6
23
Dɩdɛɛrʋ na bǝŋi-msɩ á di wʋdiu daanɩ,
ta n ye sɩ n ja n tɩtɩ lanyɩranɩ.
2 Pɩɩnɩ n fra yam,
sɩ n yɩ di n ni.
3 Yɩ zaŋɩ n pa n fra zʋ o wodi-ywəənu tɩm,
sɩ tɩ yɩ cɩkʋ mʋ n ŋwaanɩ.
7
4 Yɩ gʋ n tɩtɩ sɩ n ma n duni.
Nan bʋŋɩ lanyɩranɩ
sɩ n zuri n yɩra.
5 N na yɔɔrɩ n da n na səbu,
kʋ nan je mʋ kʋntʋ,
nɩ kʋ puli vwana mʋ
kʋ jaanɩ wɛɛnɩ kʋ je tɩn.
8
6 Yɩ ve n jǝni dɩ wʋ-lʋŋ-nyɩm
n di wʋdiu,
nɩ kʋ na maŋɩ kʋ ywəmmə te dɩ.
7 Nɔɔnʋ wʋm kʋntʋ dwi yǝni o jeeli nmʋ na di te tɩn mʋ.
O waɩ o tɛ dɩ nmʋ nɩ:
«Di nmʋ na lagɩ te!»
Kʋ nan wʋ yi o wʋʋ.
8 Nmʋ na maŋɩ n di fɩɩn dɩ,
nń twanɩ-kʋ n yagɩ.
Nmʋ ya na tee-o te tɩn maa wʋ́ ji kafɛ.
9
9 Yɩ ja swan taanɩ n yi nɔn-joro,
sɩ o bá nɩgɩ-dɩ.
10
10 Yɩ fʋfɔ sisəm dɩlʋ dɩ́ nabaara bam na lɔgɩ ba pa daanɩ tɩn.
Nan yɩ di n zʋ bɩtarʋ kara,
sɩ o bwǝnǝ ŋwaanɩ.
11 Baŋa-Wɛ nan yɩ kʋ tu yɩra nɔɔnʋ na zɩgɩ o kwaga nɩ tɩn.
DƖ maa wʋ́ ŋɔɔnɩ DƖ pa‑o.
11
12 Yɔɔrɩ n sɩɩnɩ n yiǝ n zaasɩ,
sɩ n wanɩ n jɩgɩ wʋbʋŋa zanzan.
12
13 Yɩ vɩn sɩ n kʋrɩsɩ n bu.
N na waar‑o, o bá tɩ.
14 N nan ta wʋ́ cɩ-o dɩ tʋʋnɩ.
13
15 Amʋ bu, nmʋ yi na pʋʋrɩ mʋ,
amʋ wʋʋ wʋ́ poli.
16 Amʋ wʋ́ yɔɔrɩ a taa caka mʋ,
nɩ nmʋ ni na ŋɔɔnɩ cɩga taanɩ yɩranɩ.
14
17 Yɩ pa n wʋbʋŋa zʋ lwarɩm-kərə wʋnɩ.
Nan sɩɩnɩ n yiǝ sɩ n ta n kwarɩ Baŋa-Wɛ dɛ maama wʋnɩ.
18 Tɩɩna wʋra jwa seeni ya pa‑m,
ya nan bá ji kafɛ.
15
19 Amʋ bu, cəgi a taanɩ sɩ n ja swan.
Pa n kikiə taa tɔgɩ cwǝŋǝ lanyɩranɩ.
20 Yɩ zaŋɩ n ta n tɔgɩ dɩ balʋ na tiini ba nyɔ sana zanzan tɩn.
Yɩ da dɩ balʋ na tiini ba di nwana ba jaanɩ ba kɛ jɩŋa tɩn.
21 Yinigə mʋ wʋ́ ja sa-nyɔra dɩ nɔn-kwəllu.
Ba yawɔrɩ kikiə yam wʋ́ pa ba ji nɔn-kayɛ.
16
22 N dɛ n ko baŋa mʋ
n ba lʋgʋ baŋa.
Ta n cəgi o taanɩ.
Nan yɩ vɩn n nu zaasɩm
o kʋkwɩɩrʋ baŋa nɩ.
23 Kwaanɩ sɩ n ja cɩga yɩra.
N nan na jaanɩ-ka,
yɩ kwe-ka n yəgi.
Ta beeri sɩ n na yi-pʋrʋ,
dɩ wʋbʋŋ-ŋʋna, dɩ yəno.
24 Bu yi na pʋʋrɩ,
o ko sɩɩnɩ o cakɩ mʋ,
Nɔɔnʋ wʋlʋ na lʋgɩ wʋbʋŋa tu tɩn jɩgɩ wʋpolo mʋ.
25 Pa n ko dɩ n nu yum
taa wʋ wɛɛnɩ.
Ta kɩ kʋlʋ na wʋ́ pa n nu wʋpolo tɩn.
17
26 Amʋ bu, fɔgɩ n cəgi a taanɩ. Zaasɩ a ŋwɩa na yɩ te tɩn, sɩ n lwarɩ vəŋə. 27 Ta n ye nɩ ka-boro yɩ goŋ-canluŋu mʋ. Ka-tʋla kam yɩ vʋlɩ dɩlʋ ni na yɩ mɩmɩna tɩn mʋ. 28 Ba səgi mʋ nɩnɛɛnɩ vɩnvɩrna, sɩ ba vrɩ baara ba kaana tee nɩ.
18
29 Wɔɔ mʋ wʋ lɛɛrʋ wʋnɩ tɩntʋ? Wɔɔ mʋ tiini o jɩgɩ ŋwaŋa tɩntʋ? Wɔɔ mʋ soe najara? Wɔɔ pʋmpʋna mʋ gaalɩ? Wɔɔ fufwələ mʋ dwe o tɩtɩ? Wɔɔ yiǝ mʋ sɩɩnɩ nɩ jana tɩntʋ? 30 Kʋ yɩ balʋ na kwe ba tɩtɩ ba pa sana tɩn mʋ, yɩ ba gwaanɩ sa-dɛ daanɩ ba nyɔa ba ba kwəri tɩn mʋ. 31 Yɩ pa n fra zʋ sana bam ba lam ŋwaanɩ, nɩ ba na maŋɩ ba fufugi te maama zʋŋ-biə wʋnɩ, naa ba na duri ba tu pugə wʋnɩ solololo dɩ. 32 Ka na jaanɩ wʋlʋ, ka zaga nɩ bɩsankwɩa mʋ yɩ ka vɩan dɩ nyɩ dɩ anakɔyɩbanyi vɩan. 33 N yiǝ wʋ́ taa kaagɩ ya nii mʋ liirǝ liirǝ yɩ n wʋbʋŋa maama vugimi wo-yɔɔrʋ baŋa nɩ. 34 Nmʋ dɔɔm wʋnɩ tɩga kam nyɩ dɩ ka gigiri mʋ. N laan ma n pipirǝ yɩ n yɩ bɩlɩ-bɩlɩ n sara wʋnɩ. 35 Nmʋ laan maa wʋ́ ta nɩnɛɛnɩ, «Wɔɔ mʋ jɩgɩ-nɩ o yigə yɩ a ba na‑o? Sana bantʋ bá loori a yiǝ nɩ sɩ a daa vu a joŋi sa-laŋa na?»