Ni-kaana yadonnə
6
Amʋ bu, nmʋ na kwe n tɩtɩn zɩgɩ daarɩ ŋwaanɩ
sɩ n ŋwɩ n doŋ jɩnɩ n pa‑o,
kʋ na fɔgɩ kʋ daɩ nɔn-vərə,
2 kʋ brɩ nɩ nmʋ tɩtɩ ni-taanɩ mʋ
lagɩ dɩ ja‑m nɩ cɩkʋ te.
3 Amʋ bu, kʋ nan maŋɩ sɩ n kɩ tɩntʋ mʋ,
sɩ n wanɩ n joŋi n tɩtɩ,
nmʋ jɩn na wʋ n doŋ wʋm
ni nɩ tɩn ŋwaanɩ.
Nan ve n tu n tɩtɩ o yigə nɩ,
sɩ n daarɩ n loori‑o
sɩ o ma o cɛ‑m.
4 Kɩ lɩla n vu o te,
yɩ n ta wʋ sin dɩ fɩnfɩɩn dɩ.
5 Nan kɩ nmʋ na wʋ́ kɩ te maama
sɩ n wanɩ n lu tɩn,
nɩnɛɛnɩ fərə naa zuŋə
na kwaanɩ ka lu
ka jarʋ jɩŋa nɩ te tɩn.
6 Nmʋ wʋlʋ na yɩ yawɔrɩ-nyɩm tɩn,
ve n nii mɩmɩla na cɛ
dɩ tɩtʋŋa te tɩn,
sɩ n daarɩ n joŋi swan ba tee nɩ.
7 Bantʋ ba jɩgɩ ba yigə tu naa pɛ.
Nɔɔn-nɔɔnʋ ba nii ba baŋa nɩ.
8 Dɩ kʋ maama dɩ, ba yǝni ba pɛ ba wʋdiiru tɩ maŋa nɩ,
yɩ ba daarɩ ba tiŋi-tɩ
cam maŋa ŋwaanɩ.
9 Nmʋ wʋlʋ na yɩ yawɔrɩ-nyɩm tɩn,
nmʋ wʋ́ ta n tigi n dɔa taan
sɩ n vu n maŋɩ yən mʋ?
Nmʋ ba lagɩ n zaŋɩ
n tigə je sɩm nɩ na?
10 Tɔ. Daa ta n dɔ fɩnfɩɩn n wǝli da.
Kogili n yiǝ sɩ n sin.
Ta n tigi n pwəgə je sɩm nɩ n maŋɩ dá yirr.
11 Yinigə wʋ́ vɔɔrɩ ka zi‑m,
nɩ vɩnvɩrnʋ na zaŋɩ
nɔɔnʋ baŋa nɩ te tɩn mʋ.
Gɛɛrɩ dɩ maa wʋ́ da dɩ ja‑m lanyɩranɩ.
12 Nɔn-wo-kʋrʋ na tʋŋɩ lwarɩm te tɩn,
o kaagɩ fɔ vwan mʋ.
13 O ta yǝni o bʋgɩsɩ yiə mʋ
o tɔ o naga tɩga nɩ mʋ o maa bəi nɔɔna
yɩ o yɩgɩsɩ o jɩa
sɩ o ganɩ o donnǝ.
14 Kʋ tu jeeli lwarɩm mʋ sɩ o kɩ,
o wʋbʋŋa na ywəri tɩn ŋwaanɩ.
O na ve mɛ maama,
nakɔɔrɩ mʋ zaŋɩ daanɩ.
15 Kʋntʋ ŋwaanɩ mʋ lɛɛrʋ wʋ́ da
tɩ ba o baŋa.
O maa wʋ́ yɔɔrɩ o na cɔgɩm
yɩ o bá lu dɩ wʋnɩ.
16 Wǝǝnu bardʋ mʋ Baŋa-Wɛ culǝ.
Cɩga tɩn, wǝǝnu tɩrpɛ maa yɩ
wo-zɔɔna DƖ tee nɩ.
