Pɛ Solɔmɔn bɩtar-dɩndɩ
10
Pɛ Solɔmɔn bɩtar-dɩndɩ yam mʋ tɩntʋ:Bu wʋlʋ na jɩgɩ wʋbʋŋ-laarʋ tɩn
paɩ o ko wʋʋ pwələ.
Sɩ kʋ na yɩ bu-joro,
wʋntʋ paɩ o nu wʋʋ cɔgɩ mʋ.
2 Nɔɔnʋ na dɛ lwarɩm baŋa o ma o na jɩjɩgɩrʋ,
o bá na nyɔɔrɩ tɩ baŋa nɩ.
Cwə-laarʋ tɔgɩm nan wʋ́ joŋi nɔɔnʋ tʋʋnɩ jɩŋa nɩ.
3 Baŋa-Wɛ bá sɛ sɩ kana ja nɔn-ŋʋna.
Kʋ daarɩ kʋ na yɩ nɔn-balwaarʋ,
Wɛ wʋ́ cɩ-ba dɩ kʋlʋ maama ba fra na zʋʋrɩ tɩn.
4 Yawɔrɔ jaanɩ yinigə mʋ kʋ tui kʋ paɩ nɔɔna.
Kʋ daarɩ yawalɩ-nyɩm jɩŋa yi o ni mʋ.
5 Wʋlʋ na nuŋi o ja faa o zʋ digə kʋ maŋa nɩ tɩn cʋ o tɩtɩ mʋ.
Wʋlʋ nan na dɔ faa ni nɩ tɩn jaanɩ cavɩɩra yɩranɩ mʋ o ba.
6 Wɛ yu-yoŋo wʋ́ taa wʋ nɔn-ŋʋna yum nɩ.
Nɔn-balɔrɔ ni-taanɩ nan paɩ nakɔɔrɩ zaŋɩ mʋ.
7 Nmʋ na guli nɔn-ŋʋm gulə,
kʋ kɩ-m ywəəni mʋ.
Kʋ daarɩ nɔn-balɔrɔ yɩrɩ wʋ́ saarɩ mʋ.
8 Wʋbʋŋa tu joŋi zaasɩm mʋ.
Wʋlʋ na ŋɔɔnɩ yɔɔ yɩranɩ tɩn wʋ́ na cɔgɩm.a
9 Wʋlʋ na ve cɩga cwǝŋǝ nɩ,
kʋ tu nɛ jaanɩ tɩga mʋ.
Kʋ daarɩ pipiri-nyɩna wʋ́ seeri ba tʋ.
10 Wʋlʋ na kwɩɩlɩ cɩga,
kʋ tu beeri najara mʋ.
Wʋlʋ na ŋɔɔnɩ yɔɔ yɩranɩ tɩn wʋ́ na cɔgɩm.b
11 Nɔn-ŋʋm ni-taanɩ nyɩ dɩ buli-yi
dɩlʋ na na paɩ ŋwɩa tɩn mʋ.
Nɔn-balɔrɔ ni-taanɩ nan paɩ nakɔɔrɩ zaŋɩ mʋ.
12 Dʋnɩm tui dɩ najara mʋ,
sono nan yagɩ kʋ maa cɛ woŋo maama wʋnɩ mʋ. c
13 Yi-pʋrɩ-nyɩm ni-taanɩ brɩ swan cɩga cɩga.
Agɛbʋŋa nan maŋɩ sɩ o na waarɩm mʋ.
14 Swan tu mʋ tiŋi yǝno o yuu nɩ.
Nɔn-joro ŋwaŋa nan jaanɩ lɛɛrʋ mʋ ka tui.
15 Nadum jɩjɩgɩrʋ tɩm waɩ tɩ cɩ-o dɩ cam.
Zʋrɩ nan wʋ́ cɔgɩ yinigə tiinə.
