Zaasɩm yadonnə
4
A biə bam, cəgi-na á ko zaasɩm. Kɩ-na á zwa kɩʋʋ sɩ á wanɩ á jɩgɩ wʋbʋŋa. 2 A kwiə yam jɩgɩ kuri mʋ. Kʋntʋ tɩn, yɩ vɩ-na a zaasɩm dɩm. 3 Amʋ biini maŋa nɩ yɩ a ta yɩ bu-pwələ tɩn mʋ a nu dɛɛn soe-nɩ, nɩ a na yɩ o bu-dʋa tɩn. A ko dɩ ma jəni-nɩ tɩga nɩ 4 o brɩ-nɩ o wɩ:«Ta n jɩgɩ a bɩtarɩ sɩm n wʋbʋŋa nɩ,
yɩ n daarɩ n ta n kɩ n tɔgɩ a niə yam,
sɩ n wʋ́ na mʋmwɛ-dɛɛrɩ.
5 Beeri swan dɩdaanɩ yi-pʋrʋ.
Yɩ swe a zaasɩm dɩm ni nɩ, nan yɩ vɩ-ya.
6 Yɩ ma n kwaga n ya yi-pʋrʋ,
sɩ kʋʋ́ taa kwǝli‑m.
Nan yɔɔrɩ n ta n soe‑kʋ
sɩ kʋ taa nii n baŋa nɩ.
7 Yi-pʋrʋ mʋ jɩgɩ kuri
kʋ dwe wǝǝnu maama.
Kʋntʋ tɩn, kwaanɩ n beeri swan je.
N na maŋɩ n beeri kʋlʋ maama
sɩ n ta n te,
ta cɛ sɩ n jɩgɩ yəno.
8 Pa yi-pʋrʋ taa jɩgɩ lʋnnɩ kʋ pa‑m,
sɩ kʋʋ́ pa n na yɩrɩ kamunu.
N ma n na kukwǝri-kʋ,
kʋʋ́ pa n na zulə.
9 Kʋʋ́ kɩ yu-yoŋo kʋ kɩ n yuu nɩ,
nɩ kʋ mɩlɩmɩ ga-punnu daanɩ mʋ
kʋ sɔ-tɩ kʋ kɩ da tɩn.
Kʋ ta wʋ́ pa n na nɩnwaŋa,
nɩ kʋ kwe paarɩ yipugə mʋ
kʋ pu n yuu nɩ tɩn.»
10 Amʋ bu, sɛ sɩ n kɩ n tɔgɩ
amʋ zaasɩm dɩm,
sɩ kʋ pa‑m mʋmwɛ-dɛɛrɩ.
11 Amʋ kwe nmʋ mʋ a dɩ
swan cwǝŋǝ kam nɩ,
sɩ n ta n tɔgɩ cɩga cwe sɩm.
12 Nmʋ ma n na veǝ,
kʋlʋkʋlʋ bá cɩ n yigə.
N nan na duri lɩla,
n bá tri n tʋ tɩga nɩ.
13 Zaasɩ zaasɩm n kɩ n wʋbʋŋa nɩ,
sɩ n yɩ yagɩ-dɩ.
Fɔgɩ n nii dɩ baŋa nɩ,
bɛŋwaanɩ dɩntʋ mʋ wʋ́ pa
n ni ŋwɩa ywəəni.
14 Yɩ lwǝni nɔn-balwaarʋ kikiə yam,
naa n tɔgɩ nɔn-balwaarʋ na-bwərə.
15 Nan cɩ n tɩtɩ dɩ bantʋ dwi cwe sɩm,
sɩ n ja n tɩtɩ dɩ ba tɩtʋŋ-naga kam.
Pipiri sɩ n daarɩ n ta n ve
n vəŋə.
16 Bɛŋwaanɩ, ba na wʋ tʋŋɩ lwarɩm,
ba bá pəni ba dɔ.
Dɔɔnɩ ba tui ba yiǝ,
nɩ ba na wʋ pɛ nɔɔnʋ tʋ tɩga nɩ.
17 Kǝm-balwaarʋ dɩ vuvugə tɩtʋŋa mʋ yɩ ba ni-wʋdiu.
18 Nɔn-ŋʋna na jɩgɩ ŋwɩa kalʋ tɩn
nyɩ dɩ tɩ-pʋra ni pooni dɩm mʋ.
Pooni dɩm kʋntʋ lɔɔrɩ dɩ kɩ da mʋ
sɩ kʋ vu kʋ yi wɩa tɩtarɩ maŋa.a
19 Kʋ nan na yɩ nɔn-balwaarʋ tɩm,
ba ŋwɩa maama yɔɔrɩ
ka yɩ liirə liirə mʋ.
Ba maa yǝri wǝǝnu tɩlʋ na paɩ ba tri ba tʋɩ tɩga nɩ tɩn.b
20 Amʋ bu, kɩ n zwa kɩʋʋ sɩ n cəgi
kʋlʋ a na maŋɩ sɩ a ta dɩ nmʋ tɩn.
21 Yɩ swe a zaasɩm dɩm swiə,
dɩ fɩnfɩɩn dɩ.
Nan yɔɔrɩ n pa dɩ taa tigi
n wʋbʋŋa nɩ.
22 Bɛŋwaanɩ, balʋ na lwarɩ-dɩ tɩn
wʋ́ na ŋwɩa dɩ baŋa nɩ.
Dɩ ta maa paɩ nɔɔna jɩgɩ yazurə cɩga cɩga.
23 Kʋlʋ na dwe maama tɩn,
fɔgɩ n ta n ye n wʋbʋŋa yam ni nɩ.
Bɛŋwaanɩ, n ŋwɩa tɩtʋŋɩ maama puli dáanɩ mʋ.
24 Yɩ ta n jɩgɩ niǝ yale yale.
Nan yɩ ta n kaagɩ n ŋɔɔnɩ bɩtar-yɔɔrʋ.
25 Kwaarɩ n yuu n yigə nɩ,
sɩ n yɩ maasɩ n nii je je.
26 Ta n ye n tɩtɩ na-vəli ni nɩ,
sɩ n tɔgɩ cwǝŋǝ kalʋ
na yɩ cɩga tɩn.
27 Yɩ ywəri cwǝŋǝ n vu jazɩm seeni,
naa jagwiə seeni.
Nan yɔɔrɩ n ta n cʋ n tɩtɩ
dɩ lwarɩm kikiə.