29
Nɔɔnʋ wʋlʋ na ba lagɩ sɩ ba bwɛ-o, yɩ o kʋ o bɩcarɩ tɩn,kʋntʋ tu lagɩ o ba o cɔgɩ bɩdwɩ baŋa nɩ mʋ, yɩ kʋ daa ba jɩgɩ lirə.
2 Nɔn-ŋʋna na diini paarɩ baŋa,
nɔɔna jɩgɩ wʋpolo.
Nɔn-balwaarʋ nan na jɩgɩ paarɩ ba di,
nɔɔna ŋʋʋsɩ mʋ.
3 Wʋlʋ na beeri swan tɩn ko wʋʋ poli mʋ.
Wʋlʋ na tɔgɩ ka-bwəəru kwaga tɩn ma cɔgɩ o ko wǝǝnu.
4 Pɛ na nii o nɔɔna dɩ cɩga,
tɩʋ kʋm ywəmmə mʋ.
Vwa-tɩtʋŋa tu yigi tɩʋ kʋm o dɩ tɩga nɩ mʋ.
5 Ni-sʋnɩ nyɩm nyɩ dɩ o cɩgɩ cɩkʋ mʋ o tiŋi.
6 Nɔɔnʋ wʋlʋ na kɩ balɔrɔ tɩn, o gɛɛrɩ dɩm yɩ cɩkʋ mʋ o ŋwaanɩ,
kʋ daarɩ cɩga tu nan na wɔnɔ mʋ, yɩ o cakɩ dɩ wʋpolo.
7 Nɔn-ŋʋm jɩgɩ yinigə tiinə ŋwaŋa
yɩ o paɩ-ba ba cɩga.
Kʋntʋ kʋlʋkʋlʋ nan daɩ nɔn-balɔrɔ yigə.
8 Nɔɔna balʋ na pupogi ba donnə tɩn wiiri najara mʋ
ba yagɩ tɩʋ wʋnɩ.
Swan tiinə nan paɩ kʋ nɔn-biə bam bana joori ya tʋ mʋ.
9 Swan tu ba saŋɩ nɔn-joro pɛ sɔŋɔ nɩ,
bɛŋwaanɩ, joro kʋm wʋ́ da mwaanʋ, dɩ sɔɔ yɩranɩ mʋ
pa á bá na taanɩ dɩm kuri.
10 Nɔɔna balʋ na yɩ nɔn-gʋra tɩn culi cɩga tu mʋ,
ama nɔn-ŋʋna bam nan yɩrɩ o ŋwɩa kam mʋ.a
11 Nɔn-joro mʋ brɩ o ban-lʋm jaja.
Swan tu maa jaanɩ o banɩ.
12 Pɛ na maɩ bɩbarɩ taana o tʋŋa,
o nakwa maama wʋ́ taa kɩ pu-sɩŋa mʋ.
13 Baŋa-Wɛ mʋ paɩ nabiinǝ maama pooni pa ba naɩ,
kʋ na maŋɩ kʋ yɩ yinigə tu
dɩ wʋlʋ na bɛɛs-o tɩn dɩ.
14 Pɛ na bʋrɩ cɩga o pa yinigə tiinə,
o paarɩ wʋ́ daanɩ mʋ.
15 Fɩna dɩ bwɛa kʋrɩsɩ bu
pa o jaanɩ swan mʋ.
Bu wʋlʋ ba na yagɩ ywəri tɩn
wʋ́ yáalɩ o nu mʋ.
16 Nɔn-balwaarʋ na je dam nɩ,
lwarɩm puli mʋ.
Ba nan wʋ́ tʋ yɩ nɔn-ŋʋna zɩgɩ ba nii mʋ.
17 Kʋrɩsɩ n biə, sɩ baá pa‑m bɩcar-zuru dɩ wʋpolo.
18 Wɛ kwǝrǝ na tǝrǝ sɩ ka brɩ nɔɔna,
ba kɩ ba na lagɩ te mʋ.
Balʋ maa na sɛ Wɛ niə yam tɩn jɩgɩ yu-yoŋo.
19 Ni-taanɩ yɩranɩ ba dɩ gambɛ cwǝŋǝ nɩ.
O na maŋɩ o ye n na lagɩ
sɩ o kɩ te tɩn, o bá kɩ.
20 Nɔn-joro jɩgɩ tɩɩna sɩ o lwarɩ,
sɩ kʋ dwe wʋlʋ na tɛ taanɩ
yɩ o ba bʋŋɩ tɩn.
21 Nɔɔnʋ na tiini o kɩ nɔn-ŋʋnnɩ dɩ o gabaa, ka nɔn-dʋnnɩ maŋa nɩ,
ka laan wʋ́ ba ka yɩrɩgɩ mʋ, ka bʋŋɩ ka paɩ ka ga yɩ sɔŋɔ kʋm bu mʋ.
22 Banɩ tu wiiri kantɔgɔ mʋ o kɩ da.
Ban-lʋm tu kɩ lwarɩma mʋ zanzan.
23 Zəŋi-n-tɩtɩ paɩ nɔɔna tʋɩ ba yáalɩ lɩla mʋ.
Wʋlʋ nan na tu o tɩtɩ tɩn wʋ́ na zulə.
24 Wʋlʋ na wǝli ŋwɩɩnʋ pa o ŋɔ tɩn
jɩgɩ o tɩtɩ mʋ o waara.
O na maŋɩ o cɩm taanɩ dim baŋa nɩ, o ta wʋ sin.
25 N na kwarɩ n donnǝ nabiinǝ,
kʋ bá wəli‑m.
N nan na kɩ n cɩga dɩ Baŋa-Wɛ,
mʋ n sin.
26 Wɛ na pɛ nɔɔnʋ na cɩga
garɩ o na lagɩ sɩ pɛ taa ye o ni nɩ.
27 Cɩga tiinə kwarɩ nɔn-balwaarʋ na wʋ mɛ tɩn mʋ.
Nɔn-balwaarʋ dɩ ma culi nɔn-ŋʋna bam je.