20
Sa-nyɔrɩ paɩ nɔɔnʋ tʋŋɩ jwərim mʋ.Sa-dɛɛra maa paɩ nɔɔnʋ soe najara.
Sana na ganɩ wʋlʋ maama tɩn ba jɩgɩ swan.
2 Pɛ na wʋ ban-zɔŋɔ wʋnɩ, kʋ nyɩ dɩ nyoŋo na suuri tɛ tɩn mʋ.
Nɔɔnʋ na fɔgɩ o wəli banɩ dɩm kʋntʋ, kʋ tu kwe o ŋwɩan mʋ o kɩ cam wʋnɩ.
3 Wʋlʋ na cɩ o tɩtɩ dɩ najara tɩn wʋ́ na yɩrɩ.
Kʋ daarɩ nɔn-joro beeri najara je mʋ sɩ o kɩ.
4 Yawɔrɩ-nyɩm na kwarɩ varɩm tɩn,
baá taa tʋŋɩ faa yɩ o je o nii mʋ.
5 Nabiinu wʋbʋŋa luunə nɩ nɩnɩʋ wʋ na-luŋə doŋ mʋ.
Wʋbʋŋa tu nan mʋ waɩ-ya o vaŋɩ o lɩa.
6 Zanzan tɛ dɩ ni-vɔɔ nɩ: ba yɩ cɩga tiinə.
Cɩga tu nan ba yi.a
7 Nɔn-ŋʋm ŋwɩ o ŋwɩa pa ka tɔgɩ cwǝŋǝ mʋ.
O biə balʋ na wʋ́ saŋɩ o kwaga ba ba tɩn jɩgɩ yu-yoŋo.
8 Pɛ na jǝni sɩ o di nɔɔna taanɩ,
o maanɩ taanɩ dwi maama mʋ o niə,
sɩ o lɩ lwarɩm o yagɩ.
9 Wɔɔ mʋ wʋ́ wanɩ o ta nɩ:
o wʋbʋŋa maama yɔɔrɩ ya yɩ cɩga,
yɩ lwarɩm tǝrǝ o ŋwɩa wʋnɩ?
10 Baŋa-Wɛ culi sɩ ba kɩ kampinə,
Kʋ na yɩ dɩ duuni maŋɩm laŋa nɩ, na bwaŋa maŋɩm laŋa nɩ.
11 Bu-dʋŋʋ tɩtʋŋ-nɛ mʋ paɩ ba maŋɩ ba lwarɩ nɩ
o na-vəli wʋ́ kɩ lam, dɩ wʋ́ yɔɔrɩ.
12 Zwa na cǝgǝ yɩ yiǝ dɩ nii tɩn, Baŋa-Wɛ mʋ kɩ-tɩ.b
13 Yɩ ta n dɔ zanzan, sɩ yinigə wʋ́ ja‑m.
Nan pʋʋrɩ n yɩra sɩ n ta n di n sui.
14 Yəllu maama tɛ nɩ wǝǝnu yǝgǝ dana mʋ.
O nan na yəgi o ti, o wɩ o pugi mwalɩ.
15 Səbu-sɩŋa dɩ kandwa-ŋʋna waɩ tɩ daga tɩ gaalɩ.
Kʋ nan na yɩ yǝno taanɩ,
kʋ tiini kʋ jɩgɩ lʋnnɩ.
16 Nɔɔnʋ na sɛ sɩ o zɩgɩ
sɩ vəru di jɩnɩ nmʋ tee nɩ,
kʋ maŋɩ sɩ n joŋi kʋ tu gwar-bwərə mʋ n wǝli da.
17 Kampim wǝǝnu dim ywəmmə.
Ama n ni dʋm na tu dɩ ba dɩ su, kʋ laan wʋ́ ji kandwa-wɔlɔ mʋ n ni dɩm wʋnɩ.
18 Bwɛ dɩ n donnǝ sɩ n daarɩ
n kikili n wʋbʋŋa jǝgǝ dɩdʋa.
Nan yɩ ve najara nɩ yɩ n wʋ joŋi kwiə.
19 Ta n ye bɩbarɩ nyɩm ni nɩ,
sɩ o warɩ o pɩɩnɩ taanɩ.
Ta n cɩ n tɩtɩ dɩ balʋ na warɩ ba niə ba pu tɩn.
20 Wʋlʋ na jɩgɩ o ko naa o nu yɩrɩ o cɔga,
o mʋmwɛ wʋ́ da dɩ ti,
nɩ mim na da dɩ dwe
tɩtɩɩ nɩ te tɩn mʋ.
21 N ko na tɩga o daarɩ jɩjɩgɩrʋ o pa‑m yɩ n muri,
tɩ bá kwɛ‑m n nɔn-kəri maŋa nɩ.
22 Yɩ bʋŋɩ n tɩtɩ nɩ n wɩ:
«Amʋ wʋ́ yiri lwarɩm kikiə jɩnɩ mʋ.»
Ta n cəgi sɩ Baŋa-Wɛ jaŋɩ DƖ pa‑m.c
23 Baŋa-Wɛ vaɩ kampin-nyɩna ni-taanɩ.
Bwɛn sɩlʋ na daɩ cɩga cɩga tɩn ba lana DƖ tee nɩ.
24 Baŋa-Wɛ mʋ tiŋi cwǝŋǝ DƖ pa dɩbam sɩ dɩ́ taa veǝ.
Nabiinu nan wʋ́ kɩ tɛ mʋ o lwarɩ kʋlʋ na wʋ yigə nɩ tɩn?
25 N na wuuri n ta nɩ:
«A pɛ woŋo kʋntʋ Wɛ mʋ,»
pa n bʋŋɩ sɩ n kwanɩ n ni-gonim dɩm,
n kwe cɩkʋ mʋ n ja n tɩtɩ kʋntʋ.
26 Pɛ na nii o nɔɔna baŋa nɩ dɩ swan,
o yǝni o lɩ nɔn-balwaarʋ tɩm mʋ sɩ o magɩ-ba.
27 Wɛ kwe wʋbʋŋa DƖ kɩ nabiinu maama wʋnɩ mʋ.
Ya nyɩ dɩ min-mɔɔla mʋ ya brɩ dɩ́ wʋʋ kʋm cɩga cɩga.
28 Pɛ na dɛ cɩga ŋwaanɩ o soe nɔɔna,
kʋntʋ mʋ wʋ́ kwǝl‑o.
Kʋ yɩ o sono kʋm mʋ paɩ
sɩ o paarɩ dɩm zɩga.
29 Nɔn-dʋnnʋ jɩgɩ wʋpolo ba dam baŋa nɩ mʋ.
Nankwɩn nan wʋ́ magɩ nɩnwaŋa dɩ ba yu-pwe mʋ.
30 Ba na kɩ-m zʋnnɩ pa kʋ cɛ n yɩra,
nń yagɩ lwarɩm kikiə mʋ.
Magɩrʋ zanzan kʋrɩsɩ‑m mʋ sɩ n ləni n wʋʋ.