28
Nɔn-balwaarʋ duri sɩ ba lu mʋyɩ nɔɔn-nɔɔnʋ ba zəli-ba.
Nɔn-ŋʋna nan jɩgɩ baarɩ mʋ nɩ nyoŋo tɩte.
2 Tɩʋ na su dɩ zwabani-nyɩna,
ba ləri balʋ na nii-kʋ tɩn yɔɔ yɔɔ mʋ.
Wʋbʋŋa tu nan wʋ́ kwe yǝno mʋ o ja o tɩʋ o daanɩ.
3 Nɔɔnʋ na yɩ yinigə-tu yɩ o ba o joŋi paarɩ, yɩ o jɩgɩ nabwonə o bɛɛsa,
o nyɩ dɩ dʋa kalʋ na cɔgɩ faa kəm tɛ tɩn mʋ.
4 Balʋ na vɩn Wɛ niə yama tɩn brɩ nɩ ba zuli nɔn-balwaarʋ mʋ.
Balʋ maa na sɛ-ya tɩn brɩ nɩ ba dwǝni dɩ ba mʋ.
5 Nɔn-balwaarʋ bá wanɩ ba ni cɩga kam kuri.
Kʋ nan na yɩ balʋ na kwarɩ Baŋa-Wɛ tɩn,
ba yɔɔrɩ ba ni ka kuri mʋ lanyɩranɩ.b
6 Yinigə tu na je dɩ o cɩga
garɩ nadum na yɩ nɔn-ŋʋlʋ.
7 Wʋlʋ na kɩ o tɔgɩ Wɛ niə yam tɩn
brɩ nɩ o yi pʋʋrɩ mʋ.
Wʋlʋ nan na ve dɩ nɔn-kwəllu,
kʋ tu yáalɩ o ko mʋ.
8 Wʋlʋ na dwanɩ nyɔɔrɩ zanzan jɩna baŋa nɩ sɩ o ma o duni,
kʋ tu wʋ́ ga o jɩjɩgɩrʋ,
yɩ wʋlʋ na jɩgɩ yinigə tiinə ŋwaŋa tɩn laan na-tɩ.
9 Nɔɔnʋ na paalɩ o sɩn o zwa dɩ Wɛ niə yam,
o wɛ-loro tɩtɩ lwe mʋ Wɛ mʋmwa nɩ.
10 Nmʋ na sʋgɩ nɔn-ŋʋm n dɩ lwarɩm nɩ,
n tɩtɩ wʋ́ tʋ n goŋo wʋnɩ mʋ.
Kʋ nan na yɩ balʋ na ba tusi tɩn,
bantʋ jɩgɩ jwa.
11 Nadum yəni o paɩ o jɩgɩ bʋbʋŋa mʋ,
cɩga wʋnɩ nan tɩn, yinigə tu wʋlʋ na yɩ swan tu tɩn,
Oó wanɩ o kwɩn nadum wʋm kʋntʋ kuri.
12 Nɔn-ŋʋna na diini dam baŋa,
nɔɔnʋ maama cakɩ mʋ.
Nɔn-balwaarʋ nan na jɩgɩ dam ba di,
nɔɔna duri ba səgi mʋ.
13 Wʋlʋ na jɩgɩ o lwarɩm o səgi tɩn ba ve yigə.
Wʋlʋ nan na pɛ ya nuŋi pooni yɩ o culi-ya,
Wɛ wʋ́ duri kʋ tu ŋwaŋa.c
14 Wʋlʋ na yɔɔrɩ o kwarɩ Baŋa-Wɛ tɩn jɩgɩ yu-yoŋo.
Zwabani-nyɩm nan zʋʋrɩ cam wʋnɩ mʋ.
15 Pɛ na tɔgɩ pu-sɩŋa baŋa o yaarɩ nabwənə,
o nyɩ dɩ nyoŋo na ŋuuni sɩ kʋ zi nwanɩ tɩn mʋ.
16 Pɛ kǝm na camma,
o wʋbʋŋa mʋ muri.
Wʋlʋ nan na culi kampinə tɩn wʋ́ daanɩ.
17 Nɔn-gʋrʋ wʋbʋŋa wʋ́ daan‑o mʋ
sɩ kʋ yi o tʋʋnɩ maŋa.
Nɔɔn-nɔɔnʋ nan yɩ zaŋɩ o ta o wɩ o zɩg-o!
18 Cɩga tu kikiə cʋ-o mʋ.
Kʋ daarɩ nɔn-ŋʋlʋ wʋ́ da o na cɔgɩm.
19 Wʋlʋ na sɛ varɩm tɩn jɩŋa yi o ni.
Zʋrɩ nan wʋ́ ja wʋlʋ na kaagɩ o tʋŋɩ wo-yɔɔrʋ tɩn.
20 Cɩga tu wʋ́ na Wɛ yu-yoŋo sɩ kʋ gaalɩ.
Wʋlʋ yɩra nan na saɩ sɩ o beeri jɩjɩgɩrʋ,
kʋ tu wʋ́ yɔɔrɩ o na waarɩm.
21 Kʋ daɩ kʋ cwǝŋǝ nɩ
sɩ n ta n kuri nɔɔna da-wʋnɩ.
Dim ŋwaanɩ nan,
nɔɔna jɩgɩ kʋntʋ mʋ ba kɩ.
22 Wʋ-lʋŋ-nyɩm lɔgɩrɩ mʋ sɩ o duni.
O nan yǝri nɩ yinigə wʋ́ yi‑o.
23 Nmʋ na bwɛ nɔɔnʋ dɩ cɩga,
kwaga seeni n kikiə wʋ́ su kʋ tu yi,
kʋ dwǝni n ya na kɩ ni-sʋnɩ dɩd-o.
24 Wʋlʋ na pini o ko dɩ o nu
yɩ o bʋŋɩ nɩ kʋntʋ daɩ kʋlʋkʋlʋ,
kʋ tu dɩ nɔn-gʋrʋ ba garɩ daanɩ.
25 Wʋ-lʋŋ-nyɩm paɩ nakɔɔrɩ mʋ zaŋa.
Kʋ daarɩ wʋlʋ na kɩ o wʋ-dɩdʋa dɩ Baŋa-Wɛ tɩn wʋ́ di ywəəni.
26 Wʋlʋ na tɩɩgɩ o tɩtɩ yǝno baŋa nɩ tɩn yɩ joro mʋ.
Wʋlʋ nan na kɩ woŋo maama dɩ swan,
kʋ tu wʋ́ lu cam wʋnɩ.
27 N na ye yinigə tiinə ni nɩ,
n bá fɔgɩ n ga.
N nan na sɩn n zwa dɩ nabwənə kərə,
baá sɔɔlɩ lwarɩm ba pa‑m mʋ.
28 Nɔn-balwaarʋ na jɩgɩ dam ba di,
nɔɔna duri ba səgi mʋ.
Ba dam maa na ti,
nɔn-ŋʋna daa wʋ́ ba ba nuŋi mʋ.