Solɔmɔn dɩndɩ sɩm sɩdonnǝ
25
Solɔmɔn bɩtar-dɩndɩ sɩm sɩdaara mʋ tɩntʋ. Zuda tɩʋ pɛ Ezekɩasɩ nan mʋ pɛ ba joori ba lwəni-sɩ ba pʋpʋnɩ ba tiŋi.2 Wɛ jɩgɩ dam sɩ DƖ səgi wǝǝnu mʋ.
Pɛ maa jɩgɩ dam o yɛ wǝǝnu.
3 Ba ba lwarɩ pɛ wʋbʋŋa ba tiə.
Ya diini wɛɛnɩ ya dwǝni wɛ baŋa kam,
yɩ ya ta tu tɩga kam kuri kuri.
4 Lurə na lɩ digiru səbu-poŋo yɩra nɩ,
səbu-poŋo tɩm wʋ́ kɩ wo-kurə.
5 Pwa na zəli nakwa-balwaarʋ ba daarɩ,
ba paarɩ wʋ́ jǝni nɔn-ŋʋnnɩ baŋa nɩ.
6 Yɩ zǝŋi n tɩtɩ pɛ yigə nɩ.
Nan yɩ ja n tɩtɩ n vu n maŋɩ dɩ nɔn-kamunə.
7 Kʋ wʋ́ ta lamma sɩ ba na tagɩ-m ba wɩ: «Diini n ba yo-ba nɩ!
Kʋ garɩ ba na pɛ n na goonə pa-bu yigə nɩ.»
8 Yɩ zaŋɩ n kɩ lɩla n tʋlɩ kʋlʋ nmʋ yi na nɛ tɩn sarɩya jəgə nɩ,
kʋ na dagɩ kʋntʋ, nmʋ sɩbarʋ wʋm na brɩ nɩ nmʋ ba jɩgɩ bʋra, o bá kɩ-m cavɩɩra?
9 Kwɛ kantɔgɔ kʋlʋ nmʋ na magɩ dɩ n tikəri-jənnu tɩn.
Ama nan zɛ n yɩ zaŋɩ n kwe kʋlʋ kʋm n doŋ na tagɩ o brɩ-m tɩn n tʋlɩ n brɩ. a
10 Kʋ na daɩ kʋntʋ, nɔɔna wʋ́ ta wɩ
n yɩ bɩbarɩ nyɩm.
Nmʋ laan ma n wʋ́ tɩ dɩ n cavɩɩra.
11 Bɩtara na tagɩ ka maŋa nɩ,
kʋ lana nɩnɛɛnɩ ba na mɛ səbu-sɩŋa ba gɔgɩrɩ sabu-loŋni yɩ kʋ lana tɩte tɩm mʋ.
12 Nɔɔnʋ wʋlʋ na pʋrɩ o zwa o cəgi taanɩ tɩn,
wʋbʋŋa-tu na pɛ-o kwiə, kʋ nyɩ dɩ səbu-sɩŋa kalʋ na leeri tɩn nafʋlɩ mʋ,
asawɛ ka zɔŋɔ mʋ tɩte o ban nɩ.
13 Wʋlʋ ba na tʋŋɩ tɩn na jɩgɩ cɩga,
o zuri balʋ na tʋŋ-o tɩn bɩcara mʋ,
nɩ na-zurə na zuri na-nyɔm fa-ni maŋa nɩ te tɩn.
14 N na goni ni nɩ nń pa n doŋ woŋo yɩ n wʋ pɛ‑o,
n nyɩ dɩ kunkwǝǝnu dɩ viu na warɩ tɩ ja dʋa tɩ ba te tɩn mʋ.
15 N na pɩɩnɩ n banɩ,
dɩdɛɛrʋ wʋ́ cəgi n taanɩ.
Wʋlʋ ni-taanɩ na bwǝnǝ tɩn
waɩ o kwɛ wǝǝnu.
16 Tʋʋrʋ tɩtɩ maŋɩ sɩ n na nɛ-tɩ,
sɩ n di-tɩ n maŋɩ mʋ.
Tɩ zanzan wʋ́ pa n twanɩ mʋ.
17 Yɩ pa n nɛ taa lʋna
dɩ n farʋ sɔŋɔ.
O fra na nuŋi‑m,
o laan wʋ́ taa culi-m mʋ.
18 Wʋlʋ na fɔgɩ vwan
sɩ o ma o cɔgɩ o doŋ,
kʋ tu nyɩ dɩ o kwe da-lɔŋɔ,
naa sʋ-lɔŋɔ, naa cɩm dɩlʋ na sɩlɩ tɩn mʋ o cɔg-o.
19 Nɔɔnʋ na kwe o cɩga o pa vwa-nyɩm cam maŋa nɩ,
kʋ nyɩ dɩ nɔɔnʋ na wʋ lwarɩ, yɩ o dʋ woŋo dɩ yəli dɩlʋ na bibigi tɩn mʋ,
asawɛ nɩ o na tɩɩgɩ o tɩtɩ naga kalʋ na bwəri tɩm baŋa nɩ tɛ tɩn mʋ.
20 Nmʋ na jɩgɩ wʋpolo le n leeni
wʋlʋ wʋʋ na cɔgɩ tɩn yigə nɩ,
kʋ nyɩ dɩ n lɩ o gɔrɔ mʋ
n daarɩ‑o n zɩgɩ waarʋ yigə nɩ,
naa n logi yɛ mʋ
n yagɩ o ŋwanɩ wʋnɩ.
21 Nmʋ dʋnʋ kana na wɔɛ,
pa‑o wʋdiu sɩ o di.
Na-nyɔm na jɩg-o,
pa‑o na sɩ o nyɔ.
22 Kikiə yam kʋntʋ wʋ́ pa cavɩɩra tiini ya ja-o,
nɩ Wɛ zǝŋi mim mʋ o yuu nɩ tɩn.
Baŋa-Wɛ maa wʋ́ zuli‑m kʋ ŋwaanɩ.
23 Nɩ jazɩm baŋa seeni viu kʋm na tui dɩ dʋa te tɩn,
mʋ ban-zɔŋɔ na tɔgɩ dɩ bɩbara kʋ tui te.
24 Nɔɔnʋ na beeri gugoro o nayuu nɩ o tigi da
garɩ o na zʋʋrɩ dɩ kaanɩ wʋlʋ na yɩ najarjarʋ.
25 Kwər-ywəŋə na nuŋi yigə yigə ka ba,
ka paɩ bɩcara tigi mʋ,
nɩ na-zurə na zuri bɩcarɩ te tɩn.
26 Vʋlɩ mʋ su dɩ weeru
pa na daa warɩ sɩ ba nyɔ.
Nɔn-ŋʋm dɩ nan na sɛ o pa nɔn-balɔrɔ,
kʋ yɩ kʋntʋ mʋ.
27 Nɩ tʋʋrʋ zanzan na ba wǝli nɔɔnʋ te tɩn,
kʋntʋ mʋ wʋlʋ na beeri o tɩtɩ zulǝ, kʋ ba zən‑o.
28 Nɔɔnʋ wʋlʋ na warɩ o banɩ o ja tɩn, kʋntʋ tu nyɩ dɩ tɩʋ kʋlʋ na yɩ wəuu,
kʋ wʋ cɩgɩ kʋ kaagɩ dɩ kabrə tɛ tɩm mʋ.