Yi-pʋrʋ na paɩ zǝnǝ dɩlʋ tɩn
8
Cəgi-na! Swan cɩga cɩga nyɩ dɩ bukɔ na tɔɔla o yaga.Yi-pʋrʋ mʋ zǝŋi o kwǝrǝ wɛɛnɩ
sɩ nɔɔna ni o ŋwa.
2 O yǝni o din zwǝǝnu yuu mʋ
o vu o zɩgɩ mɛ seeni cwe sɩm
na lɛɛnɩ daanɩ tɩn.
3 O ta zɩgɩ o maŋɩ dɩ tɩʋ kʋm mancwəənu niə,
mɛ seeni ba na tɔgɩ
ba zʋʋrɩ kʋ wʋ tɩn,
o tɔɔla nɩ:
4 «Amʋ tɔɔlɩ a bǝi abam,
sɩ lʋgʋ baŋa nabiinǝ maama mʋ ni.
5 Abam balʋ na yɩ nayəri-nyɩna tɩn,
ja-na wʋbʋŋ-ŋʋna.
Abam nɔn-jwəəru tɩm,
ja-na yi-pʋrʋ.
6 Cəgi-na, sɩ a jɩgɩ wo-kurə mʋ
sɩ a ta.
Amʋ na puri a ni,
a wʋ́ ta wǝǝnu tɩlʋ
na yɩ cɩga tɩn mʋ.
7 Amʋ ni-taanɩ yɔɔrɩ dɩ yɩ cɩga,
a na culi vwan tɩn ŋwaanɩ.
8 Amʋ ni-bɩtarɩ sɩm maama
yɔɔrɩ sɩ tɔgɩ cwǝŋǝ mʋ.
A wʋ fɔgɩ a ŋɔɔnɩ sɩ a ma a tusi nɔɔnʋ, a wʋ vwan fɔgɩ.
9 Yi-pʋrɩ-nyɩna naɩ a zaasɩm dɩm nɩ:
ya yɔɔrɩ ya yɩ cɩga mʋ.
Balʋ na jɩgɩ yǝno tɩn maa naɩ nɩ:
ya ba jɩgɩ tusim.
10 Pa-na a zaasɩm dɩm
taa jɩgɩ lʋnnɩ abam tee nɩ,
sɩ dɩ dwe səbu-poŋo.a
Nan kuri-na yǝno
sɩ á daarɩ səbu-sɩŋa,
nɩ ka na maŋɩ ka yɩ cɩga te dɩ.
11 Bɛŋwaanɩ swan cɩga cɩga jɩgɩ kuri
ya dwe kandwa-ŋʋna.
Woŋo kʋlʋ maama á fra na wʋ́ zʋ tɩn bá maŋɩ dɩ-ya.
12 Amʋ yɩ swan cɩga mʋ.
Amʋ dɩdaanɩ wʋbʋŋ-ŋʋna mʋ
ve daanɩ.
A maa beeri yǝno
dɩdaanɩ yi-pʋrʋ je
sɩ a kwe-tɩ a pa nɔɔna.
13 Wʋlʋ na kwarɩ Wɛ,
kʋ tu cɩ o tɩtɩ dɩ lwarɩm mʋ.
A yɔɔrɩ a culi ka-brɩ-ka-tɩtɩ,
dɩ kamunni ŋwɛ, dɩ tɩtʋŋ-zɔɔna,
dɩ niǝ yale yale tiinə mʋ.
14 Wʋbʋŋ-ŋʋna dɩ swan cɩga
wʋ amʋ tee nɩ mʋ.
A maa jɩgɩ yi-pʋrʋ dɩ dam.
15 Pwa tɔgɩ amʋ baŋa nɩ mʋ
ba di paarɩ.
Kʋ ta yɩ amʋ ŋwaanɩ mʋ ba kuri
cullu tɩlʋ na maŋɩ tɩn
ba paɩ ba nɔɔna.b
16 Kʋ na yɩ nakwa, dɩ nɔn-yum,
dɩ dɩdɛɛra balʋ na jɩgɩ cɩga tɩn,
ba maama tɔgɩ amʋ ŋwaanɩ
ba na dam.
17 Balʋ maama na soe amʋ tɩn,
amʋ dɩ soe-ba mʋ.
Kʋ na yɩ balʋ na sɩɩnɩ ba yiǝ
ba beeri amʋ je tɩn,
bantʋ wʋ́ ba ba yi amʋ te.c
18 Jɩjɩgɩrʋ dɩ yɩrɩ kamunu
maa wʋ a jɩŋa nɩ,
sɩ a kwe a pa nɔɔna.
