʋ tɩga baŋa nɩ, ba na tiini ba yɩ wo-balɛ,
yɩ ba yi-pʋrʋ ba jɩgɩ doŋ.
25 Mɩmɩla tiini ba muri dɩ dam.
Dɩ kʋ dɩ, ba laɩ wʋdiiru
ba tiŋi cam maŋa ŋwaanɩ.
26 Pa-nyaana dam tiini dɩ muri.
Dɩ kʋ dɩ, ya zʋʋrɩ piu gugwəəru nɩ mʋ.
27 Kayɩrɩ ba jɩgɩ pɛ o brɩ ba na wʋ́ kɩ te.
Sɩ nan na yʋ, dɩdʋa tɩtɩ ba ywəri ka cwǝŋǝ nɩ.
28 Nɔɔnʋ waɩ baləgə o jaanɩ dɩ o jɩŋa.
Sɩ nan ba kwarɩ pwa sam, sɩ su da mʋ.
29 Vara batɔ mʋ nan wʋra ba vəŋə na jɩgɩ nɩnwaŋa,
ba brɩ ba yɩ bana mʋ dɩ, ba vəŋə na tiini ka lamma:
30 Nyoŋo yɩ dɩdɛɛrʋ mʋ ga-vara maama wʋnɩ.
Kʋ maa ba ywəri kʋ daarɩ cwǝŋǝ kʋ paɩ kʋlʋkʋlʋ.
31 Cɩbɩʋ na kwǝni kʋ yuu kʋ keeri tɩn,
dɩ bʋbɔlɔ,
dɩ pɛ wʋlʋ jar-kərə na wʋ o tee nɩ tɩn.
32 Nmʋ na tiini n kɩ jwərim yɩ n zəŋi n tɩtɩ,
Kʋntʋ kwaga nɩ, n na tu n ba n bʋŋɩ n lwarɩ,
kwaanɩ n kwe n jɩŋa n ma n pu n ni sɩ n daa yɩ zaŋɩ n ŋɔɔnɩ.
33 Bɛŋwaanɩ, n na magɩ nugə,
ka wʋ́ pɩɩrɩ mʋ.
N na cugi nɔɔnʋ mʋmwɛ,
jana mʋ wʋ́ nuŋi.
N nan na pɛ nɔɔnʋ banɩ zaŋɩ, kʋ tui dɩ najara mʋ.