21
Baŋa-Wɛ mʋ te pɛ wʋm wʋbʋŋa.DƖ ma pa ya tɔgɩ
DƖ na lagɩ te tɩn,
nɩ DƖ na brɩ bu-tʋla
ka na wʋ́ tʋlɩ te tɩn.
2 Nɔɔna yǝni ba bʋŋɩ nɩ
ba kikiə maama tɔgɩ cwǝŋǝ mʋ.
Baŋa-Wɛ nan yǝni DƖ maŋɩ
ba wʋbʋŋa yam mʋ
DƖ lwarɩ ya na yɩ te tɩn.
3 Nmʋ na tʋŋɩ kʋ lɩ
yɩ n tɔgɩ cɩga,
garɩ n na zwɛ vara
n kɩ kaanɩm n pa Baŋa-Wɛ.a
4 Nɔn-balɔrɔ na-vəli
yɩ lwarɩm yɩranɩ mʋ,
dɩ o na paɩ o dwe maama
yɩ o brɩ o tɩtɩ tɩn ŋwaanɩ.
5 Wʋbʋŋa tu na cɛ dɩ tɩtʋŋa,
oó vu yigə.
Yinigə maa wʋ́ ja wʋlʋ na wuuri sɩ o duni tɩn.
6 Jɩjɩgɩrʋ tɩlʋ nɔɔna na fɔɩ vwan ba naɩ tɩn ba daana.
Tɩ nyɩ dɩ nyʋa na maa je tɩn mʋ.
Tɩ maa wʋ́ ja-o tɩ gʋ.
7 Nɔn-balwaarʋ wʋ-lʋŋ-tɩtʋŋa yam
wʋ́ joori ya cɔgɩ-ba mʋ,
ba na vɩn sɩ ba kɩ cɩga tɩn ŋwaanɩ.
8 Wʋlʋ na wʋ vwan wʋnɩ tɩn tɩtʋŋa ba tɔgɩ cwǝŋǝ.
Cɩga tiinə kikiə nan yɔɔrɩ ya yɩ lanyɩranɩ mʋ.
9 Nɔɔnʋ na beeri gugoro o nayuu nɩ o tigi da
garɩ o na zʋʋrɩ dɩ kaanɩ wʋlʋ na yɩ najarjarʋ.
10 Nɔn-balɔrɔ jɩgɩ lwarɩm pugə mʋ o je.
Wʋntʋ ba duri o doonə yibwənə maŋa dɩ maŋa!
11 N na magɩ nɔɔnʋ wʋlʋ na pupogi nɔɔna tɩn,
nayəri-nyɩm wʋ́ tɔgɩ da
o zaasɩ swan.
N ma n na brɩ wʋbʋŋa tu,
oó jɩgɩ yəno mʋ.
12 Cɩga Tu wʋm ye kʋlʋ na jɩgɩ kʋ kɩ nɔn-balwaarʋ sam nɩ tɩn.
O maa paɩ cɔgɩm tui ba baŋa.
13 Nabwənə na loori zǝnǝ
yɩ n vɩn sɩ n cəgi,
nmʋ dɩ na lagɩ zǝnǝ,
ba bá ləri.
14 Pɛɛrɩ na səgi dɩ pa,
dɩ gʋɩ banɩ.
Dim dɩlʋ na kwǝli dɩ pa tɩn
dɩ zuri ban-lʋm mʋ.
15 Cɩga na jɩgɩ ka tʋŋɩ je sɩlʋ nɩ,
nɔn-ŋʋna caka mʋ,
wʋ-lʋn-nyɩna fʋna.
16 Wʋlʋ na ba bʋŋɩ o yi
yɩ o kɩ kǝm tɩn,
wʋ́ kweeli yibeeli wʋnɩ mʋ.
17 Yinigə mʋ wʋ́ ja wʋlʋ na soe o fra wəənu kǝm tɩn.
Wʋlʋ na soe sa-nyɔrɩ dɩ wʋdi-fɔrɔ tɩn bá duni.
18 Nɔn-balwaarʋ yǝni ba joŋi nɔn-ŋʋna cam ba zɩŋɩ mʋ,
yɩ nɔn-ŋʋllʋ ləri ba joŋi cɩga tiinə lɛɛrʋ tɩm.
19 Nɔɔnʋ na duri o vu kagʋa yuu o zʋʋra,
gara o na zʋʋrɩ dɩ kaanɩ wʋlʋ na yɩ najarjarʋ dɩ ban-lʋm tu tɩn.
20 Yi-pʋrɩ-nyɩm laɩ wo-laarʋ dwi dwi dɩ nugə mʋ o zɩgɩ o sɔŋɔ wʋnɩ.
Nɔn-joro nan ba di o daarɩ o zɩga.
21 Nɔɔnʋ na beeri lam dɩ sono je,
kʋ tu wʋ́ na mʋmwɛ-dɛɛrɩ,
dɩ duni, dɩ zulə mʋ.
22 Yi-pʋrɩ-nyɩm wʋ́ wanɩ tɩʋ
kʋlʋ na su dɩ nɔn-babɛ tɩn.
O maa wʋ́ vaarɩ mɛ ba na dalɩ tɩn o dɩ tɩga nɩ.
23 Nɔɔnʋ wʋlʋ na waɩ o ni-bɩtarɩ maama o yɩrɩ tɩn, o yɩrɩ o tɩtɩ dɩ wʋ-cɔgɔ mʋ.
24 Nɔɔnʋ wʋlʋ na gooni nɔɔna yɩ o jɩgɩ kamunni tɩn,
kʋntʋ tu yɩrɩ mʋ yɩ nɔn-poonu.
O tʋŋɩ dɩ cwa-bam mʋ o kamunni dɩm ŋwaanɩ.
25 Wʋlʋ fra na zʋ wǝǝnu zanzan
yɩ o yawɔrɔ gaalɩ,
kʋ tu beeri tʋʋnɩ o pa o tɩtɩ mʋ.
26 Kʋ tu je o tɩɩnɩ sɩ o na wǝǝnu o wǝli da mʋ.
Nɔn-ŋʋna nan yɔɔrɩ ba paɩ ba wǝǝnu mʋ
yɩ kʋlʋkʋlʋ bá cɩ ba yigə.
27 Nɔn-balwaarʋ kaanɩm dɩm nan yɩ wo-balɔrɔ mʋ.
A ba kɛ a tɛa ba laan na jɩgɩ kaanɩm ba bɩɩnɩ dɩ nɔn-gʋra wʋbʋŋa ba bɩcara nɩ.
28 Wʋlʋ na fɔɩ vwan taanɩ dim baŋa nɩ,
kʋ tu taanɩ wʋ́ maŋɩ tɩga nɩ mʋ.
Wʋlʋ nan na bʋŋɩ o yi,
ba bá cɩ kʋ tu maana yam.
29 Nɔɔnʋ wʋlʋ na kɩ balɔrɔ tɩn yəni o ywanɩ o yigə mʋ.
Kʋ daarɩ wʋlʋ na yɩ nɔn-ŋʋm tɩn, o na-vəli sɩm tɔgɩ cwəŋə mʋ lanyɩranɩ.
30 N na ye tɩga te dɩ,
dɩ n na jeeli n tiŋi mɛ dɩ mɛ dɩ,
n bá dwəni dɩ Wɛ sɩ n di.
31 Nabiinu wʋ́ wanɩ o kwɛ o sisəŋ-nɔɔnʋ o ti
sɩ o vu najara wʋnɩ.
Baŋa-Wɛ nan mʋ lagɩ DƖ di najara yam.