Pɛ Lemuɛlɩ bɩtar-dɩndɩ
31
Pɛ Lemuɛlɩ bɩtar-dɩndɩ mʋ tɩntʋ. Ya maa yɩ Wɛ kwǝrǝ kalʋ o nu na brɩ-o tɩn.2 Nii mʋ! Nmʋ yɩ amʋ tɩtɩ pugə bu mʋ.
Nmʋ lʋra kam nan tɔgɩ wɛ-loro baŋa nɩ mʋ.
Kʋntʋ tɩn, pʋrɩ n zwa sɩ n cəgi.
3 Yɩ da kaana ŋwaanɩ n cɔgɩ n dam,
sɩ bantʋ dwi yǝni ba pa
sɩ pwa zanzan na ba cavɩɩra mʋ.
4 A bu Lemuɛlɩ, pwa daɩ sɩ ba nyɔ sana.
Ba nan daɩ sɩ ba kɩ fra dɩ sa-dɛɛra.
5 Sa-nyɔrɩ wʋ́ pa ba swe
Wɛ niə yam na brɩ te mʋ,
yɩ ba ja cɩga kam ba ju
nabwənə yigə nɩ.
6 Sa-dɛɛra maŋɩ dɩ balʋ na je
ba cəgi ba tʋʋnɩ tɩn mʋ,
ba tɩɩna maama na ti tɩn ŋwaanɩ.
7 Ba na bugi, baá swe ba yinigə dɩ ba cam dɩm ni nɩ.
8 Puri n ni n ŋɔɔnɩ n pa balʋ na warɩ ba ŋɔɔnɩ tɩn.
Nmʋ maŋɩ sɩ n joŋi nɔɔna balʋ ba na kwe ba yagɩ tɩn jara mʋ n ja n pa-ba.
9 Zaŋɩ n ŋɔɔnɩ jaja
yɩ n bʋrɩ cɩga bʋra.
Zɩgɩ nabwənə dɩ yinigə tiinə kwaga nɩ sɩ ba na ba cɩga.a
Ka-yʋrʋ taanɩ
10 Ka-yʋrʋ yuu yim cana zanzan.
O dwi jɩgɩ lʋnnɩ dɩ dwe kandwa-ŋʋna dwi dwi.
11 O barʋ ba liǝ dɩ kʋlʋkʋlʋ.
O ba jaanɩ o barʋ jɩjaanɩ o cɔga.
12 Ka-yʋrʋ kɩ o barʋ lanyɩranɩ mʋ maŋa maama,
yɩ o ba paɩ o naɩ zʋnnɩ.
13 O yǝni o sɔ gwaarʋ mʋ
waarʋ dɩ fʋnyʋgʋ maŋa ŋwaanɩ,
yɩ o tʋŋɩ o tɩtʋŋa dɩ wʋpolo.
14 O nyɩ dɩ nabwǝǝru tɩlʋ na zɩŋɩ pipiu zɩla tɩ tui tɩn mʋ.
O maa ve yigə yigə o jaanɩ wʋdiiru o tui o paɩ o digə tiinə.
15 Tɩga ba pʋʋr‑o sara nɩ,
dɩ o na zaŋɩ o saŋɩ wʋdiu
o pa o digə tiinə,
sɩ o tɩntʋŋ-kaana bam dɩ na ba nyɩm.
16 O maa bʋŋɩ kara wʋbʋŋa, yɩ o yəgi-ka.
O maa daarɩ o kwe səbu kʋlʋ o na tʋŋɩ o na tɩn o ma o jəri vinyə tweeru.
17 O ba sɛ o paɩ yawɔrɔ,
yɩ o tɩtɩ cɛ dɩ tɩtʋŋ-dɛɛra.
18 O maa na sɩ kʋlʋ o na tʋŋɩ o na tɩn jɩgɩ nyɔɔrɩ kʋ pa-o,
o kanɩa mim zəŋi dɩ yagɩ da kʋntʋ mʋ taan tɩtɩɩ nɩ.
19 O tɩtɩ mʋ dʋlɩ garyi
yɩ o sɔ gwaarʋ o paɩ o digə tiinə.
20 O yɩ wʋ-yoŋo tu mʋ,
o yəni o zəni nabwonə dɩ yinigə tiinə.
21 Waarʋ maŋa nɩ o bá taa liǝ
o digə tiinə ŋwaanɩ,
Bɛŋwaanɩ, ba maama jɩgɩ gwar-ŋʋnnʋ
sɩ ba ma ba kwǝli ba tɩtɩ.
22 O yǝni o nyaanɩ gwaarʋ mʋ
sɩ o ma kwɛ o pwəgə je,
yɩ kʋlʋ o na kɩ o yɩra nɩ tɩn
yǝni kʋ joŋ-o lanyɩranɩ.
23 O barʋ na yǝni o jeeri tɩʋ kʋm kaporo nɩ,
nɔɔna maama pa‑o zulə mʋ,
yɩ ba gar-o ba kɩ kʋ nakwa wʋnɩ.
24 O sɔ gar-fɩfalɩ dɩ sɩ kili mʋ
o yəgi o pa pipiu tiinə.
25 O yɩ nɔn-dɛɔ mʋ
yɩ nɔɔna nɩg-o.
O maa ba liǝ dɩ kʋlʋ na wʋ́ kɩ jwa seeni tɩn.
26 O yǝni o kuri o ni bɩtarbiǝ mʋ o ŋɔɔnɩ dɩ swan.
O ni-taanɩ brɩ lanyɩranɩ kǝm na yɩ te mʋ.
27 O yɔɔrɩ o cɛ dɩ tɩtʋŋa mʋ,
yɩ o nii o digə tiinə baŋa nɩ lanyɩranɩ.
28 O biə wʋ́ kɩ daanɩ ba sɛ nɩ o jɩgɩ yu-yoŋo.
O barʋ dɩ maa wʋ́ tee-o o wɩ:
29 «Kaana zanzan kɩ wo-kurə.
Nmʋ nan mʋ di yigə
ba maama wʋnɩ.»
30 Yatɩga waɩ ka gana,
lam dɩ nan waɩ dɩ tiə.
Kʋ nan na yɩ kaanɩ wʋlʋ na kwarɩ Baŋa-Wɛ tɩn,
kʋ tu maŋɩ dɩ zulə mʋ.
31 Tee‑o sɩ kʋ maŋɩ dɩ
o tɩtʋŋa na yɩ te tɩn.
Ja-o n yi tɩʋ kʋm kaporo,
sɩ n pa o na zulə nɔɔna yigə nɩ.