26
Nɩ dʋa na ba nɩ, yɩ nyɔnɔ dɩ ba tʋɩ tɩ-pwəŋə nɩ te tɩn,kʋntʋ mʋ nɔn-joro dɩ wʋ maŋɩ sɩ n zul‑o.
2 Nɩ kawɛbudoori na ba jɩgɩ tɩga jǝŋǝ te tɩn,
mʋ kampwəl-balwara kalʋ na wʋ tɔgɩ cwǝŋǝ tɩn na yɩ te.
Ka bá jǝni n yuu nɩ.
3 Magɩ sisəŋ-nɔɔnʋ dɩ fɩna,
sɩ n dɩ ŋʋna bɩnaga ban nɩ n vaŋɩ-ka.
Kʋ nan na yɩ nɔn-joro,
mag-o sɩ kʋ yi.
4 Yɩ zaŋɩ n ta n wɩ n ləri joro, kʋ maŋɩ dɩ o jwərim dɩm na yɩ tɛ tɩn.
Kʋ na dagɩ kʋntʋ, kʋʋ́ pa n dɩ tɔgɩ n ji joro nɩ wʋntʋ mʋ tɩte.
5 Ləri nɔn-joro dɩ o jwərim dɩm.
Kʋ na daɩ kʋntʋ,
oó bʋŋɩ nɩ o yɔɔrɩ o ye mʋ.
6 Nmʋ na kwe kwǝrǝ n kɩ nɔn-joro jɩŋa nɩ sɩ o vu o pa nɔɔna,
nyɩ dɩ n na zagɩ n tɩtɩ naga n goni,
naa n na beeri cam n pa tɩtɩ te tɩn mʋ.
7 Nɩ kɔrɔ nɛ na warɩ sɩ vu te tɩn,
kʋntʋ mʋ nɔn-joro dɩ warɩ o lwarɩ bɩtar-dɩndɩ kuri.
8 Nmʋ na vɔgɩ kandwɛ napana wʋnɩ
sɩ n vuvugi n yagɩ,
nyɩ dɩ n na kwaanɩ sɩ n zuli Agɛbʋŋa te tɩn.
9 Nɩ sa-nyɔrʋ na yǝri sabara jam te tɩn,
kʋntʋ mʋ nɔn-joro dɩ yǝri bɩtar-dɩndɩ kuri.
10 Nɔɔnʋ na beeri nɔɔna sɩ o kɩ tɩtʋŋa nɩ, yɩ o vu o kwe joro, asawɛ o yi na pɩɩrɩ balʋ tɩn,
kʋ nyɩ dɩ nɔɔnʋ na kɩ cɩm miə ni nɩ, o ma o taɩ nɔɔna yɔɔ yɔɔ tɩte tɩn mʋ.
11 Nɩ kakurə na joori ka di ka tɩtwaanʋ te tɩn,
nɔn-joro dɩ kaagɩ o tʋŋɩ jwərim kʋntʋ mʋ.
12 N na ve n jeeri nɔɔnʋ wʋlʋ na paɩ o yɩ wʋbʋŋa tu tɩn,
n ta jɩgɩ tɩɩna dɩ nɔɔnʋ wʋlʋ na yɩ joro tɩn n dwe kʋntʋ tu.
13 Yawɔrɩ-nyɩm tigi mʋ yɩ o wɩ:
«Nyoŋo kaagɩ pooni nɩ kʋ beerǝ!»
14 Nɩ digə ni boro na pʋrɩ
yɩ kʋ pɩ te tɩn,
kʋntʋ mʋ yazʋm-nyɩm
dɩ tigi o pipiri o sara nɩ.
15 Nɔɔna badaara yawɔrɔ yɩ kʋ yɩra.
Ba na tʋrɩ jɩŋa zʋŋa nɩ ba fɔ gʋlɩ,
ba warɩ ba lu dwə
sɩ ba ja-dɩ ba vu ba ni.
16 Yawɔrɩ-nyɩm pa o ye o dwe yi-pʋrɩ-nyɩna barpɛ na yǝni ba ləri taanɩ dɩ swan te tɩn mʋ.
17 Nɔɔnʋ na maa kɛ yɩ o kwe o yigə o dɩ kantɔgɔ kʋlʋ na dagɩ o yigə tɩn wʋnɩ,
kʋntʋ tu nyɩ dɩ nɔɔnʋ na ve o ja kakurə zwa nɩ, sɩ o ma o ja-ka tɛ tɩn mʋ.
18 Nɩ cicoo na taɩ cɩna yɔɔ yɔɔ te tɩn,
19 mʋ wʋlʋ dɩ na ganɩ o doŋ yɩ o wɩ:
«A kɩ a kwɛɛra mʋ» dɩ na yɩ te.
20 Dɛ na ti, mim wʋ́ dwe mʋ.
Bɩbara na tǝrǝ, ni-kantɔgɔ je mʋ.
21 Min-cala nyəəri mim mʋ,
nɔɔnʋ wʋlʋ na soe najara tɩn dɩ maa nyəəri najara.
22 Bɩbarɩ nyɩm ni-taanɩ nyɩ dɩ wʋdi-yoŋo na duri solololo kʋ tu nabiinu kana nɩ tɩn mʋ.
23 Wʋlʋ na tagɩ taanɩ
yɩ o wʋʋ ba tɔgɩ o taanɩ dɩm,
kʋ tu nyɩ dɩ ba na kwe səbu-poŋo
ba taagɩ dɔgɔ kamɔgɔ te tɩn mʋ.
24 Pipiri-nyɩm kwe ni-sʋnɩ mʋ
o səgi o wʋbʋŋa.
O laan maa tɔgɩ dáanɩ
o cɔgɩ nɔɔna.
25 O taanɩ dɩm na ywəmmə te maama dɩ,
yɩ sɛ-dɩ, sɩ o wʋbʋŋa yɔɔrɩ ya su dɩ lwarɩm mʋ.
26 O na səgi o wʋbʋŋ-lwaanʋ tɩm te maama dɩ,
tɩ wʋ́ nuŋi pooni
sɩ nɔɔna na-tɩ jaja.
27 N na cɩgɩ cɩkʋ,
kʋʋ́ ja n tɩtɩ.
N nan na bibili kandwɛ
n ja n din piu yuu n yagɩ-dɩ,
dɩ wʋ́ bibili dɩ tʋ dɩ panɩ‑m mʋ.
28 Vwa-nyɩm culi o dʋna mʋ.
Ni-sʋnɩ nyɩm maa jaanɩ cɔgɩm o tui.