Nɔn-dʋŋʋ dɩ ka-boro taanɩ
7
Amʋ bu, sɛ sɩ n joŋi a kwiə yam. Kwe niə yalʋ a na pɛ‑m tɩn n kɩ n yuu nɩ. 2 Ta n kɩ n tɔgɩ a niə yam, sɩ n wʋ́ na mʋmwɛ-dɛɛrɩ. Ta n ni a kwiə yam nɩnɛɛnɩ ya yɩ n tɩtɩ yicilbu mʋ tɩn. 3 Ta n guli ya gulə maŋa maama. Pa ya taa tigi n wʋbʋŋa nɩ wuu, nɩ n na pʋpʋnɩ-ya n tiŋi kandwa-pɩlɛ yɩra nɩ te tɩn. 4 Sɛ sɩ swan cɩga cɩga taa nyɩ dɩ n nakɔ mʋ, sɩ yi-pʋrʋ dɩ taa yɩ n ciloŋ-sono. 5 Bantʋ na wʋ n tee nɩ, kʋʋ́ cɩ-m dɩ ka-boro kʋm. Nmʋ ma n wʋ́ lu ka-tʋla kalʋ na maɩ ni-sʋnɩ o sʋgɩ nɔɔna tɩn jɩŋa nɩ.6 Amʋ yɔɔrɩ a zɩgɩ a sɔŋɔ takoro ni nɩ mʋ, yɩ a niə a nii 7 a na nɔn-dʋnnʋ na ve cwǝŋǝ nɩ te tɩn. Nayəri-nyɩm maa wʋ ba wʋnɩ, yɩ a maanɩ nɩ o tiini o ga wʋbʋŋa. 8 O maa tɔgɩ cwǝŋǝ kalʋ na ve ka-tʋla sɔŋɔ kʋm seeni tɩn, yɩ o vu o yi kʋ jǝgǝ kam. 9 Kʋ dɛɛn yɩ wa-zʋʋrɩ maŋa mʋ, tɩga na wʋra ka zwəri maŋa kalʋ nɩ tɩn. 10 Kaanɩ wʋm dɩ maa yɔɔrɩ o ba o nuŋi sɩ o jeer-o. O yɔɔrɩ o zʋ ka-boro gwaarʋ mʋ yɩ o laan jɩgɩ o wʋbʋŋa o səgə. 11 Kaanɩ wʋm tiini o yɩ pu-dɛ-nyɩm mʋ yɩ o ba kwarɩ nɔɔnʋ yi. O nan warɩ jǝgǝ dɩdʋa sɩ o jǝni da. 12 O yɔɔrɩ o kaagɩ tɩʋ kʋm cwe sɩm ni nɩ, dɩ kʋ yaga kam ni nɩ mʋ o səgi o nii o na wʋ́ yi wʋlʋ tɩn. 13 O laan ma yɔɔrɩ o vaŋɩ nɔn-dʋŋʋ kʋntʋ o kukwǝr-o yɩ o mu o ni, o daarɩ o ta o brɩ-o dɩ baarɩ nɩ: 14 «Yazurə pɛɛrɩ nwana ta daarɩ a sɔŋɔ kʋm nɩ mʋ. A zɩm nan kɩ a su a ni-gonim dɩm mʋ. 15 Kʋntʋ ŋwaanɩ mʋ a nuŋi sɩ a jeeri‑m. A ya yɔɔrɩ a beeri nmʋ je mʋ, wɛ-ywəm nan nii‑m da! 16 Amʋ kwe gwar-laarʋ mʋ a ma a lwarɩ a kwǝli a gadogo kʋm maama. Tɩ maa yɩ gar-fɩfalɩ sɩlʋ na nuŋi Ezipi tɩʋ nɩ yɩ sɩ nyɩnyʋrʋ yɩ dwi dwi tɩn. 17 A ta ma kwe wǝǝnu tɩlʋ lwǝm na ywǝmmǝ tɩn dwi dwi a zɩzagɩ a yagɩ kʋ maama nɩ, sɩ na yɩ Miiri, dɩ Alowɛ, dɩ Kanɛlɩ tɩn mʋ 18 Laan nan ba sɩ dɩ́ zʋ dɩ́ larɩ dɩ́ yi dɩ́ tɩtɩ sɩ tɩga laan ba ka pʋʋrɩ. Dɩ́ yɔɔrɩ dɩ́ lagɩ dɩ́ di dɩ́ sono kʋm ywəəni mʋ. 19 Amʋ barʋ beeri o kɛ yigə yigə mʋ. O tǝrǝ sɔŋɔ nɩ. 20 O nan kwe səbu na daga mʋ o kɩ o yɩra nɩ o ja o kɛ. Cana kam wʋ́ pɩɩrɩ ka ti mʋ sɩ o laan joori sɔŋɔ.»
21 Ka-tʋla kam tɔgɩ cwǝŋǝ kam kʋntʋ mʋ o ja nɔn-dʋŋʋ kʋm o ywəri. O nan yɔɔrɩ o kwe ni-sʋnɩ mʋ o sʋg-o o wanɩ. 22 Bɩdwɩ baŋa nɩ mʋ o pɛ o kwaga o pu, nɩ na-bɩa mʋ ba jɩgɩ ba ve sɩ ba gʋ tɩn. O ta nyɩ dɩ wəŋə kalʋ cɩkʋ na jaanɩ 23 yɩ kʋ laan daarɩ sɩ cɩm mʋʋrɩ o bɩcɔŋɔ nɩ tɩn mʋ. Nɩ zuŋə kalʋ na zʋ cɩkʋ wʋnɩ tɩn, o nan yǝri nɩ o sɩɩnɩ o tʋ cam wʋnɩ sɩ o ga o ŋwɩa.
24 Kʋntʋ ŋwaanɩ amʋ biə bam, nan cəgi-na a taanɩ dɩm. Kɩ-na á zwa kɩʋʋ sɩ á kɩ a zaasɩm dɩm á wʋbʋŋa nɩ. 25 Yɩ pa-na kaanɩ wʋm kʋntʋ doŋ cwǝŋǝ sɩ o sʋgɩ abam o wanɩ. Nan yɩ sɛ-na sɩ o ja abam o ywəri á cwǝŋǝ kam nɩ. 26 O pɛ baara zanzan mʋ tʋ tɩga nɩ, pa nɔn-kɔgɔ dʋlɩ ba ŋwɩa ba yagɩ. 27 Balʋ na zʋ o sɔŋɔ kʋm nɩ tɩn laan tʋ cwəŋə kalʋ na ve curu tɩn nɩ. Cwǝŋǝ kam kʋntʋ wʋ́ ba ka guri dɩ tʋʋnɩ mʋ.