18
Wʋlʋ na ba yɩ dɩ nɔɔna tɩn nii o tɩtɩ yɩranɩ mʋ.O ba nɩgɩ yi-pʋrɩ-nyɩm wʋbʋŋa.
2 Jwəəru yigə tǝrǝ sɩ ba zaasɩ swan,
Bantʋ yɔɔrɩ ba nii sɩ ba ta ba wʋbʋŋa mʋ.
3 Pu-sɩŋa kikiə ve dɩ cavɩɩra mʋ,
Kəm-balwaarʋ nan ba yáalɩ nɔɔnʋ bɩle.
4 Nabiinu ni-bɩtarɩ luunə nɩ nɩnɩʋ wʋ na-luŋə doŋ mʋ.
Swan taanɩ nan nyɩ dɩ bu-tʋla na zɩgɩ buli-yi nɩ ka ve tɩn mʋ.
5 Kʋ daɩ kʋ cwǝŋǝ nɩ sɩ n wǝli nɔn-balɔrɔ sɩ o lu taanɩ wʋnɩ,
yɩ n daarɩ n cɩ wʋlʋ na yǝri woŋo ni nɩ tɩn sɩ o yɩ na bʋra.
6 Nɔn-joro ni-taanɩ jaanɩ kantɔgɔ mʋ dɩ tui.
O ŋwaŋa kam ŋwaanɩ oó su magɩrʋ mʋ.
7 Nɔn-joro ni-taanɩ mʋ joori dɩ cɔg-o.
O tɩtɩ taanɩ yǝni dɩ dɩ‑o mʋ.
8 Bɩbarɩ nyɩm ni-taanɩ nyɩ dɩ
wʋdi-yoŋo na duri solololo
kʋ tu nabiinu kana nɩ tɩn mʋ.
9 N na kwarɩ yawɔrɔ dɩ n tɩtʋŋa,
n dɩ wo-cɔgɩnʋ ba garɩ daanɩ.
10 Baŋa-Wɛ yɩrɩ dɩm yɩ dalɩm je cɩga cɩga mʋ.
Nɔn-ŋʋna maa duri ba zʋʋrɩ da yɩ ba naɩ siun.a
11 Nadum jɩjɩgɩrʋ tɩm waɩ tɩ cɩ-o dɩ cam.
O bʋŋɩ nɩ tɩ kwǝl‑o nɩ tɩʋ kəbrə na kwǝli-kʋ te tɩn mʋ.
12 Ka-zəŋi-ka-tɩtɩ mʋ yǝni kʋ loori cɔgɩm.
Ka-tu-ka-tɩtɩ dɩ maa tɔgɩ zulə yigə.
13 Nmʋ na garɩ n ləri taanɩ n ti,
yɩ n ta wʋ cəgi sɩ n lwarɩ dɩ kuri,
kʋ tɛ n kuri nɩ n jwərim dɩm kɛ jɩŋa mʋ.
14 N wʋbʋŋa na ba sɛ ya paɩ n yawɩʋ,
kʋʋ́ wəli‑m mʋ sɩ n na dam.
Kʋ daarɩ n tɩɩna na ti dɩ n yawɩʋ kʋm,
n daa n bá wanɩ n ja n tɩtɩ.
15 Yi-pʋrɩ-nyɩm sɩɩnɩ o yiǝ
sɩ o zaasɩ swan mʋ,
Swan tiinə maa cəgi kwiə.
16 Pɛɛrɩ wʋ́ pʋrɩ cwe zanzan dɩ pa‑m
sɩ nɔɔna maama cəgi n taanɩ,
dɩ nɔn-kamunə dɩ.
17 Nɔɔnʋ na dɛ yigə o ŋɔɔnɩ sarɩya dim jəgə nɩ,
kʋ nyɩ dɩ o jɩgɩ bʋra mʋ.
Kʋ vu kʋ yɩ maŋa kalʋ o sɩbarʋ wʋm na wʋ́ ba o twanɩ o ni tɩn.
18 Dɩdɛɛra bale na magɩ ni-kantɔgɔ,
kʋ maŋɩ sɩ ba ta jɔrɔ mʋ
sɩ ba lwarɩ wɔɔ mʋ jɩgɩ cɩga.
19 Ni-kantɔgɔ pwɛ nɔɔna daanɩ mʋ.
Nɩ kʋ na cana sɩ nɔɔnʋ bwəri pɩɩna digə o zʋ te tɩn,
n na pɛ n cʋrʋ wʋ cɔgɩ,
kʋ tiini kʋ cana sɩ á kwɛ daanɩ.
20 Ni-wʋdiu sui kana mʋ.
Ni-taanɩ maa zuri bɩcarɩ.
21 Tʋʋnɩ dɩ ŋwɩan maama wʋ nabiinu dindəlimi baŋa nɩ mʋ.
Wʋlʋ na soe ŋwaŋa tɩn, oó di ka biə.
22 N na di kaanɩ, n nɛ wo-laa.
Kʋ yɩ Baŋa-Wɛ mʋ kɩ-m yu-yoŋo.
23 Yinigə tu magɩ a japoori a loori sɩ o na yibwənə mʋ.
Kʋ daarɩ nadum nan yəni o ləri dɩ ni-cɛɛrɩ mʋ.
24 Yuudoŋo waɩ kʋ cɔgɩ nɔɔnʋ.
Kʋ daarɩ ciloŋ-sono wʋra
o na garɩ nu-pugə bu.