19
Yinigə tu na je dɩ o cɩgagarɩ nɔn-joro na jɩgɩ niǝ yale yale.
2 N na lagɩ kǝm yɩ n laan yəri-ka,
kʋ ba lana.
Nɔɔnʋ na ve lɩla lɩla, o lagɩ o tʋ lwarɩm wʋnɩ.
3 Nabiinǝ tɩtɩ jwərim mʋ jɩgɩ-ba dɩ cɔga,
yɩ ba joori ba jɩgɩ dɩ Baŋa-Wɛ.
4 Jɩjɩgɩrʋ tu wʋ́ na badonnǝ zanzan.
Yinigə tu badonnǝ nan duri ba daarɩ‑o mʋ.
5 Wʋlʋ na fɔɩ vwan taanɩ dim baŋa nɩ,
kʋ tu wʋ́ na waarɩm.
Wʋlʋ maa na gaanɩ vwan o tiŋi, o dɩ bá lu.
6 Nɔɔna zanzan beeri sɩ nadum mʋ taa lagɩ ba taanɩ.
Nɔɔna maama maa lagɩ wʋ-yoŋo tu ni-taanɩ.
7 Yinigə tu cʋrrʋ tɩtɩ lɔ‑o mʋ.
O badonnǝ dɩ nan bá duri ba daarɩ‑o na?
O na kwaanɩ o tɔgɩ-ba o loori te dɩ,
o bá na-ba.
8 N na jɩgɩ yǝno,
nń nii n tɩtɩ baŋa nɩ.
Yi-pʋrʋ maa wʋ́ pa‑m yigə-vəŋə.
9 Wʋlʋ na fɔɩ vwan taanɩ dim baŋa nɩ,
kʋ tu wʋ́ na waarɩm.
Wʋlʋ maa na gaanɩ vwan o tiŋi, o yɩrɩ wʋ́ je.
10 Nɔn-joro wʋ maŋɩ sɩ o taa di o ni.
Kʋ laan nan wʋ́ kɩ tɛ mʋ
sɩ gambaa di dam pabiə baŋa nɩ?
11 Yi-pʋrɩ-nyɩm pɩɩnɩ o banɩ mʋ.
Ba na maŋɩ ba cɔgɩ o yigə,
o kɩ nɩ o ba naɩ mʋ tɩn.
12 Pɛ banɩ na zaŋɩ,
kʋ nyɩ dɩ nyoŋo mʋ laara.
O nan na kɩ wʋlʋ yu-yoŋo,
kʋ nyɩ dɩ nyɔnɔ mʋ tʋ ga-lɛɛrʋ baŋa nɩ.
13 Bu-joro yɔɔrɩ o paɩ kʋ jɩgɩ o ko mʋ kʋ ni.
Kaanɩ wʋlʋ na yɩ najarjarʋ nyɩ dɩ dʋa na nɩa ka ba waara tɩn mʋ.
14 Kwə kwe jɩjɩgɩrʋ mʋ ba paɩ ba biə,
sɩ kʋ na yɩ ka-yʋrʋ, Baŋa-Wɛ yɩranɩ mʋ paɩ.
15 Yawɔrɔ paɩ nɔɔnʋ dɔ mʋ,
nɔɔnʋ wʋlʋ na ba lagɩ tɩtʋŋa tɩn, kana wʋ́ ja-o mʋ.
16 Wʋlʋ na sɛ zaasɩm tɩn wʋ́ joŋi o tɩtɩ o yagɩ.
Kʋ daarɩ, n na jɩgɩ Wɛ niə yam n goonə,
nń tɩ mʋ.
17 Wʋlʋ na jɩgɩ wʋ-yoŋo dɩ yinigə tiinə,
kʋ tu jɩnɩ o pa Baŋa-Wɛ mʋ.
Wɛ nan wʋ́ joori o yiri kʋ tu jɩnɩ o pa‑o.
18 Dɩ n biə cwǝŋǝ nɩ yɩ pwələ ta tigi ka pa‑m.
Yɩ wǝli-ba sɩ ba jwa na cɔgɩm.a
19 Nɔɔnʋ wʋlʋ na paɩ o cwɛ tiini dɩ zaŋɩ tɩn,
kʋntʋ tu maŋɩ sɩ o na cam mʋ kʋ ŋwaanɩ.
N na wʋ pɛ o na cam dɩm, nmʋ laan ta fɔgɩ n pa-o baarɩ mʋ n wəli da.
20 N na cəgi kwiə yɩ n joŋi zaasɩm,
n jwa wʋ́ ji yi-pʋrɩ-nyɩm mʋ.
21 Nabiinu na bʋŋɩ sɩ o kɩ kʋlʋ tɩn ba lwarɩ kʋ tiə,
Kʋ nan yɩ Baŋa-Wɛ wʋbʋŋa yam mʋ wʋ́ zɩgɩ.
22 Kʋlʋ na yɩ wo-cɛɔ tɩn mʋ maŋɩ sɩ nɔɔna brɩ sono daanɩ.
Yinigə tu maa garɩ vwa-fɔrʋ.
23 Nɔɔnʋ na kwarɩ Baŋa-Wɛ,
o wʋ́ na ŋwɩa.
O ta wʋ́ sin mʋ cɔnɔ,
yɩ cɔgɩm bá yi‑o.
24 Yawɔrɩ-nyɩm warɩ o pa o jɩŋa vu o ni.
25 Nan magɩ nɔɔnʋ wʋlʋ na pupogi o donnə tɩn,
sɩ kʋʋ́ pa nayəri-nyɩm zaasɩ woŋo.
N na cogi wʋbʋŋa-tu, oó lwarɩ kʋlʋ kʋm ba na lagɩ sɩ o zaasɩ tɩn.
26 Bu wʋlʋ na kɩ o ko balwarɩm, o daarɩ o zəli o nu o yagɩ tɩn,
o kɩ o tiinə mʋ cavɩɩra, o daarɩ o cɔgɩ ba yɩrɩ.
27 Amʋ bu, n na yɔɔrɩ n vɩn zaasɩm,
n nan ywəri yəno cwǝŋǝ kam nɩ mʋ kʋntʋ.
28 Maana tu wʋlʋ na yɩ nɔn-kafɛ tɩn ba nɩgɩ sarɩya dim cwe sɩm.
Lwarɩm-kəm nan ywənə dɩ nɔn-balwaarʋ mʋ, dɩ ba niə ŋwɛn sɩm.
29 Nɔɔna balʋ na pupogi ba donnə tɩn maŋɩ dɩ waarɩm mʋ,
yɩ jwəəru maŋɩ dɩ magɩrʋ.