17 Tɩ maa yɩ:
Wʋlʋ na brɩ o tɩtɩ kamunni tɩn,
dɩ wʋlʋ na yɩ niǝ yale yale tu tɩn,
dɩ nɔn-gʋrʋ,
18 dɩ wʋlʋ na je o bʋŋɩ lwarɩm
o paɩ o donnǝ tɩn,
dɩ wʋlʋ na yɔɔrɩ o wuuri
dɩ lwarɩm kǝm tɩn,
19 dɩ wʋlʋ na fɔ vwan
taanɩ dim baŋa nɩ tɩn,
dɩdaanɩ wʋlʋ na paɩ vuvugə tui
o donnǝ tɩtarɩ nɩ tɩn.
Gwalɩm taanɩ
20 Amʋ bu, ta n kɩ n tɔgɩ ni dɩlʋ n ko na pɛ‑m tɩn.
Nan yɩ swe n nu
na brɩ-m kʋlʋ tɩn ni nɩ.
21 Pa ba kwiə yam taa tigi n wʋbʋŋa nɩ,
sɩ ya taa nyɩ dɩ zambili
n na kwe n dɩ n ban nɩ tɩn.
22 Nmʋ na ve mɛ maama,
yaá taa wʋ n yigə nɩ
ya brɩ-m cwǝŋǝ.
Nmʋ na tigi n dɔa dɩ,
yaá taa yɩrɩ-m.
Nmʋ daa na zaŋɩ,
yaá pa‑m kwiə.
23 Bɛŋwaanɩ, ba kwiə yam nyɩ dɩ
min-zoŋo mʋ.
Ya maa yɩ pooni ya pa‑m
sɩ n ta n veǝ.
Ba zaasɩm dɩm dɩ maa wʋ́ pa
n ni ŋwɩa ywəəni.
24 Taana yam kʋntʋ wʋ́ cɩ-m
dɩ ka-balɔrɔ,
kʋ fɔgɩ kʋ daɩ ka-tʋla
na wʋ́ kwe ni-sʋnɩ
sɩ o sʋgɩ‑m te tɩn.
25 Yɩ kɩ n fra o yatɩga lam dɩm wʋnɩ.
Nan yɩ sɛ sɩ o bʋgɩsɩ o yiǝ
o ma-ya o ja‑m.
26 Nɔɔna ŋwɩ woŋo fɩɩn mʋ
ba paɩ ka-boro
yɩ ba pəni dɩd-o.
Nmʋ ta na pəni dɩ nɔɔnʋ wʋdoŋ kaanɩ,
o laan wʋ́ sɔ‑m mʋ wuu.
27 Nmʋ na səgi min-cala
n gwar-fwɛɛlɩ nɩ,
n gɔrɔ kʋm bá ja mim na?
28 Nmʋ nan na nɔnɩ min-cala
baŋa nɩ,
n nɛ bá pogili na?
29 Kʋ nan ta yɩ bɩdwɩ mʋ dɩ wʋlʋ
na wʋ́ vu o pəni
dɩ nɔɔnʋ wʋdoŋ kaanɩ tɩn.
Wʋlʋ maama na kɩ kʋntʋ,
kʋʋ́ tiini kʋ zʋ kʋ tu yɩra.
30 Ba ba ŋwanɩ ba paɩ ŋwɩɩnʋ ba wɩ:
kana jɩg-o ka ni pa o ŋɔ
sɩ o zuri o kana.
31 Ba nan na jaan‑o,
kʋ tu wʋ́ ŋwɩ o na ŋɔgɩ kʋlʋ tɩn
kuni bɩrpɛ,
pa o ga o sɔŋɔ jɩjɩgɩrʋ maama.
32 Agɛbʋŋa yɩranɩ mʋ wʋ́ kɩ bwǝŋǝ
dɩ nɔn-gaa kaanɩ.
Kʋ tu yɔɔrɩ o beeri cɔgɩm mʋ
o pa o tɩtɩ.
33 O maŋɩ dɩ waarɩm mʋ,
yɩ baá kwe tɩtɔ-gʋrʋ
ba pu o yuu nɩ.
O cavɩɩra yam dɩ maa bá fɔgɩ
ya ti.
34 Bɛŋwaanɩ, kazwɩ wiiri kan-barʋ banɩ mʋ kʋ kɩ da.
O na lagɩ o yiri o jɩna,
o bá ja ŋwaŋa kɔtaa.
35 Ba na maŋɩ ba ja kʋlʋ maama
ba ba sɩ ba ja o naga,
o wʋ ta bá zuri.
Ba nan na pɛ‑o dim
sɩ kʋ taa maɩ te dɩ,
o bá sɛ sɩ o joŋi-dɩ.