16 Nɔn-ŋʋna nyɔɔrɩ yɩ ŋwɩa cɩga cɩga.
Nɔn-balwaarʋ ŋwɩɩrʋ nan wʋ́ taa yɩ waarɩm mʋ
ba lwarɩm ŋwaanɩ.
17 Wʋlʋ maama na sɛ zaasɩm,
kʋ tu wʋ ŋwɩa cwǝŋǝ nɩ mʋ o veǝ.
Wʋlʋ nan na vɩn kʋrɩsɩm,
kʋ tu wʋ́ pa o donnǝ dɩ cɔgɩ.
18 N na mwanɩ dɩ nɔɔnʋ yɩ n wʋ baŋwɛ,
n yɩ vwa-fɔrʋ mʋ.
N na yɩ bɩbarɩ nyɩm, n yɩ nɔn-joro mʋ.
19 Ta-fara jaanɩ tusim mʋ ya tui.
Swan tu wʋ́ pu o ni mʋ cɩmm.d
20 Nɔn-ŋʋm ni-taanɩ jɩgɩ nyɔɔrɩ mʋ,
nɩ səbu-poŋo tɩn.
Nɔn-lɔŋɔ wʋbʋŋa maa yɩ weeru yɩranɩ.
21 Nɔn-ŋʋna zaasɩm jɩgɩ nyɔɔrɩ
dɩ paɩ nɔɔna zanzan.
Kʋ daarɩ jwəəru jwərim dɩm mʋ jɩgɩ-ba dɩ gʋɩ.
22 Baŋa-Wɛ yu-yoŋo mʋ paɩ kʋ garɩ nɔɔnʋ yɩra nɩ.
Kʋlʋkʋlʋ bá baarɩ kʋ tu kwaga.
23 Nɔn-joro maɩ lwarɩm kikiə o jiri kwɛɛra mʋ.
Wʋbʋŋa tu wʋʋ nan poli kǝm-laarʋ ŋwaanɩ.
24 Nɔn-balwaarʋ na duri kʋlʋ tɩn mʋ wʋ́ yi-ba.
Kʋ daarɩ nɔn-ŋʋna wʋ́ na ba na beeri kʋlʋ tɩn mʋ.
25 Vu-dɩʋ na zaŋɩ, nɔn-balwaarʋ ba jɩgɩ zɩga je.
Kʋ nan na yɩ nɔn-ŋʋna,
bantʋ fɔgɩ ba zɩgɩ mʋ cɛpɩ maŋa maama.
26 Yɩ kwe n tɩtʋŋa n kɩ yawɔrɩ-nyɩm jɩŋa nɩ.
Kʋʋ́ taa yɩ nɩ wo-nywaanʋ na nywanɩ yələ,
naa nyʋa na wiiri yiǝ te tɩn mʋ.
27 Nɔɔnʋ na kwarɩ Baŋa-Wɛ,
kʋ tu wʋ́ na mʋmwɛ-dɛɛrɩ.
Nɔn-balɔrɔ nan ba yi o dɛ.
28 Nɔn-ŋʋna tɩɩna guri dɩ ywəəni mʋ.
Kʋ daarɩ nɔn-balwaarʋ tɩɩna wʋ́ cɔgɩ lɩla mʋ.
29 Baŋa-Wɛ mʋ paɩ cɩga tiinə na dalɩm je.
DƖ ta maa paɩ nɔn-balwaarʋ na cɔgɩm.
30 Nɔn-ŋʋna kuri ba gɔɩ.
Nɔn-balwaarʋ nan bá daanɩ tɩga kam baŋa nɩ.
31 Nɔn-ŋʋm ni-taanɩ brɩ swan mʋ.
Vwa-fɔrʋ ni nan maŋɩ sɩ ba pu-dɩ mʋ.
32 Nɔn-ŋʋna ni-taanɩ ywəmmə pugə nɩ.
Kʋ daarɩ nɔn-balwaarʋ mʋ ŋɔɔnɩ bɩtar-yɔɔrʋ yɩranɩ.