14
Kaanɩ wʋlʋ na jɩgɩ wʋbʋŋa tɩn lɔ o sɔŋɔ mʋ.Kʋ daarɩ wʋlʋ na yɩ joro tɩn, o tɩtɩ mʋ lagɩ o joori o vaarɩ-kʋ dɩ o jɩan o dɩ tɩga nɩ.
2 Cɩga tu kikiə brɩ nɩ
o kwarɩ Baŋa-Wɛ lanyɩranɩ,
Kʋ daarɩ nɔn-ŋʋlʋ kikiə brɩ nɩ
o yigə tǝrǝ dɩ Wɛ.
3 Nɔn-joro ni-taanɩ mʋ beeri waarɩm dɩ pa‑o.
Yi-pʋrɩ-nyɩm ni bɩtarɩ nan mʋ joŋ-o sɩ yaga.
4 N na ba jɩgɩ nabɛ-vala sɩ n ma n tʋŋɩ,
n tulǝ wʋ́ ji tuli-kʋra mʋ.
N nabɛ nan na tʋŋɩ dɩ dam,
n wʋdiu wʋ́ gaalɩ.
5 Wʋlʋ na paɩ cɩga maana tɩn ba fɔ vwan.
Wʋlʋ na fɔɩ vwan taanɩ dim baŋa nɩ tɩn
nan yɔɔrɩ o gaanɩ vwan mʋ o tiŋə.
6 Nɔn-poonu na beeri yi-pʋrʋ je,
o bá na-kʋ.
Kʋ daarɩ wʋbʋŋa tu ni wǝǝnu kuri mwalɩ mwalɩ mʋ.
7 Pwɛ n tɩtɩ dɩ nɔn-joro,
bɛŋwaanɩ, n bá zaasɩ kʋlʋkʋlʋ o tee nɩ.
8 Wʋbʋŋa tu yǝno pa o bʋŋɩ o yi mʋ yɩ o kɩ kǝm.
Nɔn-joro jwərim dɩm maa jɩg-o dɩ gana.
9 Nɔn-jwəəru ba paɩ lwarɩm saarɩm jɩgɩ kuri.
Wɛ yu-yoŋo nan wʋ nɔn-ŋʋna yuu nɩ mʋ.
10 Nɔɔnʋ wʋʋ na cɔgɩ, kʋntʋ tu o dɩdʋa mʋ ye kʋlʋ na kɩ yɩ o wʋʋ kʋm cɔgɩ.
O nan na tu o ba o jɩgɩ wʋpolo dɩ, nɔɔn-nɔɔnʋ dɩ bá wanɩ o tɔgɩ o maŋɩ o wʋpolo kʋm.
11 Nɔn-balwaarʋ sam wʋ́ ji di-dwəənu.
Nɔn-ŋʋna di sɩm nan wʋ́ kɩ lanyɩranɩ mʋ.
12 Nmʋ waɩ n bʋŋɩ nɩ n na ve cwǝŋǝ kalʋ nɩ tɩn lana.
Ka nan waɩ ka tu ka guri dɩ tʋʋnɩ.
13 Nɔɔna waɩ ba mwana yɩ ba yigə nywanɩ.
Ywəəni dim nan waɩ dɩ guri dɩ wʋ-cɔgɔ.
14 Balʋ wʋbʋŋa na ywəri tɩn wʋ́ na ba tɩtʋŋa ŋwɩɩrʋ.
Nɔn-ŋʋna dɩ maa wʋ́ na ba tɩtʋŋa nyɔɔrɩ.
15 Nayəri-nyɩm sɛ kʋlʋ maama na tʋ o zwa nɩ tɩn mʋ.
Kʋ daarɩ wʋbʋŋa tu jeeli kʋlʋ o na jɩgɩ o kɩ tɩn mʋ.
16 Swan tu zuri o yɩra mʋ sɩ o cɩ n tɩtɩ dɩ lɛɛrʋ.
Nɔn-joro nan lɔgɩrɩ mʋ yɩ o kaagɩ o tʋŋɩ yɔɔ.
17 Ban-lʋm tu soe sɩ o taa tʋŋɩ jwərim mʋ.
Ba maa culi wʋlʋ na kɩ swan
dɩ o donnǝ tɩn.
18 Wʋlʋ wʋbʋŋa na muri tɩn ve o kweeli dɩ jwərim mʋ.
Kʋ nan na yɩ swan tu,
o na lwarɩ kʋlʋ tɩn mʋ wʋ́ pa‑o zulə.
