22
Yɩrɩ-ŋʋm garɩ jɩjɩgɩrʋ zanzan.Nɔɔna na nɩgɩ‑m garɩ n na jɩgɩ səbu-poŋo dɩ səbu-sɩŋa zanzan.
2 Baŋa-Wɛ mʋ naanɩ nabiinǝ maama,
kʋ na maŋɩ kʋ yɩ nadunə dɩ nabwənə dɩ.
3 Wʋbʋŋa tu duri o səgi cam mʋ sɩ dɩ yɩ yi‑o.
Nayəri-nyɩm nan wʋ́ duri o zʋ dɩ wʋnɩ mʋ yɩ o yaarɩ.
4 Nmʋ na tu n tɩtɩ
yɩ n kwarɩ Baŋa-Wɛ,
nmʋ wʋ́ na jɩjɩgɩrʋ,
dɩ zulə, dɩ mʋmwɛ-dɛɛrɩ.
5 Vwa-nyɩm cwəŋə kam su dɩ sabarɩ mʋ dɩ cɩgɩrʋ.
Wʋlʋ nan na lagɩ sɩ o yɩrɩ o ŋwɩan tɩm, wʋ́ kɩ baŋwɩan mʋ dɩ cwəŋə kam kʋntʋ.
6 Kʋrɩsɩ n bu sɩ o da cwǝŋǝ.
O na kɩ nɔɔnʋ,
o bá ywəri ka wʋnɩ.a
7 Nadunə di dam mʋ nabwənə baŋa nɩ.
Jɩn-diru maa yɩ gambaa jɩnɩ tu tee nɩ.
8 Nɔɔnʋ wʋlʋ na dugi balɔrɔ tɩn, o wʋ́ ba o zagɩ o balɔrɔ kʋm biə mʋ,
yɩ o wʋ-lʋŋʋ fɩna kam dɩ nan wʋ́ je mʋ mimm.
9 Wɛ yu-yoŋo wʋ wʋ-yoŋo tu baŋa nɩ mʋ,
bɛŋwaanɩ, kʋ tu ye nɩ
yinigə tiinə dɩ ni di.
10 Lɩ-na nɔn-twɩɩnʋ á wʋnɩ sɩ kantɔgɔ je.
Tʋrʋ dɩ najara maama dɩ maa wʋ́ ti.
11 Wʋ-poŋo tu ni-taanɩ na bwǝnǝ,
kʋ tu dɩ pɛ wʋ́ di ciloŋo mʋ.
12 Baŋa-Wɛ yɔɔrɩ DƖ yɩrɩ wʋbʋŋa tiinə mʋ,
sɩ kʋ na yɩ nɔn-ŋʋllʋ,
DƖ jagɩ ba wʋbʋŋa mʋ DƖ yaga.
13 Yawɔrɩ-nyɩm maŋɩ digə nɩ yɩ o wɩ:
«A na nuŋi pooni nɩ,
nyoŋo wʋ́ ja-nɩ!»
14 Ka-tʋla ni-taanɩ yɩ cɩkʋ mʋ.
Kʋ maa jaanɩ balʋ Baŋa-Wɛ banɩ na zaŋɩ dɩ ba tɩn.
15 Biə wʋbʋŋa yɔɔrɩ ya su
dɩ busɔɔnɩ kikiə mʋ.
Nmʋ nan na yɔɔrɩ n zaasɩ-ba,
baá tʋ cwǝŋǝ nɩ.
16 Wʋlʋ na bɛɛsɩ nabwənə
sɩ o ma o na nyɔɔrɩ tɩn,
dɩ wʋlʋ na wǝli nadunə dɩ pɛɛra tɩn,
yinigə wʋ́ ja ba maama.
Faŋa tu zaasɩm dɩm
17 Fɔgɩ n cəgi faŋa tu kwiə yam,
sɩ n daarɩ n tɔgɩ kʋlʋ a na brɩ-m tɩn.
18 Bɛŋwaanɩ, ya na tigi n bɩcarɩ nɩ,
yɩ n waɩ-ya n lwǝni n brɩ nɔɔna,
nń di ywəəni ya baŋa nɩ.
19 Kʋ na yɩ nmʋ,
a zɩm pɛ n lwarɩ wǝǝnu tɩntʋ maama,
sɩ kʋ pa n tɩɩna taa wʋ Baŋa-Wɛ tee nɩ.
20 Amʋ nan pʋpʋnɩ kwiə fiintɔ mʋ
a tiŋi sɩ a brɩ-m.
Ya maa yɩ yalʋ na kwe nɔɔnʋ kwiə
yɩ ya daarɩ ya pa o jɩgɩ wʋbʋŋa tɩn.
21 Bɩtar-dɩndɩ yam wʋ́ pa n lwarɩ taanɩ
dɩlʋ na yɔɔrɩ dɩ jɩgɩ cɩga tɩn,
sɩ n wanɩ n ta cɩga kam
dɩ balʋ na tʋŋɩ-m tɩn.
1
22 Yɩ zaŋɩ n vrɩ nabwəm wǝǝnu
o na bwǝnǝ tɩn ŋwaanɩ.
Nan yɩ vanɩ yinigə tiinə bʋra.
23 Baŋa-Wɛ mʋ wʋ́ ŋɔɔnɩ DƖ pa-ba,
yɩ DƖ pa kʋ zʋ balʋ na jɩgɩ-ba ba bɛɛsɩ tɩn.
2
24 Yɩ di ciloŋo dɩdaanɩ ban-lʋm nyɩm.
Nan cɩ n tɩtɩ dɩ wʋntʋ dwi dɩm.
25 Kʋ na dagɩ kʋntʋ nmʋ lagɩ n ba n lwən-o mʋ,
sɩ o yɩ zaŋɩ o ba o ji cɩkʋ nmʋ ŋwɩan kam ŋwaanɩ.
3
26 Yɩ lɩ n yuu n zɩgɩ
sɩ n ŋwɩ nɔn-gaa jɩnɩ.
27 Nmʋ na wʋ wanɩ n ŋwɩ:
baá ba ba kwe n sara ba daarɩ‑m.
4
28 Yɩ fʋfɔ sisəm dɩlʋ dɩ́ nabaara bam na lɔgɩ ba tiŋi ba pa daanɩ tɩn.
5
29 Nɔɔnʋ jɩŋa tɩtʋŋa na tɔgɩ cwǝŋǝ,
kʋ tu wʋ́ tʋŋɩ o pa pwa
yɩ kʋ daɩ nɔn-yɔɔrʋ.