27
Yɩ tiini n ŋɔɔnɩ jwa taanɩ n su n ni,sɩ n yǝri tɩga na pʋʋrɩ,
kʋ na wʋ́ taa yɩ te n yɩra nɩ.a
2 Yagɩ sɩ nɔn-gɛ tee‑m,
sɩ nmʋ tɩtɩ yɩ ta n su n ni.
3 Kandwa-zana dummə,
yɩ kasʋlʋ duuni dɩ gaalɩ.
Nɔn-joro nan na tʋŋɩ jwərim nmʋ yɩra nɩ,
kʋ cam dɩm dunǝ
dɩ dwe tɩntʋ maama.
4 Ban-lʋm tu kǝm cana
yɩ o warɩ o ja.
Wʋlʋ wʋ-gʋrʋ na gaalɩ tɩn nan dwe kʋ tu.
5 Wʋlʋ na wʋ kwarɩ n yi sɩ o ta n cɩga je,
kʋ tu garɩ wʋlʋ na jɩgɩ n cɩga o səgi dɩ nmʋ tɩn.
6 Nmʋ ciloŋ na tagɩ n yɩra cɩga,
kʋ jɩgɩ kuri kʋ pa‑m.
Kʋ daarɩ n dʋnʋ mwanɩ dɩ nmʋ mʋ,
sɩ kʋ daɩ sono.
7 Nɔɔnʋ wʋlʋ na di o su tɩn, o ta wʋ́ vɩn tʋʋrʋ tɩtɩ dɩ mʋ,
kʋ daarɩ wʋlʋ kana na jɩgɩ tɩn, wo-cɛɛrʋ ta yɩ ywənni yɩranɩ mʋ dɩd-o.
8 Wʋlʋ na duri o daarɩ o sɔŋɔ tɩn
nyɩ dɩ zuŋə kalʋ na nuŋi
ka daarɩ ka pogo tɩn mʋ.
9 Tralɩ nugə dɩ wǝǝnu tɩlʋ lwǝm na ywǝmmǝ tɩn paɩ nɔɔna wʋpolo mʋ.
Ciloŋ-yoŋo kwiə nan garɩ tɩntʋ.
10 Ta n ye n badonnǝ dɩ n ko badonnǝ ni nɩ.
Cam na yi‑m,
n doonə bam kʋntʋ wʋ́ wəli‑m
ba dwǝni n cʋrrʋ tɩlʋ na ba bwələ tɩn.
11 Amʋ bu, kwaanɩ n ja swan
sɩ a wʋʋ poli kʋ ŋwaanɩ.
Kʋntʋ wʋ́ pa-nɩ cwǝŋǝ
sɩ a puri a ni a ləri
balʋ na jɩgɩ-nɩ ba lwɛ tɩn.
12 Wʋbʋŋa tu duri o səgi cam mʋ sɩ dɩ yɩ yi‑o.
Nayəri-nyɩm nan wʋ́ duri o zʋ dɩ wʋnɩ mʋ yɩ o na yaara.
13 Nɔɔnʋ na sɛ sɩ o zɩgɩ
sɩ vəru di jɩnɩ nmʋ tee nɩ,
kʋ maŋɩ sɩ n joŋi kʋ tu gwar-bwərə mʋ n wǝli da.
14 Wʋlʋ na goni tɩga
o tɔɔlɩ o warɩ o donnǝ tɩn
nyɩ dɩ o sɔɔlɩ lwarɩm mʋ o pa-ba.
15 Kaanɩ wʋlʋ na yɩ najarjarʋ tɩn
nyɩ dɩ dʋa na nɩa
yɩ na luri n digə nɩ te tɩn mʋ.
16 Wʋlʋ na kwaanɩ sɩ o ja ka-dwi dɩm kʋntʋ,
kʋ tu wʋ́ kɩ o ga mʋ.
Kʋ nyɩ dɩ n na zəli viu sɩ n ja-kʋ,
naa n mɔ nugə dɩ n ja-bɔŋɔ te tɩn mʋ.
17 Siini na dwəri daanɩ sɩ dɩ ja ni te tɩn,
kʋntʋ mʋ nabiinǝ dɩ zaasɩ da-tee nɩ.
18 Wʋlʋ na fɔgɩ o kwɛ tweeru tɩn wʋ́ di kʋ biə mʋ.
Wʋlʋ dɩ maa na tʋŋɩ o paɩ o tu dɩ cɩga tɩn wʋ́ joŋi zulə.
19 Niu brɩ nabiinu yibiyə mʋ.
Kʋ daarɩ o bɩcarɩ maa brɩ o na yɩ wʋlʋ tɩn.
20 Twa na maŋɩ ba daga te,
curu ba sui.
Nabiinǝ yiǝ dɩ ba nii ya sui.
21 Min-vʋgʋ paɩ ba ye səbu-poŋo
dɩ səbu-sɩŋa lam mʋ.
Kʋ nan na yɩ nabiinu,
baá lwarɩ o wʋʋ dɩ o na nɛ yɩrɩ te tɩn mʋ.
22 Kwe nɔn-joro n kɩ kazɔgɔ nɩ
n wǝli dɩ mɩna n zɔ n na lagɩ te.
O jwərim dɩm ta bá ti.
23 Ta n ye n vara bam ni nɩ,
sɩ n daarɩ n ta n nii ba baŋa nɩ lanyɩranɩ.
24 Bɛŋwaanɩ jɩjɩgɩrʋ bá taa wʋra taan taan.
Dwi dɩdʋa nan wʋ́ wanɩ
dɩ taa te paarɩ wuu na?
25 Gaanɩ karɩ wʋʋ gaa, kʋ daarɩ maŋa kalʋ ga-dʋŋʋ na wʋ́ ba kʋ kwin tɩn,
sɩ n puuri ga-kʋrʋ kʋlʋ na wʋ pweeru baŋa nɩ tɩn.
26 Kɔnɩ peeni sɩ n wʋ́ ma sɩ kʋrʋ n ma n sɔ gwaarʋ n zʋ.
N daarɩ n kɔ bʋnɩ n ja n yəgi, sɩ n wʋ́ ma n yəgi karɩ-dʋŋa.
27 N ma n wʋ́ kwe n vara nayɩla
n kɔnɩ n digə kam,
dɩ n tɩntʋŋ-kaana bam.