Swan dɩ jwərim taanɩ
9
Swan cɩga cɩga mʋ lɔgɩ o sɔŋɔ.O ma cwi ywə yarpɛ
o təli-kʋ o zɩgɩ.
2 O gʋ vara mʋ sɩ o kɩ wʋdi-fɔrɔ,
yɩ o daarɩ o kɩ dɩvɛn sana o wǝli da.
O ma ti kʋ maama yigə.
3 O laan ma tʋŋɩ o tɩntʋŋ-kaana
sɩ ba kwe o kwǝrǝ ba vu
ba zɩgɩ tɩʋ kʋm zwǝǝnu yuu nɩ
ba taa tɔɔla ba yaga.
4 O maa tɛ dɩ balʋ na gɛ wʋbʋŋa tɩn
o wɩ:
«Abam nayəri-nyɩna bam,
ba-na á zʋ amʋ sɔŋɔ yo!
5 Ba á di-na wʋdiu kʋlʋ a na kɩ
a zɩgɩ abam,
dɩ sana balʋ a na kɩ á ŋwaanɩ tɩn.
6 Yagɩ-na jwərim kikiə,
sɩ á wʋ́ ni ŋwɩa ywəəni.
Nan tɔgɩ-na yi-pʋrʋ cwǝŋǝ kam.»
7 Nmʋ na kwaanɩ sɩ n dɩ
nɔn-lwɛɛnʋ cwǝŋǝ nɩ,
oó joori o twɩ‑m.
N ta na bwɛ nɔn-balɔrɔ,
o dɩ wʋ́ pa kʋ zʋ n yɩra mʋ.
8 Yɩ zaŋɩ n bwɛ nɔn-lwɛɛnʋ,
sɩ oó taa culi‑m kʋ ŋwaanɩ.
Nmʋ nan na bwɛ yi-pʋrɩ-nyɩm,
oó taa soe-m kʋ ŋwaanɩ.
9 Nmʋ na wǝli wʋbʋŋa tu,
o laan wʋ́ na swan o wǝli da.
N na brɩ nɔn-ŋʋm,
oó fɔgɩ o lwarɩ wǝǝnu.
10 Nabiinǝ na kwarɩ Baŋa-Wɛ mɛ tɩn,
yi-pʋrʋ dɩ puli dáanɩ mʋ.
Nmʋ na mɩ dɩ
Wʋ-poŋo Tu Wɛ dɩm,
nmʋ wʋ́ lwarɩ wǝǝnu.a
11 N na jɩgɩ swan cɩga cɩga,
n laan wʋ́ na mʋmwɛ-dɛɛrɩ mʋ.
N bɩna yam wʋ́ gaalɩ lʋgʋ baŋa nɩ.
12 Yi-pʋrɩ-nyɩm swan yam jaanɩ
nyɔɔrɩ mʋ ya tui ya pa‑o.
Wʋlʋ nan na yɩ nɔn-lwɛɛnʋ,
kʋ tu yɩranɩ mʋ wʋ́ yaarɩ
kʋ ŋwaanɩ.
13 Kaanɩ wʋlʋ na ba jɩgɩ wʋbʋŋa tɩn yɩ bəlibəli-nyɩm mʋ,
O yɩ wʋbʋŋ-tɩgɩra tu mʋ, o kwəri o ba ni kʋlʋkʋlʋ kuri.
14 O je o sɔŋɔ manco-ni dɩm seeni mʋ
dɩ tɩʋ kʋm zoŋo yuu nɩ.
15 O maa tɔɔlɩ o yaga o bǝi
balʋ na wʋ cwǝŋǝ nɩ
ba maa kɛa tɩn.
16 O maa tɛ dɩ balʋ na gɛ wʋbʋŋa tɩn
o wɩ:
«Abam balʋ maama
na yɩ nayəri-nyɩna tɩn
ba-na á zʋ amʋ sɔŋɔ yo!
17 Nɔn-gaa lɔɔ wʋ na bam
tiini ba ywəmmə.
Wʋdiu kʋlʋ n na wʋ́ səgi n di tɩn
dɩ dim ywəəni mʋ dwe!»
18 Nayəri-nyɩna nan yǝri nɩ
balʋ maama na lɛɛnɩ ba zʋ
ka-joro sɔŋɔ tɩn maŋɩ sɩ ba tɩ mʋ.
Curu nan yɔɔrɩ kʋ su
dɩ o sɔŋɔ vərə mʋ.