12
Wʋlʋ na sɛ sɩ ba dɩ‑o cwǝŋǝ nɩ tɩn jɩgɩ wʋbʋŋa cɩga cɩga.Kʋ daarɩ wʋlʋ na culi bwɛa tɩn wʋbʋŋa muri mʋ.
2 Baŋa-Wɛ yu-yoŋo wʋ nɔn-ŋʋna yuu nɩ mʋ,
sɩ kʋ na yɩ balʋ na bʋŋɩ lwarɩm ba pa ba donnǝ tɩn,
Wɛ wʋ́ vanɩ ba bʋra mʋ.
3 Nɔn-lɔŋɔ ba fɔgɩ o jiri nɔɔnʋ.
Kʋ nan na yɩ nɔn-ŋʋm, o kuri ba gɔɩ.
4 Ka-yʋrʋ mʋ paɩ o barʋ jɩgɩ zulə.a
Kʋ daarɩ kaanɩ wʋlʋ na kɩɩ o barʋ cavɩɩra tɩn,
o nyɩ dɩ kwi-yawɩʋ mʋ, kʋ na jɩgɩ o barʋ kwi kʋ di.
5 Nɔn-ŋʋm yǝni o bʋŋɩ sɩ o kɩ wo-laarʋ mʋ.
Kʋ daarɩ balʋ na bʋŋɩ sɩ ba kɩ balɔrɔ tɩn,
maŋa maama ba bʋŋɩ sɩ ba tusi ba donnə mʋ.
6 Nɔn-balɔrɔ ni-bɩtarɩ nyɩ dɩ o kʋgɩ gwəənu mʋ
o tiŋi sɩ nɔɔna tʋ da.
Nɔn-ŋʋm ni-taanɩ maa joŋi nɔɔna dɩ yaga.
7 Wɛ yǝni DƖ vuvugi nɔn-balwaarʋ mʋ DƖ dɩ tɩga nɩ
pa ba yɔɔrɩ ba je,
Nɔn-ŋʋm sɔŋɔ nan zɩgɩ mʋ cɛpɩ.
8 Yi-pʋrɩ-nyɩm yɩ ba tee‑o mʋ o wʋbʋŋa ŋwaanɩ.
Ba maa gooni wʋlʋ wʋbʋŋa na ywəri tɩn.
9 Nɔɔnʋ wʋlʋ na tu o tɩtɩ
yɩ o laan za jɩgɩ wʋlʋ na tʋŋɩ o pa‑o tɩn,
kʋ tu garɩ wʋlʋ na brɩ o tɩtɩ kamunni
yɩ o ba yi o ni-wʋdiu tɩn.
10 Nɔn-ŋʋm nii o vara mʋ lanyɩranɩ,
sɩ kʋ na yɩ nɔn-balɔrɔ,
o kǝm-laarʋ tɩtɩ yɩ pu-sɩŋa mʋ.
11 Wʋlʋ na sɛ varɩm tɩn jɩŋa yi o ni.
Wʋlʋ maa na kaagɩ o tʋŋɩ wo-yɔɔrʋ tɩn wʋbʋŋa mʋ muri.
12 Wʋ-lʋŋ-nyɩm wʋbʋŋa tigi nɔn-balwaarʋ jɩjɩgɩrʋ baŋa nɩ.
Nɔn-ŋʋm zɩgɩ mʋ ga cɛpɩ,
nɩ tiu kʋlʋ bʋnnʋ na jaanɩ tɩga lanyɩranɩ tɩn.
13 Nɔn-balɔrɔ vwan mʋ wʋ́ joori ya ja-o.
Kʋ daarɩ nɔn-ŋʋm wʋ́ lu cam wʋnɩ mʋ.
14 N na tɛ wo-laarʋ dɩ nɔɔna, n wʋ́ na kʋ nyɔɔrɩ,
nɩ tɩntʋŋnʋ na naɩ o tɩtʋŋa nyɔɔrɩ te tɩn.
15 Nɔn-joro bʋŋɩ kʋ paɩ kʋ na kɩ tɛ tɩn maŋɩ mʋ,
Ama wʋlʋ na yɩ swɩan tu tɩn cəgi kwiə mʋ.
16 Nɔn-joro mʋ garɩ o brɩ o ban-lʋm jaja.
Kʋ daarɩ, ba na twɩ wʋbʋŋa tu,
o waɩ o tɩtɩ o jaana.
17 Wʋlʋ na tɛ cɩga taanɩ dim baŋa nɩ tɩn pa cɩga mʋ tʋŋa.
Wʋlʋ nan na fɔɩ vwan taanɩ dim baŋa nɩ tɩn jɩgɩ nɔɔna mʋ o gana.
18 N na wʋ bʋŋɩ n yi, nń ta taanɩ pa dɩ daanɩ n doŋ,
nɩ n kwe sʋ-lɔŋɔ mʋ n mʋʋr‑o tɩn.
Yi-pʋrɩ-nyɩm ni-taanɩ nan pa nɔɔna jɩgɩ yazurə mʋ.
19 Cɩga tu taanɩ ba jeə.
Kʋ nan na yɩ vwa-nyɩm taanɩ,
dɩ lagɩ dɩ kɛ yibʋgsa wʋnɩ mʋ.
20 Wʋlʋ na bʋŋɩ lwarɩm o pa o doŋ tɩn bɩcarɩ su dɩ gana.
Wʋlʋ nan na beeri zurim o pa o doŋ tɩn wʋ́ na ywəəni.
21 Nɔn-ŋʋna ba zʋʋrɩ cam wʋnɩ.
Kʋ nan na yɩ nɔn-balwaarʋ,
ba cam ba fɔgɩ dɩ tiə.
22 Baŋa-Wɛ ba tʋŋɩ dɩ vwa-nyɩna,
sɩ kʋ na yɩ balʋ na tʋŋɩ cɩga tɩn,
DƖ ve dɩ bantʋ mʋ.
23 Wʋbʋŋa tu ba brɩ o yǝno yɔɔ yɔɔ.
Nɔn-joro nan kaagɩ je maama nɩ mʋ o brɩ o jwərim.
24 Yawalɩ-nyɩm je paarɩ baŋa nɩ mʋ.
Yawɔrɩ-nyɩm maa tʋŋɩ tɩtʋŋ-dɛɛra o paɩ nɔɔna.
25 Nɔɔnʋ bɩcɔŋɔ na su dɩ liə, o gaɩ baarɩ mʋ,
Kʋ daarɩ bɩtarɩ-ŋʋŋa paɩ nɔɔnʋ su dɩ wʋpolo mʋ.
26 Nɔn-ŋʋm yǝni o wǝli o ciloŋ mʋ
sɩ o tʋ cwǝŋǝ nɩ.
Nɔn-balwaarʋ maa na kwe cwǝŋǝ kalʋ tɩn jaanɩ-ba ka jeə.
27 Yawɔrɩ-nyɩm na ve sɩ o tɔɔrɩ, o ba lagɩ o na varɩm dɩ dɩdʋa dɩ o gʋ o wɔ.
Ama nɔɔnʋ na tʋŋɩ lanyɩranɩ, kʋntʋ mʋ yɩ o jɩjaanɩ.
28 N kikiə na tɔgɩ cwǝŋǝ,
n wʋ́ na ŋwɩa cɩga cɩga.
Kʋ ta wʋ́ cɩ-m dɩ tʋʋnɩ.