A maa paɩ nɔɔna dunǝ,
yɩ ba tɔgɩ cwǝŋǝ cɩga cɩga.
19 Nyɔɔrɩ dɩlʋ nɔɔna na wʋ́ na
amʋ tee nɩ tɩn garɩ səbu-sɩŋa,
ka na maŋɩ ka tiini ka lana te dɩ.
Pɛɛra yalʋ ba na wʋ́ joŋi
amʋ jɩŋa nɩ tɩn
garɩ səbu-poŋo cɩga cɩga.
20 Amʋ vəŋə maama yɩ cɩga.
A maa tɔgɩ cwe sɩlʋ na yɔɔrɩ tɩn.
21 A maa kwe jɩjɩgɩrʋ a paɩ balʋ
dwi maama na soe-nɩ tɩn,
pa ba sam sui dɩ wo-laarʋ.
22 Sɩ Baŋa-Wɛ laan kɩ
wǝǝnu maama tɩn,
DƖ naanɩ amʋ mʋ yigə
DƖ jɩŋa tɩtʋŋa maama wʋnɩ.d
23 Faŋa faŋa yɩ Baŋa-Wɛ ta wʋ naanɩ lʋgʋ kʋm tɩn,
DƖ maŋɩ o kuri-nɩ pulim nɩ mʋ.e
24 Ba na lʋgɩ-nɩ tɩn,
dɩ nanɩɩrʋ tɩm ta tǝrǝ,
dɩ buli-yiə dɩ tǝrǝ sɩ ya taa taɩ.
25 Ba lʋgɩ-nɩ mʋ ba daarɩ,
yɩ Wɛ laan cwi pweeru tɩm
dɩ zwəənu tɩm tɩ je nɩ.
26 Kʋntʋ maama kɩa yɩ o laan mɔ
tɩga kam, dɩ ka pwəli sɩm,
dɩ lʋgʋ baŋa kasʋlʋ kʋm.
27 A tu a wʋra mʋ yɩ DƖ kwe wɛyuu kʋm DƖ kɩ kʋ jǝgǝ nɩ,
yɩ DƖ daarɩ DƖ lɔ sisəm dɩlʋ
na kaagɩ nɩnɩʋ kʋm maama tɩn.
28 A dɛɛn maa wʋra yɩ DƖ kwe kunkwǝǝnu tɩm DƖ kɩ wɛyuu nɩ,
yɩ DƖ daarɩ DƖ fɔgɩ buli-yiə
sɩ ya pa na su nɩnɩʋ kʋm.
29 A wʋ DƖ tee nɩ mʋ yɩ DƖ lɔ pɩmpala
DƖ ma cɩ nɩnɩʋ kʋm,
sɩ kʋ wʋ na-fara yɩ vɩn DƖ ni
ba gaalɩ mɛ DƖ na pɛ-ba tɩn.
DƖ ta na fɔgɩ DƖ cwi tɩga kam kuri tɩn mʋ a wʋra.
30 A yɔɔrɩ a wʋ DƖ tee nɩ mʋ
a zəni‑DƖ nɩ gɔgɔ te.
DƖ dɛɛn di ywəəni amʋ ŋwaanɩ mʋ,
yɩ a dɩ wʋʋ poli DƖ yigə nɩ.
31 A maa jɩgɩ wʋpolo
dɩ lʋgʋ kʋlʋ DƖ na kɩ tɩn,
dɩ kʋ nɔn-biə bam.
32 Amʋ biə bam, cəgi-na a taanɩ dɩm.
Balʋ na sɛ ba tɔgɩ amʋ niə yam tɩn
mʋ jɩgɩ yu-yoŋo.
33 Cəgi-na a zaasɩm dɩm sɩ á ja swan.
Yɩ dʋlɩ-ya á yagɩ.
34 Wʋlʋ na cəgi amʋ taanɩ,
kʋ tu jɩgɩ yu-yoŋo.
Dɛ maama wʋnɩ,
o soe sɩ o taa tui a sɔŋɔ mʋ,
yɩ o cǝgǝ sɩ a ŋɔɔnɩ dɩd-o.
35 Wʋlʋ maama na tu o lwarɩ amʋ,
kʋ tu nɛ ŋwɩa mʋ.
O nan ta wʋ́ na yu-yoŋo
Baŋa-Wɛ tee nɩ.
36 Kʋ daarɩ, wʋlʋ maama na gɛ amʋ tɩn
beeri yaara mʋ o pa o tɩtɩ.
Balʋ na culi amʋ tɩn
lagɩ ba tɩtɩ tʋʋnɩ mʋ.»