11
Baŋa-Wɛ culi nɔɔna balʋ na maɩ kampinə-bwaŋa ba maɩ ba maŋɩ tɩn mʋ,Kʋ daarɩ balʋ na jɩgɩ bwɛn cɩga cɩga ba tʋŋɩ tɩn mʋ poli DƖ wʋʋ.a
2 Brɩ n tɩtɩ dɩ cavɩɩra ve daanɩ mʋ,
nɩ tu-n-tɩtɩ dɩ yi-pʋrʋ na yɩ te tɩn.
3 Nɔn-ŋʋm cɩga kam yɩr-o
pa o ŋwɩa lana mʋ.
Nɔn-ŋʋlʋ vwan yam maa pipiri ya jaan‑o.
4 Wɛ na wʋra DƖ waarɩ-m,
n jɩjɩgɩrʋ daa ba jɩgɩ kuri.
N nɔn-ŋʋnnɩ nan wʋ́ cɩ-m dɩ tʋʋnɩ.b
5 Nɔn-ŋʋna nɔn-ŋʋnnɩ dɩm tiŋi cwǝŋǝ jaja mʋ pa ba veǝ.
Kʋ daarɩ nɔn-balwaarʋ pu-sɩŋa kam paɩ ba saarɩ ba tʋɩ mʋ.
6 Cɩga tiinə nɔn-ŋʋnnɩ dɩm mʋ joŋi-ba dɩ yaga.
Nɔn-ŋʋllʋ fra maa jaanɩ-ba.
7 Nɔn-balɔrɔ na tɩga, o tɩɩna yam maama dɛ dɩd-o mʋ ya tɩ.
O wʋbʋŋa yalʋ maama o na jɩgɩ tɩn daa bá tʋŋɩ.
8 Nɔn-ŋʋna wʋ́ lu cam wʋnɩ,
sɩ dɩ joori dɩ tʋ nɔn-balwaarʋ baŋa nɩ.
9 Nɔɔnʋ na gooni wǝǝnu tɩlʋ na yɩ Wɛ nyɩm tɩn yǝni o cɔgɩ o donnǝ dɩ o ni-taanɩ mʋ.
Nɔn-ŋʋna nan maɩ yǝno mʋ ba joŋi ba tɩtɩ.
10 Nɔn-ŋʋna cwǝŋǝ na pʋrɩ,
ba tɩʋ kʋm nɔɔna jɩgɩ ywəəni mʋ ba di.
Nɔn-balwaarʋ nan na tu ba na cɔgɩm,
nɔɔna wʋ́ taa mwanɩ ba caka mʋ.
11 Nɔn-ŋʋna na kɩ yu-yoŋo ba kɩ ba tɩʋ kʋm yuu nɩ,
tɩʋ kʋm kʋntʋ wʋ́ na yɩrɩ mʋ.
Kʋ daarɩ nɔn-balwaarʋ wʋ́ ma ba ni-taanɩ mʋ
ba cɔgɩ ba tɩʋ kʋm.
12 Wʋlʋ maama na gooni o doŋ,
kʋ tu wʋbʋŋa mʋ muri.
Wʋbʋŋa tu wʋ́ pu o ni mʋ cɩmm.
13 Wʋlʋ na kaagɩ o ba bɩbara tɩn
yǝni o brɩ wo-sisəgiru jaja mʋ.
Nɔɔnʋ wʋlʋ na maŋɩ dɩ zulə tɩn nan mʋ wʋ́ pu o ni,
sɩ ya yɩ nuŋi pooni.
14 Nakwa na tǝrǝ sɩ ba wǝli pɛ dɩ kwiə,
o tɩʋ kʋm bá zɩgɩ.
Nakwa zanzan nan na wʋra,
tɩʋ kʋm wʋ́ kɩ lam.
15 Wʋlʋ na sɛ sɩ o zɩgɩ daarɩ nɔn-vəru jɩnɩ ŋwaanɩ,
kʋ tu wʋ́ na cam.
Kʋ tu nan na vɩn sɩ o zɩgɩ daarɩ dɩm,
kʋʋ́ cɩ-o cam wʋnɩ.
16 Ka-yʋrʋ na nɛ yɩrɩ dɩlʋ tɩn
garɩ nɔn-balwaarʋ na naɩ jɩjɩgɩrʋ tɩlʋ tɩn.
