13
Bu wʋlʋ na jɩgɩ wʋbʋŋ-laarʋ tɩn wʋ́ joŋi o ko kwiə.Kʋ daarɩ nɔɔnʋ wʋlʋ na pupogi nɔɔna tɩn ba sɛ bwɛa.
2 Nɔɔna wʋ́ taa di ba sui ba ni-taanɩ ŋwaanɩ mʋ.
Nɔn-ŋʋllʋ nan yɔɔrɩ ba beeri nakɔɔrɩ je mʋ.
3 Nɔɔnʋ wʋlʋ na yɩrɩ o tɩtɩ dɩ o ni-bɩtarɩ tɩn, o yɩrɩ o ŋwɩan mʋ,
Kʋ daarɩ wʋlʋ na karɩ o ŋɔɔnɩ yɔɔ yɔɔ tɩn maa ve o cɔgɩm je mʋ.
4 Yawɔrɩ-nyɩm fra zʋʋrɩ wǝǝnu tɩlʋ o na bá na tɩn wʋnɩ mʋ.
Kʋ daarɩ wʋlʋ na cɛ dɩ tɩtʋŋa,
oó taa di o sui mʋ.
5 Nɔn-ŋʋna culi vwan mʋ.
Nɔn-balwaarʋ nan soe cavɩɩra kikiə mʋ.
6 Cɩga tu tɩtʋŋ-ŋʋna jɩg-o ya kwǝli mʋ.
Nɔn-balwaarʋ lwarɩm dɩm maa cɔgɩ-ba.
7 Nɔɔna badaara paɩ ba jɩŋa jɩgɩ mʋ,
yɩ ba ba yi ba təŋə jɔgɔ.
Badonnǝ dɩ kɩ nɩ yinigə mʋ jɩgɩ-ba,
yɩ ba jɩjɩgɩrʋ tiini tɩ gaalɩ.
8 Nadum wʋ́ wanɩ o ma o səbu
o ma o joŋi o ŋwɩa o yagɩ.
Sɩ kʋ na yɩ yinigə tu, nɔɔn-nɔɔnʋ bá daan‑o.
9 Nɔn-ŋʋna ŋwɩa pooni brɩ ba wʋpolo jaja mʋ.
Kʋ nan na yɩ nɔn-balwaarʋ,
ba ŋwɩa pooni dɩm wʋ́ da dɩ dwe mʋ.
10 Kamunni ŋwɛ jaanɩ kantɔgɔ yɩranɩ mʋ dɩ tui.
Balʋ nan na sɛ kwiə tɩn maa jɩgɩ swan.
11 Nmʋ na lɔgɩrɩ sɩ n na səbu,
kʋʋ́ je lɩla n jɩa nɩ.
Nmʋ nan na zuri n yɩra
n beeri-kʋ fɩnfɩɩn,
kʋʋ́ puli kʋ pa‑m.
12 N na warɩ n tɩɩna yam n yi,
kʋ bwəri nɛ.
Kʋ daarɩ n wʋbʋŋa yam na tʋŋɩ ya pa‑m,
wʋpolo gaalɩ mʋ.
13 Wʋlʋ na vɩn sɩ o joŋi kwiə tɩn
wʋ́ na cam kʋ baŋa nɩ.
Wʋlʋ maa na joŋi ni-kaanɩm tɩn
wʋ́ na nyɔɔrɩ kʋ baŋa nɩ.
14 Swan tu zaasɩm dɩm nyɩ dɩ buli-yi
dɩlʋ na na paɩ ŋwɩa tɩn mʋ.
Ya lagɩ ya cɩ nmʋ sɩ tʋʋnɩ yɩ ja‑m.
15 Nɔɔna lagɩ yi-pʋrɩ-nyɩna ni-taanɩ mʋ.
Nɔn-ŋʋllʋ nan wʋ́ na ba cɔgɩm mʋ.
16 Wʋbʋŋa tu tɔgɩ yǝno baŋa nɩ mʋ
o kɩ o wǝǝnu maama.
Nɔn-joro maa kaagɩ o brɩ o jwərim dɩm.
17 Wʋlʋ n na tʋŋɩ tɩn na ba jɩgɩ cɩga,
oó ywəri cwǝŋǝ kam nɩ.
O nan na yɩ cɩga tu,
oó kwɛ wǝǝnu o pa‑m.
18 Wʋlʋ maama na vɩn sɩ o joŋi kʋrɩsɩm,
yinigə dɩ cavɩɩra wʋ́ ja kʋ tu.
Wʋlʋ nan na sɛ zaasɩm tɩn wʋ́ na zulə.
19 Nabiinu na kɩ o su o fra, kʋ ywəmmə kʋ pa‑o mʋ.
Jwəəru nan warɩ sɩ ba yagɩ lwarɩm kikiə.
20 Wʋlʋ na mɩ dɩ swan tiinə tɩn dɩ wʋ́ ja swan mʋ.
Kʋ nan na yɩ wʋlʋ na tɔgɩ dɩ jwəəru tɩn,
kʋʋ́ tiini kʋ zʋ kʋ tu yɩra mʋ.
21 Cam zəli lwarɩm-kəru mʋ sɩ dɩ ja.
Kʋ nan na yɩ nɔn-ŋʋm,
o nyɔɔrɩ yɩ wo-laarʋ mʋ o wʋ́ na.
22 Nɔn-ŋʋm wʋ́ daarɩ jɩjɩgɩrʋ sɩ o biə lǝni ba taa di.
Lwarɩm-kəru maa laɩ o jɩjɩgɩrʋ o tiŋə,
sɩ tɩ ba tɩ kweeli nɔn-ŋʋna jɩŋa nɩ.
23 Wʋdiiru ya ba jɩgɩ tɩtʋŋɩ yinigə tu kara nɩ.
Cɩga nan je pa ba vrɩ-tɩ ba daarɩ‑o.
24 Wʋlʋ na pɛ fɩna kɩ baŋwɛ dɩ o bu tɩn, o ba so-o mʋ.
Kʋ daarɩ wʋlʋ na soe o bu tɩn, o ba yagɩ sɩ o ma fɩna o dɩ-o cwəŋə nɩ.
25 Nɔn-ŋʋna di ba sui ba pwi.
Kʋ daarɩ nɔn-balwaarʋ ve dɩ kan-kʋrʋ mʋ.