5
Amʋ bu, kɩ n zwa kɩʋʋsɩ n cəgi swan dɩ yi-pʋrʋ taanɩ
dɩlʋ a na maŋɩ sɩ a ta dɩ nmʋ tɩn.
2 Kʋʋ́ pa n lwarɩ kʋlʋ na maŋɩ kǝm,
yɩ yǝno taanɩ wʋ́ taa wʋ n ni nɩ.
3 Bɛŋwaanɩ, ka-tʋla kɩ ni-sʋnɩ dɩ nɔɔna,
nɩ tʋʋrʋ na lurə te tɩn mʋ.
O ni-taanɩ maa yɔɔrɩ dɩ swələ
nɩ nugə na yɩ te tɩn.
4 Sɩ kʋ kweeli tɩn, o kikiə maama wʋ́ pa
n na cam dɩ zʋnnɩ yɩranɩ mʋ.
5 O na-bwərə guri dɩ tʋʋnɩ mʋ.
Balʋ na tɔg-o tɩn maa ve curu.
6 O yigə tǝrǝ dɩ cwǝŋǝ kalʋ
na paɩ ŋwɩa tɩn.
O ma cɔgɩ cwǝŋǝ kam,
yɩ o daa yǝri woŋo kʋlʋ
o na jɩgɩ o kɩ tɩn.
7 Kʋntʋ tɩn, amʋ bu,
cəgi a taanɩ dɩm.
Yɩ sɩn n zwa dɩ a na jɩgɩ kʋlʋ
a tɛ tɩn.
8 Nan cɩ n tɩtɩ dɩ ka-dwi dɩm kʋntʋ cwǝŋǝ kam.
Maŋɩ n yɩ twɛ o sɔŋɔ seeni.
9 Kʋ na daɩ kʋntʋ, o lagɩ o lɩ kʋlʋ na jɩgɩ n zulə tɩn mʋ,
Kʋ daarɩ sɩ baarʋ wʋlʋ na ba jɩgɩ yibwonə tɩn cɔgɩ nmʋ ŋwɩan kam.
10 Vərə maa wʋ́ ba ba ba joŋi
n jɩjɩgɩrʋ ba taa te,
pa nmʋ na yaarɩ n na kʋlʋ tɩn
laan kweeli nɔn-gaa sɔŋɔ nɩ.
11 Sɩ kʋ ba ti maama tɩn,
n yɩra maama wʋ́ bugi ya je mʋ,
«Bɛɛ mʋ yɩ a dɛɛn culi kʋrɩsɩm?
A dɛɛn wʋ sɛ bwɛa sɩ bɛɛ mʋ?
13 A nan vɩn a yigə tiinə bam taanɩ,
yɩ a daarɩ a sɩn a zwa
dɩ ba kwiə yam.
14 Amʋ laan nan zɩgɩ
sɩ a na a lɛɛrʋ mʋ,
pa a na a cavɩɩra
nɔn-kɔgɔ kʋm maama yigə nɩ.»
Ta n jɩgɩ cɩga n pa n kaanɩ wʋm
15 Nmʋ kaanɩ nyɩ dɩ n vʋlɩ wʋʋ na mʋ tɩte,
na balʋ na zɩgɩ nmʋ vʋlɩ dɩm wʋnɩ ba buri ba nuŋi tɩn.
Nan nyɔ na bam kʋntʋ.
16 Kʋ daɩ sɩ n pa n vʋlɩ wʋ na bam
taa tigi zaanɩ,
sɩ wʋlʋ maama na yiǝ,
sɩ o mɔ na o nyɔ.a
17 Yɩ pa nɔn-gaa tɔgɩ o nyɔ-ba,
sɩ nmʋ yɩranɩ mʋ wʋ́ taa nyɔ
kʋ wʋnɩ.
18 Ta n paɩ n yi sui dɩ n tɩtɩ vʋlɩ wʋ na bam maŋa maama.
Ta n di ywəəni taan dɩ kaanɩ wʋlʋ
n na maŋɩ n di
n nɔn-dʋnnɩ maŋa nɩ tɩn.
19 Pa o taa jɩgɩ lam n yibiyə nɩ,
nɩ wəŋə doŋ tɩn,
sɩ o yɩla yam taa jɩgɩ fra
ya pa‑m maŋa maama,
yɩ o sono kʋm dɩ taa paɩ
n su dɩ wʋpolo.
20 Amʋ bu, nmʋ wʋ́ pa ka-tʋla ja‑m
o kɩ o ja-bɔŋɔ nɩ sɩ bɛɛ mʋ?
Bɛɛ mʋ wʋ́ pa n vu n kukwəri nɔɔnʋ wʋdoŋ kaanɩ?
21 Bɛŋwaanɩ, nabiinu kikiə maama
yɩ jasɩ mʋ Baŋa-Wɛ yigə nɩ.
DƖ maa ye dɩ́ na-vəli maama ni nɩ.
22 Nɔn-balɔrɔ tɩtɩ lwarɩm mʋ
joori ya jaan‑o.
Dɩ nyɩ dɩ ŋʋnɩ mʋ
dɩ vɔg-o dɩ tiŋi.
23 Kʋ tu na warɩ o tɩtɩ o pɩɩnɩ tɩn
pa o lagɩ o tɩ lɩla.
Oó ba o cɔgɩ yɩ o je mʋ,
o na tiini o tʋŋɩ jwərim tɩn ŋwaanɩ.