17
Nmʋ na di gʋlɩ-katəgə dɩ ni-mɔrɔ,kʋ garɩ balʋ na di ba sui
yɩ ni-kantɔgɔ wʋ ba sɔŋɔ nɩ tɩn.
2 Gambaa yi na pʋʋrɩ, oó di dam sɔŋɔ tu bu-kayaa baŋa nɩ.
Ba na lagɩ ba pɔɔrɩ sɔŋɔ tu wʋm jɩjɩgɩrʋ,
baá ga‑o ba wǝli sɔŋɔ kʋm biə wʋnɩ sɩ o na o nyɩm.
3 Min-vʋgʋ paɩ ba ye səbu-poŋo dɩ səbu-sɩŋa lam mʋ.
Kʋ daarɩ Baŋa-Wɛ mʋ waɩ DƖ brɩ nabiinu bɩcarɩ nyɩnyʋgʋ.
4 Nɔn-balɔrɔ zwɛ yɩ kɩʋʋ mʋ sɩ o cəgi bɩtar-balɔrɔ.
Vwa-fɔrʋ dɩ maa cəgi ba na gaanɩ vwan ba tiŋi te tɩn.
5 N na mwanɩ yinigə tu, n twɩ wʋlʋ na naan‑o tɩn mʋ.
N ma n na cakɩ dɩ n doŋ cam, waarɩm wʋ́ yi‑m.
6 Nankwɩ naɩ zulə ba naarʋ ŋwaanɩ mʋ.
Biə dɩ maa wʋ́ taa jɩgɩ wʋpolo ba kwə dɩ ba niinə ŋwaanɩ.
7 Ta-ŋʋm wʋ maŋɩ dɩ nɔn-wo-kʋrʋ.
Vwan fɔm tiini kʋ wʋ maŋɩ dɩ Pabu.
8 Nɔɔnʋ wʋlʋ na jaanɩ dim
o vu o pa o doŋ,
kʋ tu bʋŋɩ nɩ o jɩgɩ wo-kuri mʋ
sɩ o maa na woŋo kʋlʋ maama
o na lagɩ tɩn.
9 Nmʋ na kwe n donnǝ kǝm-balwaarʋ n cɛ-ba,
n brɩ sono mʋ.
Kʋ daarɩ bɩtarɩ-gulə cɔgɩ sɔŋɔ mʋ.
10 N na bwɛ wʋbʋŋa tu bɩdwɩ:
kʋʋ́ zən‑o,
kʋ dwǝni n na kwe fɩna
n magɩ nɔn-joro kuni bi.
11 Nɔn-balwaarʋ mʋ ba sɛ
ba paɩ ba yigǝ tiinǝ.
Kǝm-cɛ-nyɩm nan mʋ wʋ́ ba
o pa kʋ zʋ ba yɩra.
12 N na ve n jeeri nywənkurə kalʋ ba na vrɩ ka biə ba daarɩ-ka,
garɩ n na jeeri nɔn-joro na wʋra o tʋŋɩ jwərim.
13 N na kwe lwarɩm sɩ n ma n ŋwɩ lanyɩranɩ kǝm,
lwarɩm bá fɔgɩ dɩ nuŋi n sɔŋɔ nɩ.
14 Najara na puli, ya yagɩm camma,
nɩ bugə na pʋrɩ pa ka na wuuri yɔɔ te tɩn mʋ.
N na cɩgɩ da-lɔŋɔ kʋ yigə nɩ gara.
15 Baŋa-Wɛ culi sɩ nɔɔnʋ pa nɔn-balɔrɔ bʋra,
naa sɩ nɔɔnʋ vanɩ cɩga tu o bʋra.
16 N na cɔgɩ səbu nɔn-joro baŋa nɩ sɩ o beeri swan,
kʋ yɩ kafɛ mʋ.
Bɛŋwaanɩ, o bá fɔgɩ o ja swan.
17 Ciloŋ-ŋʋm zɩgɩ n kwaga nɩ mʋ maŋa maama.
Cʋrrʋ wʋra sɩ ba wəli‑m cam maŋa nɩ mʋ.
18 Wʋlʋ na lɩ o yuu o zɩgɩ sɩ o doŋ joŋi jɩnɩ,
kʋ tu wʋbʋŋa muri mʋ.
19 Wʋlʋ na lagɩ kantɔgɔ tɩn lagɩ lwarɩm kǝm mʋ.
Zəŋi-n-tɩtɩ tu maa beeri cɔgɩm.
20 Wʋlʋ wʋbʋŋa na ywəri tɩn kʋlʋkʋlʋ ba yɔɔrɩ cwǝŋǝ.
Niǝ yale yale tu maa zʋʋrɩ cam wʋnɩ.
21 N bu na yɩ joro, banɩ mʋ wʋ́ gʋ-m.
Nɔn-joro ko wʋʋ maa ba fɔgɩ kʋ tigə.
22 Wʋlʋ wʋʋ na polə maŋa maama,
kʋ tu jɩgɩ yazurə mʋ,
Yi-nywana nan yɩ yawɩʋ mʋ kʋ gʋɩ lɩla.
23 Nɔn-balɔrɔ səgi o joŋi dim mʋ
sɩ o ma kwɩɩlɩ cɩga kam.
24 Wʋ-pʋrɩ-nyɩm jaŋa sɩ o yi pʋʋrɩ mʋ.
Nɔn-joro wʋbʋŋa nan kaagɩ ya beeri mʋ yɔɔ yɩranɩ.
25 N bu na yɩ joro, banɩ mʋ wʋ́ gʋ-m.
Bu dwi dɩm kʋntʋ jɩgɩ zʋnnɩ mʋ o kɩ o tiinə.
26 Kʋ daɩ kʋ cwǝŋǝ nɩ sɩ n waarɩ
wʋlʋ na yǝri woŋo ni nɩ tɩn,
naa sɩ n magɩ nɔn-yuu dɩ o cɩga.
27 Wʋlʋ ni-taanɩ na ba daga tɩn mʋ brɩ nɩ o lwarɩ cɩga.
Wʋlʋ maa na ba wuuri dɩ o taanɩ tɩn mʋ sɩɩnɩ o ye.
28 Nɔn-joro na yɩ cɩmm dɩ o ni ŋwaŋa kam,
ba wɩ o yi pʋʋrɩ mʋ.
O na waɩ o ni o pui,
ba wɩ o waɩ wǝǝnu o kuri da-wʋnɩ.