19 Nɔn-balwaarʋ wʋ́ cɔɔlɩ nɔn-ŋʋna yigə nɩ.
Baá loori nɔn-ŋʋna sɩ ba kɩ-ba yu-yoŋo.
20 Yinigə-tu tɔgɩ-doŋ tɩtɩ dɩ cul-o mʋ,
kʋ daarɩ nadum cilonnə nan yɩ zanzan mʋ.
21 Wʋlʋ na yǝni o nɩɩsɩ o donnǝ tɩn kɩ lwarɩm mʋ.
Kʋ nan na yɩ wʋlʋ na kɩ nabwənə lanyɩranɩ tɩn,
Wɛ yu-yoŋo wʋ́ taa wʋ kʋ tu yuu nɩ.
22 Nɔɔna balʋ na jɩgɩ bʋbʋŋ-balwaarʋ tɩn, ba wʋ́ tusi cwəŋə mʋ.
Ama, balʋ na jɩgɩ bʋbʋŋ-ŋʋna tɩn, ba tʋŋɩ dɩ yɩ-nɔnɔ dɩ cɩga mʋ.
23 Tɩtʋŋ-cɛɛra dwi maama jɩgɩ nyɔɔrɩ.
Ni-taanɩ yɩranɩ nan jaanɩ
zʋrɩ mʋ dɩ tui.
24 Jɩjɩgɩrʋ yɩ zulə mʋ tɩ paɩ swan tiinə.
Jwəəru maa kaagɩ ba tʋŋɩ jwərim yɩranɩ.
25 Nɔɔnʋ na pɛ maana cɩga cɩga,
wʋntʋ wʋ́ joŋi o doŋ ŋwɩa o yagɩ mʋ.
Balʋ nan na fɔɩ vwan taanɩ dim baŋa nɩ tɩn
jɩgɩ ba donnǝ ba cɔga.
26 Nɔɔnʋ wʋlʋ na kwarɩ Baŋa-Wɛ,
kʋ tu wʋbʋŋa wʋ́ kɩ dam.
O biə dɩ wʋ́ na dalɩm je.
27 Nmʋ na kwarɩ Baŋa-Wɛ,
kʋ nyɩ dɩ buli-yi dɩlʋ na na paɩ ŋwɩa tɩn mʋ.
Kʋ lagɩ kʋ cɩ nmʋ mʋ sɩ tʋʋnɩ yɩ ja‑m.
28 Pɛ wʋlʋ tɩʋ na jɩgɩ nɔn-biə zanzan tɩn wʋ́ na zulə lanyɩranɩ.
Pɛ wʋlʋ nɔn-kɔgɔ na muri tɩn ba jɩgɩ paarɩ o di.
29 Wʋlʋ na waɩ o bɩcarɩ o jaanɩ tɩn brɩ nɩ o pʋʋrɩ mʋ.
Wʋlʋ na brɩ o ban-lʋm tɩn maa brɩ jwərim yɩranɩ.a
30 Nɔɔnʋ wʋʋ na tigə, kʋ tu yɩra wʋ́ zuri.
Wʋ-gʋrʋ nan yɩ yawɩʋ mʋ kʋ gʋɩ.
31 Wʋlʋ na pɛ kʋ zʋ yinigə tu yɩra,
kʋ tu twɩ o Naanʋ wʋm mʋ.
Wʋlʋ nan na kɩ nabwənə lanyɩranɩ,
kʋ tu zuli Wɛ mʋ.
32 Lɛɛrʋ na tuǝ, nɔn-balwaarʋ bá wanɩ ba zɩgɩ.
Nɔn-ŋʋna nan wʋ́ na dalɩm je,
dɩ tʋʋnɩ maŋa nɩ dɩ.
33 Swan cɩga cɩga mʋ wʋ yi-pʋrɩ-nyɩna wʋbʋŋa nɩ.
Ya nan ba lwara jwəəru tɩtarɩ nɩ.b
34 Kǝm-laarʋ na su tɩʋ kʋlʋ tɩn,
kʋ yɩrɩ zaŋɩ wɛɛnɩ mʋ.
Kʋ daarɩ kǝm-balwaarʋ jaanɩ cavɩɩra mʋ tɩ tui
tɩ paɩ nɔɔna.
35 Pɛ wʋʋ wʋ́ poli dɩ o tɩntʋŋnʋ wʋlʋ na tʋŋɩ dɩ swan tɩn.
Sɩ kʋ na yɩ wʋlʋ na tʋŋɩ jwərim tɩn,
o banɩ wʋ́ zaŋɩ kʋ tu baŋa nɩ mʋ.