17 Ŋwaŋa tu kikiə yam kwɛ o tɩtɩ mʋ.c
Kʋ daarɩ kǝm-cɛ-nyɩm jaanɩ yaara mʋ
o tui o tɩtɩ baŋa.
18 Nɔn-balɔrɔ ŋwɩɩrʋ nyɩ dɩ lunluŋu mʋ tɩ pa‑o.
Wʋlʋ nan na tʋŋɩ cɩga tɩn wʋ́ yɔɔrɩ o na o tɩtʋŋa yam nyɔɔrɩ.
19 Wʋlʋ na sɩɩnɩ o yiǝ dɩ nɔn-ŋʋnnɩ tɩtʋŋa,
kʋ tu wʋ́ ni ŋwɩa ywəəni.
Wʋlʋ maa na sɩɩnɩ yiǝ dɩ lwarɩm kikiə tɩn wʋ́ tɩ mʋ.
20 Baŋa-Wɛ culi balʋ wʋbʋŋa na ywəri tɩn mʋ.
Kʋ nan na yɩ balʋ na yɔɔrɩ ba tɔgɩ cwǝŋǝ tɩn,
ba kikiə yam su DƖ yi mʋ.
21 Taanɩ dɩntʋ bá kwanɩ:
Nɔn-balwaarʋ yɔɔrɩ ba lagɩ ba na waarɩm mʋ.
Kʋ nan na yɩ nɔn-ŋʋna dwi dɩm,
baá taa te ba tɩtɩ.
22 Kaanɩ na lana yɩ o yɩ ka-jɔŋɔ na ba jɩgɩ wʋbʋŋa,
kʋ nyɩ dɩ səbu-sɩŋa zwa-kwanɩ na lǝgi tǝru mʋmwɛ nɩ tɩn mʋ.
23 Nɔn-ŋʋna fra na tɔgɩ wǝǝnu tɩlʋ tɩn wʋ́ guri lanyɩranɩ mʋ.
Nɔn-balwaarʋ tɩɩna nan guri dɩ ban-zɔŋɔ mʋ.
24 Wʋ-yoŋo tu paɩ mʋ yɩ o joori o naɩ o wǝli da.
Wo-cɛ-nyɩm maa vɩn pɛɛrɩ
yɩ o ba o guri dɩ yinigə.d
25 Wʋ-yoŋo tu wʋ́ na yu-yoŋo nɔɔna tee nɩ.
Nɔɔnʋ wʋlʋ na paɩ na o donnə yɩ ba nyɔ tɩn,
baá pa o dɩ na yɩ o nyɔ.e
26 Nɔɔna sɔɔlɩ lwarɩm ba paɩ balʋ na jɩgɩ wʋdiiru ba səgə tɩn mʋ.
Ba maa tee balʋ na paɩ tɩ nuŋǝ sɩ ba yəgi-tɩ tɩn.
27 Nmʋ na tʋŋɩ n tɩtʋŋa dɩ wʋbʋŋ-ŋʋna,
nɔɔna wʋ́ pu n kwaga.
Nmʋ nan na kaagɩ n beeri lwarɩm je, nń na-dɩ.
28 Wʋlʋ maama tɩɩna na tigi o jɩjɩgɩrʋ wʋnɩ,
kʋ tu wʋ́ tʋ mʋ,
sɩ nɔn-ŋʋm yɩra zurǝ mʋ,
nɩ vɔɔrʋ na kwi tiu yɩra nɩ te tɩn.
29 Wʋlʋ na jaanɩ daanɩm o tui
o digə tiinə baŋa,
kʋ tu bá fɔgɩ o ni o digə kam ywəəni.
Nɔn-joro maa wʋ́ taa tʋŋɩ
o paɩ swan tu.
30 Nɔn-ŋʋm nyɩ dɩ tiu kʋlʋ na paɩ nɔɔna ŋwɩa tɩn mʋ.
Wʋlʋ maa na joŋi o donnǝ o yagɩ tɩn mʋ sɩɩnɩ o jɩgɩ swan.
31 Nɔn-ŋʋna na lagɩ ba na ba tɩtʋŋa nyɔɔrɩ tɩga baŋa nɩ,
nɔɔn-balɔrɔ dɩ lwarɩm-kəru laan nan wʋ́ kɩ dono mʋ!